قرين السوء مايبنى شراعه

[مطلق الحويقل]

أحب إليَّه غـزايز ياجـماعـــه = لـهن بالـقلب وعـروقه طباعه
لهن بـالقلب مرباع ومـصايـف = زرعهـا الله فـي قـلبي زراعه
وانا مــاني بالاول بالـمحـبه =ولا الثاني ولانــي بالتــباعه
وانا حبي ماهو زين العــذارى =لو ان الــزين له عندي ولاعه
محبتهن مـاهـــو عيب يعيب = الـيا صارت بعــزه وارتفاعه
اليا صـارت على سلم الشريعـه = ولافيها محايل وانـخـــداعه
انا شـفي مـرافـق كل طـيب =على وضح النـقا في كل ساعه
لأن الرجـل يعـرف من قرينـه =وقـرين السـوءمايبنى شراعه
وليا رافـقت لك طـيًب تـعـلاّ =وكل حسـب عـرفه واقـتناعه
وسوق الطيب بين ومـتبـايـن =كمانجـم سرى يوضي شعاعـه
ولاينزل به الا كــل نـــادر = لان بضاعته ماهي بـضـاعـه
لان بضاعته صـبر وعزيـمـه =ونطح الواجبات بكل شـاعــه
واخير الواجـبات الله فرضـها =هـو الطاعه لمن ياجب مطاعـه
نعم ما الله خـلق خـلقـه تزود =ولافي حـاجـه الخـلق ودفاعه
خلقنا الله من شان العـبــاده = ورسول الحـق نمشي بإتباعـه
وانالاحظت لي في هــالزماني = مشـاكل بحرها من غيـر قاعة
تشوف ابها حقوق الله تقــطع = ولاأحـد غاوين حق الـقـطاعه
لكن دنـيا مـحبـتها تـزايـد = بقلوب الناس ياالـله الـشفاعـه
نسو يوم يروع النـاس هولـه = ودنيا الـهون مافيـها بتاعــه
لها صار المحبه والتــواطـي = ولها صارالزعل والانـدفـاعـه
بدو فيها التنافس والتباغــض = وعـاشقها قليل الانـتـفـاعـه
وهي لو ميزوها واعرفـوهـا = مــاهي والله لمن قيم اطماعـه
اجل ماهيب تكـفيك الاشــاره = مـن الاسم الدني ويش المتاعـه
جعلها الله أقل من البعوضــه = لكن حنا قناعتــنا قناعـــه
نطالعها حياة مستديــــمـه = ونعمرها لكن عمران ضاعـــه
نعمرها بـهرج بالمقـــفـي = ونعمرها بــــترديد الاشاعـه
ونعمرهابهـضم حقوق خلـقه = ونعــمرها بغش في البضاعـه
ونعمرها بتوليع المـفـاتــن = مابين المـسلمين بكل اذاعـــه
وحنا لويطول العمر مـــعـنا =مــصـير العمر قافيه انتزاعـه
لكن يالله نطلبك الـهدايـــه =وشـفاعه من ترد له الشفـاعـه
هذا والرغبه الاخرى تراهــا =ليا ذعـذع هواالوسمي ذعاعــه
وخيّل ضافي مزنه محـــول = عـلى وجه الوطا يوضي شعاعـه
سيـوف البرق بارقابه تلامـع = ومن شافه حصل بـاعـضاه راعه
يحده من جنوب جبال بيشــه = جـنوب الهضب وجبال الرفاعـه
ويحده من شمال الحد حــده =وهبوب الريـح تردعله رداعــه
يعم المملكه عرضه وطــوله =ويـركد لـين يروي ماه قاعــه
تشوف الارض من سـيله تلالا = ووجه العـشب جايله صداعــه
هذا من شان غيث الله نريـده =ونرجـي فزعته راع الفزاعــه
وهذا من شان حب المسلميني = وهذا من شان حبك يالزعاعـــه
احب البل وحب البل وراثــه = تــناشى معي من سن الرضاعه
احب اللي لها غارب وخــده =وخـرطوم تقـــل فيه انهزاعـه
وسنـام فاهــق يم احجبتها = وغـاربها مـنى راع الـولاعـه
ورقبتن طافحـه والوجه ضـافي = ونحـر يعجب العين اتسـاعــه
وان قيل اللون للوضحا ميولي =محبة قلب ماهيب ابـتداعــــه
الايالله غـيـثـك يامــهيمن = يامــن ترفع له كفوف الضراعه
وصلاة الله على الهادي محمد = وكل حسب عـرفه واقتناعـــه
=الشاعــــر/ مطــــــــلق خالد الحويقل العتيبي[/font]

[/poem][/size][/poem][/poem][/size]

آخر تعديل مطلق الحويقل يوم 23-Jan-2009 في 09:20 PM.

[علي فلاح العضياني]

الله الله



صحّ لسانك شاعر كبير ما يحتاج

التوقيع

(( رأس الحكمه مخافة الله ))

[فواز علي الروقي]

صح لسااااااااانك
تقبل تحياتي

[مطلق الحويقل]

اشكر الأخوان العزيزين على المرور
وماعليكم زود
وتقبلوا تحياتي

[@ـايل]

صح لسانك ياشاعرنا ./مطلق الحويقل ..والله يعافيك على ماقدمت من ابيات فيها من الحكمه الشيء الكثير ..لاهنت ..وننتظر جديدك ...

التوقيع

شكر خآص للأخ العزيز (سمي جدي) ,,, للتواصل,,, hail-osaimi@hotmail.com الفيس بوك : هايل العصيمي انستقرام : hailosaimi تويتر : AlHooL@

[عقاب بن سقيان العتيبي]

مطلق الحويقل
صح لسانك

وصلى الله على الهادي محمد
وكل حسب عرفه واقتناعه

كلامك يصحي من النوم يالحويقل
اتمنى لك التوفيق دائما.................

[مطلق الحويقل]

مشكورين اخواني على المرور
وماعليكم زود وعسى الله يجملنا معكم ومع غيركم بالعلوم الطيبه
وتحياتي لكم..,

[الصاطي,,]

صح لسااااانك يا ابو خالد شاعر مبدع


عرفتك من خلال شعرك الراقي ولم يحصلي الشرف بمقابلتك,,,





تحياتي لك

[بندر سعود الدغيلبي]

صح لسانك يامطلق

قصيدة جزلة من شاعر جزل

تحياتي للجميع

[مطلق الحويقل]

اخي الصاطي
واخوي بندر الدغيلبي
اسعدني مروركم
وشكرا على الإطراء
وانشاء الله يالصاطي يحصل ماتريد
ويحصل بيننا اللقاء.
وتقبلوا تحياتي