المعتصم

[معجب العتيبي]

محمد صالح العطاوي

ياسلام الله سلامن فيه تقدير ومعزه=للرجال اللي علي وضحا النقا تمشي خطاها
قالو ان المعتصم ناوى يحرر دار غزه=والحقيقه علمها عند الولي محدن قراها

المعتصم بالله

مرحبا بك يا المسلم والبقا في كل حزه=في حلال انته وانا يا صاحبي ضمن نزلاها
دار غزة يا العطاوي من نواها روح عزه=دون غزة نثني الركبه ونردع من غزاها

محمد صالح العطاوي

دار غزه تمتلك عرض(ن)شريف(ن)ومتنزه=مار مانبغي كثير الناس تدخل في حماها
صاحبك مثل الجبل ما فيه مخلوقن يهزه=وانت راعي للعلوم اللي رفيعن مستواها

المعتصم بالله

لا يهمك يالعطاوي والعلم فيها نرزه=دونها جيشٍ مسلح دام عزه ويحماها
والنعم يابن العطاوي والكريم يدوم عزه=وكل رجالٍ حشيم بسيرته دوم يتباها

محمد صالح العطاوي

نارنا ماتنطفي واللي يجي فيها نكزه=من قديم الوقت ماتطفي وتحرق من وطاها
الكلام المشتبه يالمعتصم لالا تدزه=مشينا درب السنع لو صاحبي قام ايحداها

المعتصم بالله

الكلام المشتبه صاحبك لا يمكن يلزه=قلت لك كلمة نعم والظاهر انك ما تباها!!
يا محمد من يعزك يا ولد واجب تعزه=وكل كلمة يا وسيع المعرفة إعرف جزاها

محمد صالح العطاوي

العدو ياصحيبي في وسط عينه قوم طزه=لين يعرف فايدتها فالسلامه او عماها
الخبل يشوي الصقر هو يحسبنه فرخ وزه=وانت تعرف مقصد الكلمه وتدري بمغزاها

المعتصم بالله

ما نراعي للعيون اللي على الطيب تخزه=والرديه ما نتابع واحدٍ يمشي وراها
وانت للدرب الصحيح تشوف وبعينك تقزه=والحقيقه خافيه لكن لا تكشف غطاها

محمد صالح العطاوي

ماله الايحترق من فوق ناره قدر رزه=والليالي ياعميل الخير دايرتن رحاها
لا تحز الحبل يقطع ياعميلي لاتحزه =والبشر مافيه حي(ن)ياولد يدرك رضاها