رحلة العمر>>>>غازي بن عون

[سلطان العصيمي]

العبد اله من عالم الغيب ميلاد= ويقضي بدنياه الخضر والعجافي
ولو عاش عمر شعيب فيها ولو ساد= مادامة لغيره نعيم وعوافي
ولا فرق بين الموالي والاسياد= من حل يرحل بنتهاي المطافي
له ساعة(ن)فالوح خطه وميعاد =وله مدة(ن)يعيش فيها وتافي
لقاف قدامه وقافيه طراد =ولا له مفر ولو تحذر واخافي
ان كان ماصاده مع الدرب صياد= يشده الي يطرده من اخلافي
احد(ن)من التقوى والامجاد يزداد =وبطيب العمال يملا الصحافي
يبا ليا نودي على روس الاشهاد =يعطي كتابه في يمينه يشافي
واللي من اوديه الجهل هام في واد= وقلبه عليه من المعاصي غلافي
لاجمعت ارواح البرايا والاجساد =عض الابهوم من الندم والاشافي
وعرش المعاني فالعباده والامجاد= ماياصله راع العزوم الضعافي
ومراتب الطاعه تبي صبر وجهاد =وتبا الجنوب عن المضاجع تجافي
وممش بسلم ورثوه النا الاجداد =مافيه مع هدى الشريعه تنافي
سلوم مجد عقبوها للاحفاد= كرم وشيمه والتحام وتصافي
وياالي حياتك كلها لهو ورقاد =وعن منهج الاسلاف فيك انحرافي
وشلون تقضي ايامك افراح واعياد= والشق مايرفاه بالسلك رافي
القدس محتله وكابل وبغداد= والله هو اعلم وش عليهن يضافي
والوقت قامت تعترك فيه الاضداد= جميع عاقل شاف منه اختلافي
وكثرت به انواع المعاصي والافساد= وتتابعت فيه المحن يامجافي
وتغيرت فيه المخايل والانواد= والجو كتم عقب ماهوب صافي
وتمض السنه ماحن فالمزن رعاد= والبر مجدب والمواشي هجافي
والزرع كنه باديا فيه حصاد =من الجفاف ومن لهيب الهيافي
وجميع عدن كان للناس ميراد= نضبت جمامه عقب طول الجفافي
واهل العقول الراجحه واهل الارشاد= بقلوبهم من مايرون ارتجافي
مايعتبر من قوم صالح ومن عاد= وامثالهم من كل مذنب وجافي
وبنصح اخواني حكومات وافراد= بتقوى الذي خيره على الناس ضافي
وانا اكبر مقصر من الحضروالباد= واشهد بتقصيري واحط اعترافي
قدمي مسافات ومفازات وانجاد =مع جرهد مقفر من الناس عافي
يامصعب الرحله ويامطول الماد =والحمل باهظ والزاهيب خفافي
يارب جيتك لامطيه ولازاد= جيعان مذنب درك عريان حافي
جيت بخطايا مالهاالا انت عداد= تعلم بها ياعالم بالخوافي
وجميع ماحشته بدنياي مافاد= جيتك منه فرد وتركته خلافي
مافاد مال ولاجماعه ولااولاد= نهار فرقا الشمل بين الولافي
من عقب مد الشوف مع بيض الاجراد= ومن عقب ممش في وساع الفيافي
وبعد القصور اللي تفرش بسجاد= وفرش منعمت ولحف رهافي
امسي بقبرا مظلما بين الالحاد= ارضه فراش لي وطينه الحافي
مير ارجي اللي له براياه سجاد= ومن التجوا به ماعليهم اخلافي
وصلو على الهادي عدد رمل الانفاد= وعداد من حج وسعا عقب طافي

سطام الرويس اسمح لي على التنسيق
واشكرك على الانتقاء الجزل