الشيخ الكريم جدوع الوصيوص الشرارى

[الشرارى الشمالى]

الشيخ الكريم جدوع الوصيوص الشرارى

--------------------------------------------------------------------------------

بسم الله الرحمن الرحيم

اللهم صلى وسلم على سيدنا محمد

السلام عليكم ورحمة الله وبركاته

اخوانى الكرام

اريد ان اورد لكم قصه وعدة قصائد حدثت رد للقصه

كان الشيخ جدوع بن سالم الوصيوص الشرارى رحمه الله رجل كريم وشهم وكل علوم الرجاجيل عنده وكان امير مركز رجال يفرح بالضيف والمسير وبيته مدهال للغانمين والمناسبات اذا سواهن تحس انه عازمن الناس كلها من تعبه على الطيب وكان مايذبح غير الابل من كثر الناس اللى تحبه وتحب مجالسته لانه كان متواضع ويحب الخير للناس ويحب الفزعه والعلوم الطيبه وكان ساكن بالبر بشمال المملكه وكانت الارض ريف والصيد كثير

وكان الشاعر عبدالرحمن العطاوى العتيبى فى ضيافة الشيخ جدوع الوصيوص أحــــد الليالى دعاهم

الشاعر محمد العليه الشرارى للعشاء وافق الشيخ جدوع الوصيوص و الشاعر عبدالرحمن العطاوى ولبوا الدعوه وذهبوا للعشاء

برفقة سمير الوصيوص أخو الشيخ جدوع وبعد ما تعشوا وسمروا استأذنوامن الشاعر

محمد العليه ورجعوا الى بيت الشيخ جدوع الوصيوص للنوم واثناء عودتهم أخر الليل صادفوا لهم ذيب ومد عليه

الشاعر عبدالرحمن العطاوى واطلق عليه النار وقتل الذيب وقصد الشاعر العطاوى العتيبى هذه القصيده

يا سمير ما حلى ذبحة الذيب يا سمير=هاللى عرضـك بشعيـب القشاشـى
لابـن عليـه باديـن بالمسابـيـر=مستبشرن يوم ان ابو علـى غاشـى
وده علـى مالـه يشـن المغاويـر=من جل ضانـه مشتهلـه عراشـه
واقفـى ولحقنـه جـداد الحناتيـر=ومثومنـن غريزنـاشـه نـواشـى
وجر العواله فى طـوال الشناضيـر=واتلى عـواه مخاشـرن بهتواشـى
ثم انعثر وقال اسمعوا يـا مسافيـر=انـا فقيـر ومـن بخيـل بمعاشـى
وعلى محمد وابو شايم فـلا أغيـر=اللـى أكـرام للمسيـر هشـاشـى
شحم غنمهـم بـس دوب المساييـر=ما قط حفت وشفت معهـم كباشـى
وسرحان مـات ولاتفيـد المعاذيـر=بمفـرع القشـه تالـى الغبـاشـى
وانا غرامى بالخـلا هـدت الطيـر=فى خايعن ماشيف حولـه مواشـى
فيه الحبارى فالفيـاض المخاضيـر=بيض الردون اللى غلبهن ارياشـى

وصلوا بيت الشيخ جدوع الوصيوص وناموا ولما اصبحوا علموا باللى حصل معهم بالليل والقصيده

وجاء الخبر الشاعر محمد العليه ورد على الشاعر عبدالرحمن العطاوى العتيبى وقال الشاعر محمد العليه الشرارى

القـاف عنـدى درت فيـه التباصـيـر=ويلـزم عليـه أطبقـه فـى قـراشـى
فيـه التحـيـه والتـرحـب وتقـديـر=أعـداد مـا ينشـى مـن الغيـم ناشـى
يعيـش منهـو فزعـتـه بالمحاضـيـر=والـى رمـى ماهـو بيرمـى طفاشـى
أشكـر ابـو نـواف شكـرن بتكريـر=يـوم ان راس الذيـب خلـى طشاشـى
ماهـى كثيـره مـن حمـات المعاشيـر=اللـى علـى الطـولات دايـم تعاشـى
نسـل الجـدود اللـى تحـد الطوابيـر=يردون حـوض المـوت ورد العطاشـى
الله يبـارك فـى شــراك المغاتـيـر=اللـى قسـم بينـى وبيـنـك نقـاشـى
تـاج الرجالـه دافعـن بـه مخاسـيـر=ولا فيـه مدحـا والـمـن بالبـلاشـى
رفيـق عــز وحافـظـه للمذاخـيـر=ولا نخيـتـه بالـمـلازيـم شـاشــى
يرفـع رفيقـه فـوق رؤؤس الشناظيـر=خوة شرف ماركبت على الطمع واللشاشى
وانا اسمحولـى مـن غـرام الصقاقيـر=الا انكـر الخـوة خطـات الهـلاشـى
انـا بـلاى ابــو نـهـود مزابـيـر=طيري وحش مـا طلـت فيـه المناشـى
مثـل الجنيـه برؤؤسـهـن دواويــر=لاهـو غليـظ ولا دقـاقـن انشـاشـى
والريـح ريـح فيـاض فيهـا نواويـر=تلقـى الحمـار مـع البيـاض متناشـى
وبرقت بحالى صرت فى تالـى عصيـر=ريـح النفـل الـى نــداه الرشـاشـى

