ياعاشقين الشعر للشعر شعار - الهيـــــــــــــلا *** منتدى قبيلة عتيبة

نايف بن ملحق الثعلي · 02-Jan-2009, 11:20 PM

ياعاشقين الشعر للشعر شعار=الشعر فتل ونقض لاتظلمونه
معنى وفن وذوق في كل الأقطار=يافاهمين الشعر لاترخصونه
والشعر ديوان العرب وين ماصار=ديوانهم وتراثهم يحفظونه
من راح شرق وغرب ويمين ويسار=يلقاه عند أصحابه اللي تصونه
واليوم أظن الشعر بالحيل منهار=آخر زمان الشعر تبكي عيونه
ماكل شاعر يبدع القاف بيطار=لو إن صوته زين وألا لحونه
مايدري أن الشعر أحاسيس وأفكار=ماهوب ضحكة سن ياللي تبونه
عز الله إن الشعر مارد ومصدار=واللي يعرف الشعر يفهم فنونه
والشعر غالي مع هل الصيت والكار=اللي لهم تقدير ويقدرونه
من سابق الأيام والوقت دوار=الشعر دره فالبحور مخزونه
ماهوب لحد عن أحد لو قلت ابا اختار=لكن بعض الناس مايفهمونه
هذي نصيحه للعرب سر وجهار=من لايعرف الشعر يرتاح دونه
ماهوب فوضه فيه فالسوق تجار=سعر الذهب غالي ويلقى زبونه
يالله ياللي عالم(ن) كـل الأسرار=إلطف بحال اللي تغره ظنونه
يمشي على كيفه ولاهوب محتار=ماهوب ناقد والعرب ينقدونه
وليا نصحته ضاق ويقول ماغار=أنا الذي ما أرضى حياة المهونه
ماهوب عارف واجب الضيف والجار=مايدري إن الرأس عزه متونه
للشعر عند أهله محبه ومقدار=والشاعر العاقل منيعه حصونه
ويطب في جزل المعاني ويختار=ويقطف كما قطف الزهر من غصونه
ويصوغ بيت الشعر ويحكم الأشوار=ماخانه الهاجوس حتى يخونه
وختامها صلوا على سيد الأخيار=عداد برق(ن) ساطع(ن) في مـزونه

التوقيع

ما هوب لازم توقيع00