ديوان الشاعر الكبير عبدالله بن نايف بن عون الرويس

[سعود النفيعي]

السلام عليكم ورحمة الله وبركاته

هذا موضوع فيه الكثير من قصايد الشاعر الكبير عبدالله بن نايف بن عون الرويس

(((قصيدة عبدالله بن عون ومجاراة سعد بن جدلان الاكلبي و محمد بن عباد السلولي لها )))

قصيدة عبدالله بن عون

شعتني علوم الصيف وارقلت للمسناد=ولاعاد يعـذل واحـد طافـح شبلـه
آبي عبلة ضافي عليها كما السجـاد=ديار يرود عدودها من يحـب ابلـه
ولاعاد لي من يوم سال الشفا مقعاد=عتيبي وداري فوق ونحيتـي قبلـه
مادامه وكد لي سيل وادي قليب عناد=انا ويش يحرمني شفا نجد والعبلـه
ابتبع هوى وضحا تحط البيد سنـاد=لها غير زين طبوعهـا خـدة قبلـه
ليا سمعت الحادي نده ندهة الميـراد=تقود اول الزعجول لول وتقرب لـه
ابيها ترفع فوق عن ساخن الانفـاد=وتجي في فياح كل مصلاح يطرب له
انا في الديار الطامنه في تعب وجهاد=على كثر مرعاها مداخيلهـا خبلـه
عساها يساقيها المطر ديرة الاجـواد=ولابيها لون ثمامهـا ينقلـب ربلـه

قصيدة سعد بن جدلان

شعتني قصيدة شاعر عـذ ّب القصـاد=ماحد يستلذ السالفه ليـن تنسـب لـه
علومك يا بو نايف قراح ٍ على الأكبـاد=لكن تجرح قلوب ٍ مع الوضـح منهبلـه
مواليف وضح ٍ كنها وضحى بن عبّـاد=لا شافها راعي الدبـش طيـرت شبلـه
تواغض مع الريضان كنها خيام أسيـاد=لونها بعيد ٍ بـادي الرجـم تقـرب لـه
أو حمّـى مغاتيـر ٍ مقاديمهـا شـراد=هريب السحاب اللـي تواليـه منسبلـه
قبلهـا ليـا مـن المنـاره سناهـا زاد=قبل الاشهب المرشوش لا فضوا اصطبله
عنقا مارق ٍ نسنوسها سدوهـا منقـاد=مع طـول خدتهـا خراطيمهـا سبلـه
شناح ٍ طفـوح شبلهـا دايـم ٍ خـدّاد=لونها مع ذود ابن عمـي خذيـت ابلـه
لا ضاقت براعيها الوسيعه بكـل بـلاد=يحوّم و كبده من هـل المـدن مندبلـه
لا منه نطحها عصر و لا هجد مهجـاد=ليا شافته قامـت تـرازم ترحـب لـه
هذي تنطحه تبغـى تقبّلـه جـد عمـاد=وهذي تنهب شماغه و هذيك تلعب لـه
و الله ما يهني من حكم عاصمة بغـداد=اللي له مزامير الفخر تضـرب الطبلـه

قصيدة محمد بن عبّاد

جذبني صدى صوت ٍ تلاحت به الأطواد=يتعّب هواة الشعر بعـده و مـن قبلـه
صدى صوت عرّافٍ لشعـر الأدب روّاد=منابع عيون الشعر و الكلمـه الذبلـه
تلاحوا على وضح ٍ عليها العيون حداد=ولوف ٍ على صوت الموده تراقـب لـه
دقاق العنـوق اللـي خراطيمهـا ورّاد=على حب راعيها شغـوف ٍ و منجبلـه
تقدم لها بن عون في وصفهـا نشّـاد=و شعا الأكلبي و الأكلبي تلنـي حبلـه
و انا قبل صوته ماشي ٍفي الطريق حياد=على ما تقول الناس كل ٍ علـى هبلـه
و بعد زعزع الوضحى فلا عاد لي صدّاد=سلولي و قلبي طاري الوضح يرغب له
ابتعب واحاول لو لحقني عنا و انكـاد=على منهج ًٍ ما كل قاف ٍ يناسـب لـه
و انا في هواها مغـرم ٍ هايـم ٍ منقـاد=لو اكثر علي اللوم فـي حبهـا الابلـه
اوقع لهـا بالعشـر واشهّـد الأشهـاد=انه لاعب ٍ بـي حبهـا لعبـة السبلـه

