قصائد ابداعية للشعراء سفر الهيلوم و احمد الهيلوم في اجتماع قبيلة النفعه.

[عتيبي للابد]

بديت بأسم العظيم المعطي العافي .. لجل القريحه تصوغ القاف وتحوفه
قدام ارد التحيه واعلن اهدافي .. ابي اخترع للقوافي خط وبروفه
يقول من تل جيبه والشفق غافي .. يوم انشرح خاطره ببيات مصفوفه
عن كل عالي مقام وذرب وسنافي .. مفرجي بالوفا ماقل معروفه
سم درج في عروق الخصم وزعافي .. يبغى يسير فيافي نجد وكهوفه
ويوصل ازكى سلام بكل الاعرافي .. من هجرسة فكر للعتبان مصروفه
سلام يهل الوفا والمعدن الصافي .. تسليمة من بنات الفكر معزوفه
نبدي بها ونتعلا كل مشرافي .. ومنها نشاهد جميع الحفل ونشوفه
حفلة مزاين عتيبه درعنا الضافي .. العزوه اللي لها هيبه ومعروفه
قوم حماهم منيع وسهمهم وافي .. يشهد لهم نجد هيلا نجد وسيوفه
كم طوعوا من عنيد وعايل جافي .. وردوه عن مبتغاه وبينوا خوفه
وللضيف والجار ظل ومرتع دافي .. في ذيك الايام يوم الفقر وظروفه
واليوم في ظل حكم العدل ميقافي .. عقب انتفض ليث نجد ووحد صفوفه
حتى اصبح الضد جنب الضد ميلافي .. حقن دما المسلمين وحطهم جوفه
في وسط قلب سليم وصار متعافي .. في هجرة بالجهل والفقر مكنوفه
وصار لجهلها علاج وبلسم شافي .. جمع بها شمل شعب وصافح كفوفه
وعقب صقور الجزيره عدلهم كافي .. بصدورهم للجميع قلوب مكشوفه
امن ومحبه وحكم وعدل وانصافي .. والبيت كم وسعوا مبناه لضيوفه
وساد الامن واستتب لشعب مضيافي .. لين المواطن تمرجل وانطلق شوفه
وجا للمزاين مجال ولا به اسرافي .. بأسم القبايل وكل يكتب كشوفه
لجنه وتنظيم يسعد نظرة اللافي .. انجاز ممتاز لهل الطرش وصنوفه
لمن اشترى بالذهب زينات الاوصافي .. وإلا ورث عقب ابوه وزاد بولوفه
ياعزوتي مايقوم بحقكم قافي .. تعجز قوافيه لو غنيت وحروفه
واختامها ازكى سلام لكل الاطرافي .. للحفل ومنظمين الحفل وضيوفه


صح لسانك يا بو سلوم و سلمت على هذا الابداع
اخوك الدكتور سعد الهيلوم