في العصور الماضيه وعندما كان التطاحن والقتل هما المسيطران .. كان لفارس القبيله دور مهم في الساحه وحضور قوي في قبيلته فكم من قبيلة عزت وسادت بفضل فارس واحد وكم من أخرى دالت دولتها بعد قتل فارسها وحل الحزن لديها مكان الفرح ...
ومع أن قتل الفارس يشكل حزنا بالغا لقبيلته وثلمة في جدارها الا أنه يمثل فرحا عارما للقبيله المعاديه تتغنى به على مر العصور .. يقول مبيريك التبيناوي مصورا هذا الوضع :
حريمنا لجن بزين الهلاهيــــــــل = توكدن من خبطة الحر لعقــــــــــــــاب
وحريمهم تصرخ صريخ المحاحيل=جاهن عليم(ن) مع هل الخيل ماطاب
وفي هذا السياق فقد سطر الشعراء على مر العصور مراثي خالده كتبت بشعور صادق مازالت تتناقلها الاجيال تلو الاجيال بل أن بعضها اصبح يسري مسرى الامثال .. تقول الخنساء في فقد أخيها صخراً :
يـذكـرني طلوع الشمس صخـراً=و أذكـره لكل مـغـيـب شمـسِ
ولولا كثرة البـاكـيـن حولــي=على إخـوانـهم لقتلـت نـفـسي
ولـكن لا أزال أرى عــجــولاً=وباكية تـنـوح لـيـومِ نــحسِ
أراها والها تبكـي أخـــاهــا=عـشيـة رِزئـه أو غـب أمــسِ
و ما يـبكون مثل أخـي ولكــن=أُعـزي الـنـفس عـنـه بالتأسي
فــلا واللـه لا أنـســاك حتى=أفارق مهجتـي ويُشـق رمســي
فـقـد ودعـت يـوم فراق صخرٍ=أبـي حسّـان لـذاتـي وأنســي
فيـالهفي علـيـه, ولهـف أمـي=أيصبح في الضريـح وفـيـه يمسـي
--------------------
والان بعد هذه المقدمة لنبدأ في الموضوع وأول مرثية هي مرثية سحلي بن سقيان .. شيخ السقايين من بني عون .. قالها في أخيه سحيل عندما قتل في وقعه بين الدويش والعمارات من عنزه ..
يقول :
أخوي ليته حي يذكر ولا مات = ليت الطروش اللي لفوا بشروا به
خوي من كسبه عشاير وخلفات = يقضي بها يوم المصاريف نوبه
أخوي نجره يسهر الليل مابات = قدام ربع سيروا وخضبوا به
وأخوي يقداله جموع صليبات = تشبع سراحين الخلافي دروبه
فكاك ربعه في نهار الملاقاة = وجلوبة اللي ماحصل له جلوبه
اليا ذكرته هلت العين عبرات = وفقده على قلبي غدا لي عقوبه
ونستمر مع رثاء الأخوان في أخوانهم فهذا شالح بن هدلان القحطاني يرثي أخيه الفديع .. الذي قتل في احدى المعارك التي كانت تدور رحاها بين قبيلتي قحطان وعتيبه .. يقول شالح :
أمس الضحي عديت روس الطويلات=وهيضت في راس الحَجَا ما طرا لِي
وتسابقت دمــوع عيني غزيرات =وصفقت بالكف اليمين الشمالي
وجريت من خافي المعاليق ونات =والقلب من بين الصناديق جَالي
واخــوي يم قَارَة خَفَا فَاتْ=من عاد عقبة بيستر خمالي؟!
ليته كِفاني سُوّ بقعا ولاَ مــات =وانا كفيته سُو قبرٍ هيـــالي
وليته مع الحييّن راعي الجمالات =وانا فداً له من غِبون الليالي
واخوي ياللي يوم الاخوان فلات =من خلْقِتِه ما قال ذالك وذا لي
تبكيه هجن تالي الليل عجلات =ترقب وعدها يوم غاب الهلالي
وتبكي على شوفه بِنيّ عفيفاتْ =من عقب فقده حر من الدلالي
عوْق العَدِيم إن جاء نهار المثيرات =والخيل من حسه يجيهن جفالي
ومع رثاء الأخوان كذلك … هذا هو ضيف الله بن تركي بن حميد .. يرثي أخاه عبيد الذي قتل من قبل قبيلة قحطان ثأرا لمقتل الفديع .. يقول ضيف الله :
ياونتي ونة كسير الجبارة =إليا وقف ما احتال وليا قعد ونّ
عليك يا شباب ضوّ المنارة =عليك ترفـــات الصبايا ينوحنْ
من عقب عبيد قلنا ودَاره =لاَ باكي عقبه ولا َ قايل منْ
تبكيك صفرٍ البسوها غَيَاره =تبكيك يوم ان السبايا يِعَـنّنْ
وتبكيك وضحٍ ربّعت بالزبارهْ =اليا قِزن من خــايع ما يردنْ
الخيل عقب عبيد ما به مناره =وش عاد لو راحن وش عاد لو جن
يا شيخ ما تامر عليهم بغاره =كود الجروح اللي على القلب يبرنّ
يقطع صِبِيّ ما ينادي بثاره =إليا أقبلن ذولي وذُوليك قـفـــنْ
ياهل الرمك كل يعسف مهاره =والمنع ما نطريه لاهُم ولاَ حــن
هذه قصيده قالها الشاعر (عواد بن شبيبه) رثاءً في مقتل الشيخ (ممدوح بن سطام آل شعلان ) من شيوخ الروله ... يقول :
ياعين كفي دمعتك يـــــــاقميــــحـــه = ماعاد لك من باقي السهر مصلوح