***************************

(((قصيدة احتفال اهالي الرياض )))
القا الشاعر عبدالله بن نايف بن عون هذه القصيدة امام خادم الحرمين الشريفين الملك عبدالله بن عبدالعزيز ال سعود في احتفال اهالي الرياض

مبداي بإسم اللي فرج عن هل الغار=اعوذ بـه والـوذ بـه واستخيـره
قـدام تدريـج المعانـي بالاشعـار=عن لا يجي عندي من الامر حيـره
حتى تجيني طوع من غير عسـار=وتنقاد لي قـود الجمـل بالمريـره
وعلقتها في رأس دواس الاخطـار=عبدالعزيز اللـي فعولـه شهيـره
يوم إن بركان الفتن بالوطـن ثـار=مافيه شبرٍ مـا اشتعلبـه سعيـره
ولا للجنايز بيـن الاشـرار قبـار=ولا به عشيره تتفق مـع عشيـره
حناشلٍ تاقـف علـى كـل معبـار=وتحـول الطرقـي وتأخـذ بعيـره
من شرق فاجاها على هجن ومهار=هجـنٍ هجاهيـجٍ وخيـلٍ مغيـره
فوق الجياد وفـوق نسـاع الازوار=داس الخطر واطلق حصار الاسيره
جاها صلاة الفجر والطير ما طـار=بكل ابلـجٍ بيديـه دلمـاً قصيـره
جوها مع الاسحار وخذوا لها الثار=وعقب العري لبست ثياب الستيـره
ويوم احتضنها المؤمن العادل البار=قامت لاخو نوره تغطـرف منيـره
حشيمةٍ مـا تقبـل الـذل والعـار=وبه من بعض خطّابهـا مستجيـره
وغدا لها عن كـل حجيّـر حجـار=وسعى لها بالنصـر والله نصيـره
واستامنت بحماه عـن كـل غـدار=وعن الشلل عالج عضاها الضريره
احدٍ الى جـا الـدار للـدار دمـار=واحدٍ الى جاء الدار شـاد تعميـره
والفيصلي للملكـة شـاد الاعمـار=حلحيل مـا سـوا سوايـاه غيـره
صميدعٍ جاها وهـي تلتهـب نـار=وارسى قواعدهـا بعـزم وبصيـره
وعلى يد المنصور توحيدها صـار=وظفى عليها الامن في كـل ديـره
شيخٍ على السنه نهج نهج الابـرار=وعلـى مخالفهـا يجـر الجريـره
عسى عضاه محرماتٍ علـى النـار=يوم ارتحل عنها ذخر لـه ذخيـره
وذخيرته رؤوس الميامين الاخيـار=علـى مسـار يكملـون المسيـره
وكل حكم له دور من خمسـة ادوار=وكلٍ عدل فـي دوره اللـي يديـره
واليوم واحـاتٍ مظاليـل وأنهـار=بفضل الولي ثم بالجهـود المنيـره
الدوله اللي تحتـرم جيـرة الجـار=يوم بعض الجيران يأكـل قصيـره
ما ساد الاستعمار فيهـا ولا جـار=ولا عاش فيها من بـذوره بذيـره
حره واهلها من على اولهم احـرار=في ظل شذرات السيوف الشطيـره
يوم ارتحل مسقى العدا كأس الامرار=فهد عسى الله من عذابـه يجيـره
راح وبقت معنـا حسانيـه تذكـار=وخلد لنا في قمـة المجـد سيـره
كم مر في عهده من احـداثٍ كبـار=وصارت كبايرهـا بعينـه صغيـره
اثقل على العدوان من ضلع سنجار=ولشعبه احلا مـن برايـد غديـره
واكمل مساره طيب الصيت والكـار=كشاف خصـات البيـوت الفقيـره
عبدالله اللي عاهد النافـع الضـار=الخيـر مـن يمـه لفانـا بشيـره
العدل نهجه والتواضع لـه شعـار=ونباه يجبـر لـه عظـامٍ كسيـره
على الفقارى مثل هتـاف الامطـار=وضافٍ على اوطان المحاويج خيره
وعنده لخصـات المقليـن منظـار=وجـزلات مداتـه عليهـم كثيـره
فأول بيانٍ لـه بنشـرات الاخبـار=قال البيان اللـي غمرنـا عبيـره
يقول مدونـي بالانصـاح والشـار=ومن الدعاء الصادق عطوني بريره
وحنا بنفحات التهجـد بالاسحـار=نطلب لـه التوفيـق فيمـا يديـره
وعضوده اللي فالمواجيب حضـار=سواعده عنـد إشتعـال الذخيـره
الساعد الايمن ليا صار مـا صـار=سلطان زيـزوم الدفـاع ووزيـره
سلطان ابو خالد له الـرأي ينـدار=ولي عهـدٍ لـه وأخـوه وشويـره
فالنايبـات مجهـزٍ كـل مـغـوار=النائـب الاول نـزيـه السـريـره
يقود جيشٍ للوطـن درع وستـار=يصد به عنـا الخطـوب الخطيـره
ونيابةٍ عني وعـن كـل مـن زار=حفل الرياض وبإسم سلمان اميـره
قدمت لـي معـذار ماهـو بمقـدار=والاّ حقوقك يابـو متعـب كبيـره
وصلوا على سيد البشر سر وجهار=ما طـوح الصقـار ملـوح طيـره

