مصافحة الاولى ... ( مساجلـة) ... - الهيـــــــــــــلا *** منتدى قبيلة عتيبة

عنيد الفكر · 07-Jun-2008, 05:36 PM

السلام عليكم ورحمة الله وبــركاته

اضع بين ايديكم هذي المساجلــة بيني وبين الشاعر ( حمد الضحيان الاسعدي ) . والتي لم اجد لها مكاناً يليق بها الا هنا

والتي اتمنى ان تحوز على رضى الجميع
قصيدتي ( اشــكي ويشــكي )

يا الاسعدي في فيّها وين مامال= الطلحه اللي ظلها ما فختها
ياطول عرضه من مسافات واميال=جور الزمن كان ايتفيأ تحتها
اوراقها فوق الشواهيق تختال=روس الجبال النايفه ظللتها
شوقي لها من عام الاول ولا زال=ونفسي لك الله يا حمد قابلتها
مبدع وبدعك واضح بين الامثال=منك النجوم اللامعه يا بختها
استاذ تتعلم بك اجيال واجيال=يشهد عليها قولها بالسنتها
والصيد له حروه وجره ومدهال=ولا كل عين فالقنص ذيرتها
والقاف له قيمه وهيبه ومنزال=مثل الكواكب من يجي منزلتها
والحبل له ناقض وعاقد وفتال=والناس حتى البينه مالقتها
يسج فكرك مع محطات الارسال=وانا يشوش الراس من ذبذبتها
ولو كل دعوه جاتني رحت حفال=بيّنت سقف المعرفة لأعمدتها
ولولاي اداري صفقة الموج بالجال=واخشى عليها لا تزول بركتها
وارجي من الوالي اليا خيّل اخيال=لاصل مراعيها واحصد ثمرتها
اشوف لـه راعد وبارق وهمال=لو سال سيله فالفيافي سحتها
بين الرجا والياس يوم اشهب اللال=متميزه عن غيرها في صفتها
امحال مما حال والحاله احوال=من عجها كل الروا حاجبتها
اكبر وتكبر عندي آمال وآمال=ابعد قريب ابعادها قربتها
منك اتوقع هرجة الصدق تنقال=لو ان سيتها تغلب حسنتها
نارٍ سناها في الحشا يشعل اشعال=غربيّةٍ لا نسنست ولعتها
وش حيلة المفتون في سمح القبال=اشكي ويشكي ردفها خاصرتها
يافاتنه يا اغلى من الجاه والمال=يامن ظروف الوقت عني حدتها
تذبحني الذكرى واقّف عند الاطلال=ودموع عيني من ضماها روتها
وسود الغداري للذيابه والأبطال=ابطالها لأطلال لها خاتمتها
دوم العمر يبقى التحدي على البال=دام العذيـه باقيه في سعتها
وعديت من سهم المنايا للأجال=ليت العنا ما يجتمع فأخرتها

رد حمد الاسعدي
بعنوان ( قــراح الغيم )

ياحمود في وجه الفتى النور دلال=والشعر ديوان العرب وأمثلتها
منك البيوت اللي لفتني على آل=شوقتني لردودها واجوبتها
غنيتها موال واسرجت موال=يوم الموارد بالوفاء لحنتها
ياحمود للتفكير مخرج ومدخال=والريح لاهبت تدلك جهتها
ماكل ما يطري على البال ( ينقال)=والنــاس منطقها خزين افئدفتها
والشاردة ما جاوزت وزن مثقال=الا ليا حالت ودارت سنتها
وان دوجت بين الحنايا بزلزال=اهتزت ضلوعي لها وامهلتها
حتـى تطاوعني على كل منــوال=وأعلن حقيقتها على من بهتها
عساي ما ادور بالاطلال الابدال=( والطـلحة ) الخضراء وظل اورقتها
مأمونة الجانب ولو طال ما طال=اعروقها بجذورها ثبتتها
تثبت ولو جات الهبايب بالاهوال=من كثر ما تصفق بها وحدتها
فيها المشاعر تلتوي بي ولا سال=عن من تنقدها وعن من نعتها
تاقف لها شعلـة على روس الاقذال=هذي مراقيها وهذي سمتها
عشق وغلا وسيوف وعنان واجلال=كل الجوارح بالوفاء توجتها
تارد على عد الروا عقل وهبال=وتحول من دون الجواب اسئلتها
تشرب قراح الغيم من غير هطـال=ترقى لها وبروقها ترجمتها
مشوارها متعب ومنزال فــال=اصدور اهلها بالخلايا بنــتها
صادق مشاعر ما تملق ولا احتال=والذمه ادراها واصون امنعتها
ماني براجي غير ربي ولا ذال=عسى الرضى الخالق لروحي بختها
ولا عاد لي في ود سمحات الاقبال=ياكود ذكرى مهجتي ما محتها
ذكرٍىٍ تراودني ودايم على البال=لهاك العنود اللي بقت سالفتها
لعيونها بعيوني الوان واشــكال=قصايدي بحروفها بيّنتها
انهت ليا عنت على البال يامــال=يوم الليالي عن عيوني نحتها
راع الهوى ياحمود من حال في حال=تضحك له ايام الغلا بأولتها
بظلال ويدور عن ظلاله ظلال=وفي غفله ايامه تثور اغبرتها

صح لسان ابو ماجد وسلامتكم

آخر تعديل عنيد الفكر يوم 07-Jun-2008 في 05:42 PM.