برق(ن) يلوح وشاق عيني لميــحــه =بخشوم غرّ(ن) بالسما بس له ضوح
عسى الحيا يسقي جناب السطيحه =يسقي شغايا وادي(ن) فيه "ممدوح"
شيخ الشيوخ اللي لربعه منيحـــــــه=ماهو من اللي شيخته بس للروح
مجرب كل(ن) سمع في مديحـــــــه =اللي لجمعات الطوابير ذابوح
مضاربه بأهل السبايا مـــبــــــيــحــه=من غالطه بالطيب غادي ومفضوح
عزي لمن مثلي همومه مشيحـــــه=وقلبه على سردال الأبطال مجروح
القلب عيّا لايطيع النصيحـــــــــــــــه=جاوبت قمري الحميم على النوح
ليتي حضرت السيخ .. وانطح نطيحه=أو ليتني مع ذبحة الشيخ مذبوح
وهذه مرثيه في الفارس بنيه بن قريميس الجربا .. قالتها أبنته عبطه :
البارحه عين المشقا جراله =سهر(ن) الى مابين الصبح وانجال
بالقلب صدع(ن) مايفود الدوا له =متجمله والله عليم(ن) بالاحوال
عليك ياستر العذارى دلاله =أوي والله ياهل الخيل خيال
"بنيه" بعيد العلم يسوا عداله =ياما صفقت يمناه من مال ورجال
الأشمل اللي ماضيات فعاله =زيزوم غلبا معدل الشيل لامال
ياما عطى من كل قبا سلاله =سباقت الغاره من الخيل مشوال
وياما نحا بالسيف من صعب قاله = ويما لطم من دونكم كل من عال
وياما شربتو من قهاوي دلاله =ووقت القسا يرخص لكم غالي المال
جمع حباله ثم لمه وشاله =وتنقطرت من كثر الاقفا والاقبال
تنقطرت ياحي هاك السلاله =بوجيه حمر المنتفت ماضي الافعال
هو الفقيده من عواني رجاله =صادوه بالحيلات في خندق الجال
أخسوا خسيتوا ماخذيتوا بداله = والا وقفتوا موقف(ن) يعجب البال
مااحد(ن) زرق رمحه ولا أحد ثناله =وماصار عنده عركة(ن) تشده البال
خلوه في قبره وحيد(ن) لحاله =مقابل(ن) بالهول قصر أبن شلال
واليا مضى لي عشرة(ن) من هلاله =تقل يضربني من الضيم سلال
مرثية شالح بن هدلان في أبنه الفارس ذيب من أشهر المراثي على الاطلاق وقل من لايسمع بها .. يقول شالح بعد مقتل أبنه :
يا ربعنا ياللي على الفطّر الشيب =عز الله أنه ضاع منكم وداعه
رحتوا على الطوعات مثل العياسيب =جيتوا وخليتوا لقلبي بضاعه
خليتوا النادر بدار الأجانيب =وضاقت بي الآفاق عقب إتساعه
تكدرن لي صافيات المشاريب =وبالعون شفت الذل عقب الشجاعه
يا ذيب أنا بوصيك لا تاكل الذيب =كم ليلة(ن) عشـّـاك عقب المجاعه
كم ليلة(ن) عشـّـاك حِرش العراقيب =وكم شيخ قوم(ن) كزته لك ذراعه
كفه بعدوانه شنيع المضاريب =ويسقي عدوه بالوغى سِم ساعه
ويضحك ليا صَكّت عليه المغاليب =ويلكد على جمع العدو باندفاعه
وبيته لجيرانه يشيّـد على الطيب =و للضيف يبني في طويل الرفاعه
جرحي عطيب ولا بقى لي مقاضيب =وأفخت حبل الوصل عقب إنقطاعه
كني بعد فقده بحامي اللواهيب =وكني غريب الدار مالي جماعه
من عقب ذيب الخيل عِرج (ن) مهاليب =ياهل الرمك ما عاد فيهن طماعه
قالوا تطيب وقلت : وش لون أبا طيب =وطلبت من عند الكريم الشفاعه
ثم أردفها بقصيدة على نفس الوزن والقافيه اذ قال :
ذيب(ن) عوى وأنا على صوته أجيب =ومن ونتي جضت ضواري سباعه
عز الله إني جاهل(ن) ما أعلم الغيب =والغيب يعلم به حفيظ الوداعه
يالله يا رزّاق عِكف المخاليب =يا محصي خلقه ببحره وقاعه
تفرج لمن صابه جروح(ن) معاطيب =وقلبه من اللوعات غادٍ ولاعه
إن ضاق صدري لذت فوق المصاليب =مانيب من يشمت فعايل ذراعه
صار السبب مني على منقع الطيب =ونجمي طِمَن بالقاع عقب إرتفاعه
يا طول ما هجيتهن معْ لواهيب =ولاني برادي كسرها من ضلاعه
ويا طول ما نوختها تصرخ النيب =وزن البيوت إللي كبار ٍ رباعه
وأضوي عليهم كنهم لي معازيب =إليا رمى زين الوسايد قناعه
أضوي عليهم واتخطى الأطانيب =وآخذ مهاويه الجمل باندفاعه
أبا أنذر إللي من ربوعي يبا الطيب =لا ياخذ إلاّ من بيوت الشجاعه
يجي ولدها مذرب كنـّـه الذيب =عِز لِبُوه وكل ما قال طاعه
وبنت الردي ياتي ولدها كما الهيب =غبنٍ لبُوه وفاشله بالجماعه
يا كبر زوله عند بيت المعازيب =متحرّي (ن) متى يقدّم متاعه
اعجبني فنقلته
« آخـــر الـــمـــشـــاركــــات »
13-Apr-2007, 12:53 AM
مراثي خالدة .. في فرسان الجزيرة العربية .
العرض العادي
