رفقة ردي الحض بالرجل تنداس=والله لناطاها ونلعن ثواها

[عبدالله الاصعر]

الرفقه اللي ماتعمر على ساس=يطيح مبناها على من بناها
لاخير في رفقة كثيرن من الناس=اللي قصيرن فالمراجل مداها
وانا ما ارافق بارد الوجه والراس=وبعض الرجال وجيها من قفاها
رفقة ردي الحض بالرجل تنداس=والله لناطاها ونلعن ثواها
اهل الحكي من حكيها مالحق باس=طيور نغاقه وهذا لغاها
بعض العرب في الوقت ماهو بحساس= يجعل فوقه مايذعذع هواها
ناشي على اعراض الاوادم وبلاس=اعراض خلق الله يرثع وراها
بعروضها يبني كما بني الاطعاس=لين انها تاصل ليا منتهاها
وان شبها بين الفريقين ينحاس=يحوص عنها مايجي ملتقاها
ارافق اللي رفقتة ترفع الراس=صقراً رقا روس العلى واعتلاها
عندي سوات الزير سالم وجساس=بالطيب والنوماس فيه اتباها
نشا على طيب ومعزة ونوماس=وان شاف خله فوق ربعه رفاها
عساه في دنياه يسلم من الباس=يسلم من الدنيا ويسلم عناها
وروس العلا يرقابها كل قرناس=والبوم لو هو هازها مارقاها
ترا الرجال اشكال في الوقت واجناس=عقولها تفرق بها عن لحاها
رجلً بدا بالطيب في راس مرواس=حاز المراجل كلها واحتواها
دايم لثوب الجود والعز لباس=مدات كفه بالكرم ماحصاها
ورجلً بخيل اعن المواجيب هساس=مكسور كرف وعورتة ماكساها
ورجلً مغير منقعن قدمه الكاس=غافل عن الدنيا ونفسه نساها
ورجلً على غرات الاجواد حراس=يدور الغرة وعينه علاها
على الرذيله عاش والعرق دساس=كل الدروب اللي تفشل مشاها
وصلاة ربي عد ماهب نسناس= على رسول الله في منتهاها