حمد بن جوباح
آخر قضيه للجذع في هيئة حقوق الشعـر = يستقبل الشعّـار ويوجّـه بحفـظ حقوقهـا
هذا خبر عاجل وصلني فالرساله من عصر = يمشي على قدور الحضارم بالنظر ويذوقها
الأسطورة
هذي قضية مجتمع والامر لـولاة الامـر = ليت المعاني ماأمنتنا بحرها وطروقهـا!!
السارق اللي جرته نمشي علاها بالاثـر = معه اربعين من الجهام يقودها ويسوقها!!
حمد بن جوباح
لا مت ما يدخل معك غير عملك وسط القبر = ذمتك ذمه غاليه وايـاك ترخـص سوقهـا
ما عندك الا قارب ومجداف وامواج وبحر = مير الغريقه قدم عينك لا تموت بطوقهـا !!
الأسطورة
مافيه شك ان الحياة احلام ودروس وعبر = حتى السوالف يوم تهرجها تبين فروقها!!
اللي قد عيني تبشّـر بالنجـاة وبالستـر = لو ان موجٍ كالجبال يميل كلـه فوقهـا!!
حمد بن جوباح
ما قلت ويش الراي فالشجره وهمال المطر ؟!! = اللي جفاها الغيم ليـن أمسـت تمـد عروقهـا
من احترام العقل والمنطق ووجهـات النظـر = ما تفتح قلوب الرجـال المقفلـه صندوقهـا !!
الأسطورة
قريّبة ومن الممات أقـرب وديرتهـا دهـر = الله يجيب لها المزون اللي تلوح بروقها !!
لاطارت طيور الظلام اسراب في تال الشهر = ما انت متحقق ويش رزقٍ شالته فحلوقها !!
حمد بن جوباح
يمكن على دار البدو تبرق وترعد يا حضر !! = وتموت شجرتكم ودار البـدو تحيـى نوقهـا
ما طارت طيور الظلام الا على عين الصقر = لكن عين الصقر في تالي الزمن يا ضوقهـا
الأسطورة
انته بدون الشرح يكفيك المفيد المختصـر = لاتنتظر شمس الحقيقة قبل وقت شروقها!!
بعض الفرايض وانته ادرى ماتصليها جهر = الله لنا ياللي تعاهد لك عـرب وتبوقهـا!!
حمد بن جوباح
لو تشرق من الغرب وش ينفعك ناقوس الخطر ؟!! = دقـه وخـل إخوانـك الجذعـان تزهـم روقهـا
دامك ذكرت ان الصلاه اشكال اخـذ منـي عـذر = مـا طـوّل قصـار اليديـن الا يبـاس حلوقهـا