قصيده سجين فغوانتناموا يحكي قصته فيها - الهيـــــــــــــلا *** منتدى قبيلة عتيبة

ابن كرشــــم · 15-Jul-2007, 10:34 AM

السلام عليكم ورحمة الله وبركاته
اما بعد:
يروي معتقلون في جوانتانامو معاناتهم في هذا المعتقل في مجموعة قصائد قاموا بتسليمها إلى

محاميهم وكتبوها في بعض الأحيان بمعجون الأسنان أو حفروها على أطباق فناجين بلاستيكية،

وستنشر في أغسطس المقبل في الولايات المتحدة.

**************************************

وهذه قصيده لابراهيم الربيش (ابو بارعه) مبكيه جداممن ورد اسمهم في الكتاب

مرت ثلاث سنين بأقصى السجون
وقلبي أنا يا ناس بالحيل مفتوق

مفتوق من فرقى سواد العيون
ناس لهم قلبي من الهم مخنوق

قلبي عليهم حن كل الحنين
قلبي لفرقاهم تعنى من الشوق

الشوق عذبني وهم عذبوني
وسهامهم خلت على قلبي فتوق

الحب ما يرحم ولو ارحموني
والهم طوقني مع الوقت تطويق

حب لهم عندي طويل الغصون
وأشجارهم لفت على قلبي عذوق

أَبيت أنا سهران فرد حزين
وقلبي بنار الحب والشوق مسلوق

يا ناس يا أهل الخير لو تدركوني
صبري نفد والنار حولي كما الطوق

ما نيب راعي فسقٍ راعي مجون
لكنها أمي لها القلب مسروق

أمي على فقدي تزيد الونين
والهم طوقها مع الوقت تطويق

أمي تحراني على كل حين
وترجيني آتيها ولو حلم توفيق

مرت ثلاث سنينِ هي تحتريني
كل يوم ترفع لي يديها على فوق

في قلبها نار عظيم الدخونِ
وكبده كما جمرٍ من الحر محروق

يوم إن كلٍ نام وأرخى الجفون
قامت تسح الدمع كالموج مصفوق

من دمعها تجري كبار السفينِ
وفي راسها طنب من الهم مطقوق

تدعي بدعوات وقلب حزين
يا الله تفريجك على كربتي تسوق

والي دعا كسبان ما هوب مغبون
لكن بعد صبر عظيم على الضيق

من بعد ما يلقى عسير السنين
ومن بعد ما يجرع من المر ويذوق

لعبت بي الذكرى على أمي الحنون
من ذكرها قلبي على الحبل مشنوق

قلبي ليا ذكرت يزيد الجنون
والشوق يدفعني ويرمين من فوق

يا سعد من ياكل من حوفها حنيني
وافداك لو ترسل لي حكاك مرقوق

وشاهيَّها ذاك المر بالحيل زين
ناكل عليه الكيك ونحلي الريق

ويا سعد من ياكل معه في صحين
وترمي عليه اللحم لو كان مذيوق

ويا سعد من يسمع لكبة اللبين
يمحاك ياوليدي وراك أنت مطفوق

ويا سعد من يسمع إلا يا جنيني
ويجاوب يسابق على الام تسبيق

يجي على سرعة ينط الحزون
ويلقاه بخوانه على الخير مسبوق

ويا سعد من تامر عليه الحنون
والي يوديها وهو يدخل السوق

وياليت من ريحة جلاله يجيني
تسلى عليه النفس لا شدها الشوق

ويكفين دعوات مع الساجدين
يسمع لها ربي ورحماته يسوق

لمي ترى قدر وماهو يهون
لا للي نسي امه تجيه المحاويق

ويدس خمسه بين تربه وطين
ويصبح من البلوى مع الضيق مطروق

لمي ترى بنفسي ومالي ودوني
افدي أنا امي ولو كنت في ضيق

أمي على راسي وهي نور عيني
وماطاة رجليها على جنتي فوق

يمه ودعتين من لا يخون
وأنا بحفظ الله لو كنت مسروق

يمه أنا لو كنت بأقصى السجون
ولو كنت في ضيق كما راس غرنوق

ربي هو الحافظ وربي يحميني
وما احد لرد السيل ان اقبل يطيق

يمه ترى ما يهم كان ويكون
وما من قدر ربي إذا حل تنسيق

وما ينجي من تقدري ربي حصون
ولا الغدر ينفع ولا يفيد تصفيق

الا الدعا سهمٍ عظيم حصين
لا بد ما ياصل ويحتاج تصديق

الا صدق من قال بليا ضنون
ترى جزى الوالد على الله من فوق

**************************

لاتنسوا اخواني ان تدعوا لهم بأن يعجل الله فرجهم

ويفك أسرهم وأن يصبرهم ويثبتهم .
والسلام خير ختام