وقفه مع الشاعر المرحوم عبدالله العير المطيري رحمة الله

[((الدلبحي))]

حسب طلب كثير من الاخوان مانعرف عن الشاعر المرحوم عبدالله العير نورد هذه النبذه وهي منقوله من احد المنتديات وذلك للفائده واتمنى ان اكون وفقت في تقديم مايحوز على رضالكم
ان مت عزولي مرامي ووجدان= وابكوا على قبري ليالٍ طويله
ابكوا وبكوا لي معاكم كحيلان= خليف شيّال الحمول الثقيله

*
خلوني ارقد في مداليه جرّاح= واحط لي وسط الطريق استراحه
اذني ادله باقي الوقت وارتاح= لو كان مافي جور الايام راحه



عبـــدالله بــن عبيـــد العيـــر العضيله المطيـــري

كانت نشأته في محافظة عنيزه بحي السليمانيه حيث تخرج من ابتدائية طارق بن زياد
عام 1398هجري بعد ذلك واصل دراسته في متوسطة فلسطين,وتخرج منها عام
1403للهجره
ودخل الثانويه الصناعيه ودرس عامٍ ثم انسحب منها
ثم التحق بالخدمه العسكريه

وتقاعد قبل شهرين من وفاته بناء على طلبه برتبة رقيب

وهو من مواليد 10/9/1384للهجره

متزوج له من الابناء اربعه ابنه عبيد وثلاث جواهر درر

هو الابن الاكبر ويعشق الابل ولديه جيش منها مخصص للسباقات
آخر حفله احياها رحمه الله كانت في الصباحيه بالكويت يوم الاربعاء20/7/1424للهجره
وكان معه الشاعر الكبير / سلطــــان الهاجري
والشاعر الكبيــر/ ذيب الشمــري

شــاعر له باع عظيــم لابل واعظم من العظيــم

شاعر مثل قبيله مطير في مجال المحاوره

شاعر هابه الشعراء وحسبوا له عند ملاقاته

كان يوصف بالفطنه وحدة الذكاء وسرعه البديهه والمرح وخفة الروح

لاقى فطاحلة شعراء الجزيره العربيه

منهم

الشاعر / خليف بن دواس المطيري
الشاعر/ زيــد بن سلمي
الشاعر/عبدالله بن شايق
الشاعر/فيصل الرياحي البقمي
الشاعر/ عاضه البقمي
الشاعر حمود السمي البقمي
الشاعر ابن جرشان
الشاعرالكبير / صيــاف الحــربي
الشاعرالكبير/حبيب العازمي
الشاعر / فلاح القرقاح
الشاعر/ محمد السناني
الشاعرالكبير/ رشيد الزلامي
الشاعر / نواف العازمي
الشاعر / ملفي المورقي
الشاعر/ عبدالله بن غازي المطيري (سوار الذهب)
الشاعر / غازي بن راشد المطيري
الشاعر / تركي الميزاني المطيري
الشاعرالكبير / مستور العصيمي
الشاعر / سالم الهريساني
الشاعر / ابن مشيط
الشاعر / سلطان الهاجري

وشعراء كثر كثر كثر كثر

لن احصيهم عدد

شاعر له بالنظم باع ليس بالسهل

من ابياته النظم ماذكرته في اول الموضوع

ان مت عزولي مرامي ووجدان= وابكوا على قبري ليالٍ طويله
ابكوا وبكوا لي معاكم كحيلان= خليف شيّال الحمول الثقيله


وله ايضا لاجئ الى جمله (جراح)بعدالله عز وجل


خلوني ارقد في مداليه جرّاح= واحط لي وسط الطريق استراحه
اذني ادله باقي الوقت وارتاح= لو كان مافي جور الايام راحه


وله بالمحاورات الكثير والكثير

سأورد لكم منها على سبيل المثال

العير عبدالله بن عبيد العير العضيله المطيري وهذه احدى جنووونه

مع الشاعر الكبير العظيم رشيد بن زيد الزلامي العتيبي من اعظم شعراء قبيلة عتيبه

في احدى قصور منطقة الدوادمي...

عبدالله العير المطيري:

سلام يا اصحابنا اللي جيتهم بالوعد= وانا لياجتني الدعوات لبيتها
اصفى سما نجد لابارق ولامن رعد= وانا لمحت المزن ورعودها اوحيتها

رشيد الزلامي العتيبي:

الله يحييك ترحيبٍ بليا عدد= قدمك رجالٍ ترحبك ليا جيتها
بس المصيبه تجيهم وانت مامعك احد= قامت بك الارض واشتغلت عفاريتها

عبدالله العير المطيري:

البارحه يارشيد وليت الاول بعد= وشلون حال الجماعه يوم مريتها
حنّا طراقي ولاحنّا من اهل البلد= لكن دعوتك هذي تعرف بويتها

رشيد الزلامي العتيبي:

ان كان تنشد جماعتنا بحال السعد= ومطير ماهي على الدرب وتعديتها
وش رايكم في عجوز بليس جابت ولد= واليا اسر الله ضحكتك وبكيتها

عبدالله العير المطيري:

الله ولا النشده اللي تاليتها نكد= وشلون موجتك للمطران فريتها
اللي عطتك البريره وانت وسط المهد= قالوا لي انك بعد شيّبت جازيتها

رشيد الزلامي العتيبي:

الله يعلم رشيد وقصده اللي قصد= مطير من قبل جيراني وحبيتها
لاتحفر المقبره يطبق عليك اللحد= واللي عطتني البريره جيت وارضيتها

