من البارحة بالقلب هجس ٍ وتعبــار هجس ٍ وهاجوس ٍ تعاقب نكيفــــه - الهيـــــــــــــلا *** منتدى قبيلة عتيبة

الصقري · 22-May-2004, 03:35 PM

السلام عليكم ورحمة الله

((إهداء إلى أبناء الهيلا الكرام))

هذه قصيدة الفارس الشاعر مقحم بن فالح النجدي الصقري العنزي رحمه الله، وهي من قصائده القديمه ، وسميت بـ(الشيخه) عند صقور عنزة لقوتها وجزالتها وقالها بعد رجوعه من القصيم إلى ديار جماعته الصقور في (عقلة الصقور) بالحجاز، وهي أحدى الثلاثة قصائد والتي سميت لدى عموم عنزة بشيخات عنزة الثلاثه ، الأولى شيخة مشعان إبن هـذال، والثانيه شيخة مقحم الصقري، والثالثه شيخة الدسم السبيعي.

أما قصيدتنا هذه فقد قيلت قبل 200 سنه تقريبا. وهي مليئه بالفخر والحكم والنصائح .

[poet font="Simplified Arabic,5,black,normal,normal" bkcolor="transparent" bkimage="backgrounds/11.gif" border="none,4,gray" type=0 line=200% align=center use=ex length=0 char="" num="0,black" filter=""]
من البارحة بالقلب هجس ٍ وتعبــار = هجس ٍ وهاجوس ٍ تعاقب نكيفــــه

الصبر مفتاح الفرج هو والافكـار = من لاصبر تصبح حواله كسيفـــه

يالله يالمطلوب ياوال الاقـــــدار = انت الذي مدات جودك لطيفـــه

يالله يالمعبود عاون هل الكـار = تحل شدات عليهم كليفـــــه

اللي مجالسهم بها بن وبهــار = ونجر ٍ يصوت للمسير رجيفــــه

ومكارم ٍ للضيف عجلات وكبــار = ومفطحات في صحون نظيفــــه

تقليطهـم للضيـف قعـدان وبكـار = وحيل الغنـم وقـت السنيـن الحفيفـه

اكرام ضيف البيت حق وتعبــار = والكل منا يفتخر فيه ضيفـــــه

يا مزنةٍ غرّا من الوسم مبـــدار = اللي جذبني من بعيدٍ رفيفــــه

هلت من القبلـه هماليـل الأمطـار = من سيلهـا الـوادي غدالـه وحيفـه

تمطر من الهدرا اليا خشم سنـــار = وتسقي ديار محقبه والحتيفــــه

وتضفي على كل المفالي والاقطــار = وتصبح بها خدان ربعي مريفـــــه

عقب الحيا فاحت بها ريح الازهـــــار = وتعاقب النوار مثل القطيفـــــه

وترعا بها الغرا وتبني لها طــــــار = عقب الضعف راحت ردوم منيفــــــــه

اذوادنا مايرتعن دمنة الــدار = ولا يرعن الا بالفياض النظيفــــــه

يرعن بعبدالله وجبر ٍ وجبــــــار = خيالة يوم الملاقا عنيفــــــــه

ترعى بها الوضحا من الذود مـعـطـار = غبوقة الخطار عجلٍ عـــطـــيـــفـــه

يبني عليها بنية اللُّبْن لــــجــــدار = عـقـب الضعف راحت ردومٍ مــنــيــفـــه

اذوادنا يرعن بنا سر وجهــــار = من دونهن نروي الغلب والرديفـــه

ترعى بضف الغوش بقصاف الاعـمـار = تقطف زهر مرباعها مع مـصـيـفــه

ما هي سوالف مسرد ٍ عقب ما نـار = اللي هرب واطراف رمحه نظيفــــه

إن سوهجوا عنها قليلين الابــصار = من دونها نروي السيوف الرهــيــفــه

ان سوهجوا عنها معاميس الابصـار = حنـا نـرد اللـي يبيـهـا نكيـفـه

خطو الولد مثل البليهي اليا ثــار = زود ٍ على حمله نقل حمل أليفـه

بشدا هديب الشام شيّال الاقطــار = واليا كبر حمله تزاود زفيفـــه

وخطو الولد مثل النداوي اليا طــار = صيده من الجزلات ماهي ضعيفـه

ترجي العشا من مخلبه وقع وطيار = حسه على صيد الخلا له وحيفــه

وخطو الولد يصبر على موتة النــار = صفر على عود تضبه كتيفـــه

وخطو الولد يامال قصاف الاعمــار = لانافع ٍ نفسه ولا منه خيفــــــه

واليا بخصته ماسوى ربع دينــــار = مع العرب يشبه خطاة الهديفــه

حنا فريق ولا نغبي سنا النــار = ما ننزل الا بالديار المخيفــه

ودار ٍ به الحقران ماهي لنــــا دار = حتيش لو صارت خصاب مريفــــه

وحنا لك الله مـن بعيديـن الاخبـار = والنفس مـا نلحـق هواهـا حسيفـه

حلوين للصاحب وللخصـم قـهـار = وعدونـا لـو هـو بعـيـد نخيـفـه

حنا كما المشخص عن الصرف ما بــار = بالوزن يرجح والمصاري خفيفـــه

وتلقى منازلنا رفيعات واخيـــار = والرجل عن دوس القصاير حفيفـــه

لابد ما نسجلها تواريخ واذكــار = وتبقى لدسمين الشوارب وظـيـفــه

الا ومع ذلك لك الله لنا كـــار = عن جارنا ماقـط نـخـفـي الـــطـــريـفـــه

نرفا خمال الجار لو هو بنا بــــار = ونضحك حجاجه بالعلوم اللطيفــه

ولا نبدي الخافي لاصار ما صـار = وندمح خمال الجار لو بان حيفــه

ونرفا خماله رفيه العش بالغار = ونودع له النفس القويه ضعيفــه

والجار له قيمـة وحشمـة واعتبـار = وجارتنـا عـن كـل عايـز عفيفـه

ما زارهن من يبغـي الحيـف زوار = الا ولا عنـهـن نــدس الغريـفـه

نبيه إليا بدل الدار بديــار = وكل بجيرانه يعد الوصيفــــه

نكرم سبال الضيف حقٍ وتعْــبار = لا من ولد العفن شـح بــرغــــيفـه

أحد ٍ على جاره بختري ونـــوار = و احدٍ على جاره صفاتٍ محيفـه

وصلاة ربي عد ماخضر الاشجار = على الرسول اللـي علومـه شريفـه
[/poet]

وسلامتكم ..

الصقري