وقال الشاعر عبدالرحمن العطاوى العتيبى والله انا ابغى اعلم عبدال يقصد الشاعر عبدالله بن نايف بن عون العتيبى

صديق الشيخ جدوع بالقصايد وبذبحة الذيب وانهم عند الشيخ جدوع الوصيوص والربيع والصيد ولبن الابل وارسلوله وجاه الخبر وقصد القصيده التاليه يقول ابن عون

لا واه مـن قلـب قلـب للتفاكيـر=ينعش مواته من شمـال إنتعاشـى
يسير انا يـا عاذلـى والعزاصيـر=همت المهامه من همـوم إبتلاشـى
قم يا هميم وحضر الجمس تحضير=انا ترانى طلعت الشمـس ماشـى
كوده يعالـج ضيقتـى والحواشيـر=ويطفىء اللهيب اللى تساعر بجاشى
خله يناحر لايسر الجـدى بالسيـر=وينصابنا جدوع راعـى المشاشـى
ملقاك أبو شايم سـراج المحاضيـر=ولانى بحـب الشـرارى مخاشـى
اللى يقلط بالصحن مصلح الضيـر=وغير الكباش يحط نـاب الفراشـى
ما أهتـم بالدنيـا بجمـع الدنانيـر=ولا فيه عن جزل المقام انكماشـى
كنه على الفرضه مرسى البوابيـر=ومن كل صوب مرتبن له معاشـى
ومنه أرتحل وانحر أخشوم الصنانير=اللـى مقانيصـه بهـاك الدشاشـى
ملفاك ابو نايـف جـزل التعابيـر=اللى غرامه فـى هـداد الوحاشـى
له ميزة ما هى بتنوجد مـع الغيـر=حب الحرار وحب وضح البواشـى
هداج تيماء اللـى وروده حياطيـر=عدا روى رهـاج ميحـه هجاشـى
وانا على من الهوى حمل ما ديـر=يا شيخ والله مـا عليهـا قشاشـى
عند العرب تضفى حجاب الدساتير=ورمح الهوى نابشك مثلى نواشـى
واليوم انا بالذيب اطلـب مثاويـر=والله لو انى حاضره ما ينـا شـى
ذبحتك لسرحان يـا شيـخ تنكيـر=يوم اعتذر ما قلت يا صقر عاشـى
خله يربـع فـى حـلال المعاثيـر=يا صار ماله يم ابو علـى ماشـى
ولا له على جدوع ورد ومصاديـر=خله على مـال البخيـل الجغاشـى
ليته على نايـف زبـن بالمواقيـر=ولا على الشايش زبن واستشاشـى
وقعدت أسطر فيهم الشعر تسطيـر=بياضن أنقى من بيـاض القماشـى
وابكتب عن اللى قاله الذيب تقريـر=ما راح قول الذيب عنـدى بلاشـى
جدوع أبو شايم ربيـع الخطاطيـر=يحط حدر البـل هرافـى فراشـى
وابن عليه حمـض كـل المناعيـر=من جـاه قـام بواجبـه ببتهاشـى
اطرب ال شوفه لو تطول المسافير=لو كنت بالعارض وهو بالمعاشـى

وبعد ماقال القصيده فى الرياض مشى صوب الشمال الشاعر عبدالله بن نايف بن عون العتيبى والتقى مع اصدقائه بودى المعاشى بشمال المملكه

وسلامتكم اخوانى الاعزاء

[ابو محمد الدعجاني]

لاهنت يالغالي وصح السانهم

[الشرارى الشمالى]

الله يحييك يا ابن غزاى وشكرا لك على المرور

[عبدالله الجـــذع]

الله عليك

مشكور يالغالي على هذه القصه التي
لاتبدو منذ زمن بعيد خصوصا بوجود الشعراء حاليا
الله يطول اعمارهم

فيها من التآخي والآلفه الشيء الكثير
اكرر الشكرلك

محبك

.

التوقيع

قال الرسول صلى الله عليه وسلم [مَنْ قَالَ أَسْتَغْفِرُ اللَّهَ الْعَظِيمَ الَّذِي لَا إِلَهَ إِلَّا هُوَ الْحَيَّ الْقَيُّومَ وَأَتُوبُ إِلَيْهِ غُفِرَ لَهُ وَإِنْ كَانَ فَرَّ مِنْ الزَّحْفِ ]( سنن الترمذي ) . . قال صلى الله عليه وسلم : ( إن الشيطان قال : وعزتك يارب ! لا أبرح اغوي عبادك ما دامت أرواحهم في أجسادهم ! فقال الرب تبارك وتعالى : ( وعزتي وجلالي , لا أزال اغفر لهم ما استغفروني ) ... ( السلسله الصحيحه ) . موقع يضم جميع القراء هنا

[ضامي وفا]

مشكور ياغااالي على القصة الرااائعة

يعطيك العافيه