عبدالله العير المطيري:

الليله انته بعيرٍ تنتظم وتهبد= ماتنتثنّى يدينك مير ثنيتها
اللي عطتك البريره حظها منقرد= عرضتها لاهب الكنّه وخليتها

رشيد الزلامي العتيبي:

الموج اشوفه طفح والبحر جاله زبد= لكنّ ذيك البضاعه وين وديتها
فزعتك عشرين واللي طاح واللي قعد= وخمخمتها في ظلام الليل واخطيتها

عبدالله العير المطيري:

حطيتها في بيوتٍ جودت بالعمد= وانته تباها لكنّك ماتحليتها
الله يعذبك كيف اشغلتني بالنشد= عن حرجةٍ تطلب الميته وذكيتها

رشيد الزلامي العتيبي:

اقول سبحانك الخلاق فردٍ صمد= عيون فتحتها وعيونٍ اعميتها
يالعير دم الخواجه ماع مدري جمد= وارد عراوي دخل ماها على زيتها

عبدالله العير المطيري:

الله ليا راد له حاجه بليا جهد= حرّم عليك الزقاره وانت كنيتها
ماعاد عند الخواجه دم كله نفد= اتعبت رجلك على دربه وعنيتها

رشيد الزلامي العتيبي:

وش رايك اعطيك بالغليون لين تهجد= تصبح وساعتك ضايعةٍ تواقيتها

وله بالنظم ايضا الكثير والكثير منها هذه المجنونه عليه رحمة الله
مرثيه في ابن رئيس مرور القصيم..

يقول فيها عبدالله رحمه الله:

يالله ياللي كلنا منّك وإليك= ياللي بذكرك تستلذ ألسنتنا
وقلوبنا بين اصبعينٍ من ايديك= وان كان ماثبتها ماثبتنا
نهار تلفضنا المقابر ونآتيك= من خشيةٍ فينا نظرنا تحتنا
عريا وزريا خاضعينٍ مداريك= صكة علينا ذلةٍ غاشيتنا
وان ماتهيّت رحمةٍ من مناشيك= والا ترا ما اعمالنامنجيتنا
منك الرجاء وانت الرجاء والرجاء فيك= تستر على خلاتنا فآخرتنا
وترحم جنازة مسلمٍ في حراويك= اغلى جنازة مؤمنٍ فارقتنا
وتغسل ذنوبه بالبرد من حسانيك= وترفع مقامه مع مقام انبيتنا
عبدٍ خجول ومقفيٍ عن معاصيك= متذكرٍ له ساعةٍ قافيتنا
(سامي) عسى اعمالك بقبرك تسليك= وتونسك في وحشةٍ موحشتنا
ويمدلك بالقبر نورٍ يباريك= في جاه من يعلم بغيب افئدتنا
ويلطف ببوك اللي لسانه بطاريك= اللي قضى وقته يربّي ويتنا
وتجبر عزا امٍ ترجي الله وترجيك= اللي عليك من الحزن حزنتنا
وحنّا ترانا من غلا ابوك نغليك= وان مادعينا لك ظلمنا بختنا
اللي على درب المراجل مربيك= مديرنا اللي رافعٍ منزلتنا
يكفيه من جور الزمن فجعته فيك= اللي نبي نبطي وهي موجعتنا
جينا يابوسامي (بسامي) نعزيك= وانته تعزينا على فاجعتنا
مير استعن بالله عسى الله يقويك=ع لى مقاديرٍ خذت ماعطتنا

-----
اسأل الله ان يرحم عبدالله وموتى المسلمين

وسلامتكم

[أبو مرحبا]

من منا لايعرف عبدالله العير
الله يرحمه ويسكنه جناته

الدلبحي

الله لايهينك
على نقل نبذة شاعر معروف وهو عبدالله العير الله يرحمه

التوقيع

إن قلَّـت الوزنـه وربعـي مشافيـح ** أخلـي الوزنـه لربعـي واشـومـي

[المهيدل المطيري]

رحمة الله عليك يا أبن عبيد

[ذيـب طـويـق]

رحم الله شاعر مطير .. وأسكنه فسيح جناته

ولن تنسى المحاوره الشعريه رمزاً من رموزها

وستبقى ابياته ذكرى يرددها عشاق المحاوره

ولن يزول هذا المجد الذي بناه لقبيلته

ويبقى صوت ألحانه صاغيه في أذاننا

وتبقى سيرته حيه في المجالس

لانه عبدالله العير

[سلطان المنصوري]

رحم الله الشاعر عبد الله العير

وأسكنه فسيح جناته


ولكن لم يكن من الشعراء الذين اشار لهم التاريخ بالبنان.. شاعر خدمه لقبه وربعة


والا فهو شاعر عادي جدا .. لم يأتي بجديد في شعر المحاورة ولم يطور منها بشهادة أغلب الشعراء



ولكن نظرأ لتعصب خندغ معه قاموا بالهيلمة حوله حتى اوصلوه مااوصلوه



وشكرا لكم

[((الدلبحي))]

قحص

تسلم على التعليق والمرور الكريم

تحيااااااااااااتي

[((الدلبحي))]

المهيدل المطيري

حياك الله

تحياااااااااااااتي

[((الدلبحي))]

ذيـب طـويـق

ياهلا بالاسم وراعيه

يعطيك العافيه على مرورك

تحياااااااااااتي

[((الدلبحي))]

سلطان المنصوري

تسلم على الرد الطيب

تحيااااااااااااتي