العمده من العايدين.

[معجب العتيبي]

سلطان بن دحيم

هلا يا مرحبا والعيد يالعمده عساه يعود = ابارك لك بعيد الفطر لو كثر(ن) الاعيادي
واذا قلبك خضر ومهاوي(ن) لام العيون السود = انا بذكرك واقول الك يا صاحبي غادي

العمــــــدة

لعلك للبقاء ويعود عيدك في رخاء وسهود=يبارك لك ولي العرش وقتك يابن الاجوادي
لو إنا ما ملكنا البينه كـان الوفـاء مجحود=من اللي مادرى عن حب عبلة لابن شدادي

سلطان بن دحيم

زمانك فيه نقص وزود مير النقص فاق الزود = لنا مده ما شفنا برق نو ولاش رعادي
يعوضك ربنا في حبها في يومه الموعود = تموت ولا حصل لك ما تبي من غظ الانهادي

العمــــــدة

ابوليلى المهلهل لا غزا ليلة يجيب الفود=غنايم ما غنمها اللي مع الخليان سردادي
قبل تشهد على اصحاب الهوى عطنا ثمان شهود=على انك تحضر فروض الصلاة بمسجد الهادي

سلطان بن دحيم

هذا قدام لا يصبح طريق اهل النضاء مسدود = وكل اللي يبونه صار سد الضلع من غادي
انا صاحي لكن اغلب عباد الله تقول رقود = ولا يدرون وش فرق العسل عن سم الاكبادي

العمــــــدة

جبل من ثلج ساعة قيض وحدة تجعله مهدود=وكل اللي وراه يروح مكسب حاضر وبادي
حشمت وجيه ما ذريت فيها الملح والبارود=ولكن كنّها ملت من الريحان والكادي

سلطان بن دحيم

تقوله وانت ما ادركت الك لا غايه ولا مقصود = وقسمك ما حصل لك يا رعد من ورث الاجدادي
لا بالله ما حشمت ولا تفرق بين ورع وعود = ويوم الناس لدت فيك قمت اتصيح وتنادي

العمــــــدة

اخذت السيف وانت اخذت وهمً ماهو بموجود=على الميزان ماله وزن لا نقص ولا زادي
لا بالله حاشمك من خلقتي يالحاشي المفرود=تبا الممتاز وانا اقول لا بالله .. من العادي

سلطان بن دحيم

يا راع السيف صدا وانثلم حده ما هو محدود = وانا لا اعاطيت عهد الله ماني عنه متحادي
فعولك من سببها صار قدرك عندنا العبرود = ولكن عيش باق العمر هم وغم وانكادي

العمــــــدة

فعوله فالعدا اللي قبرهم يا صاحبي ملحود=وصيته ما يغطه راعيً سيّر مع الوادي
اعيش العمر ثابت ساس شامخ راس مثل الطود=ولا ني مثل من سده يبيح ان طول المادي