أبو وافي العتيبي
سلام تسليمن يسد المواقيف = يضفي على العتبان ويا الجزيرة
أنا ترى معروف محتاج تعريف = لكن معجب لا يغير مسيرة
معجب العتيبي
يامرحبا بالجار والاخ والضيف=وياجعل في جيّة هل الخير خيره
يالشاعر المعروف توّ ابتدا الصيف=لاينتهي ونقول مارحت ديره
أبو وافي العتيبي
دام البقاء يامصرف الهرج تصريف = مثلك ترى نصف العرب تستشيره
أقول هات العلم فك المظــاريف = بيني وبينك يبض الوجه جيره
معجب العتيبي
الصدق مايحتاج يافلان تحريف=خلك عليه ولايجي فيك حيره
والحيل شد الحيا واحذر من الزيف=ودرب الخطا جنب عنه فالمسيره
أبو وافي العتيبي
الصدق سلمٍ للرجال العـواريف = والصقر يعرف يالولد من مطيره
أنا ركبت الخيل وبا أنقل السيف = قال المثل كلٍ يحكم ضميره
معجب العتيبي
دامك نويت تخاوي منير ومنيف=شد الحزام وسير في كل ديره
والله يجنبك الخطا والصواديف=ياطالبٍ دايم يشاور مديره