*****************************

(((الخـطـب مـو جـع ..و الإصـابـة كـبـيـرة مرثية في الملك فهد)))

خيّل سحاب العين وانـوى دريـره = اللي ظهر واللي على حـد مظهـار
من هول خطبٍ صاب شبه الجزيـره = ما فيه روحٍ ما شكت منه الاضـرار
الخطـب موجـع والإصابـة كبيـره = يوم انتهى المشوار بالوالـد البـار
يـا الله يلّـي مـا سجدنـا لغيـره = يا واحـدٍ بيديـه تحديـد الاعمـار
تجبر عزانـا فـي نزيـه السريـره = وتجبر عزاء الزوار من شتى الاقطار
وتبقي لشعبه مـن اخوانـه ذخيـره = صمود واستمرار واكمـال مشـوار
وتعين من عقبـه يقـود المسيـره = وينهج بدار الخير منهـاج الاخيـار
صرحٍ بـدا ببنـاه صقـر الجزيـره = وعقبه عمر مبناه بابنـاه الاحـرار
مرحوم يـا صـداد وجـه المغيـره = شراب فنجـال المواقـف اليـا دار
شيـخ تصـدر للخطـوب الخطيـره =عنا وجرع ضدنـا كـأس الامـرار
ومواقـفٍ عنـد الشدايـد كثـيـره = منها لبو فيصل دفاعه عـن الجـار
يوم الصباحي جت عليـه الكسيـره =ومخرب الجيره على جيرتـه جـار
قام الفهد مـن دون حلـت قصيـره =لين استعاد الدار مـن كـل غـدار
والدار مـا عـود بطـرق يسيـره = الا بعـد مـا صـادم النـار بالنـار
ويوم استعاد الدار عقـب تحريـره = قام الصباحي بالثنـا عبـر الأقمـار
وتبدلت هـاك الظـروف العسيـره = لاخوان مريم عقب الاعسار بايسـار
ومنها مواسـاة الشعـوب الفقيـره = غيثٍ على أوطان المحاويج مـدرار
وتوزيعة المصحف على كـل ديـره = للمسلمين اللي وراء زرق الابحـار
ومنها المشاريع الضخـام الشهيـره = مستشفيات وكـل مشـروع جبـار
امثـال توسعـة الحـرم وتعميـره = والجامعات اللي نهضهـا بالاعمـار
وعلى العقيدة والوطن فيـه غيـره = وان عدمة الارياء يعود لـه الشـار
واخوانه أصحاب العقـول المنيـره = غيّابهـم عنـد المواجيـب حضـار
صفوة ملوك الأرض مبـدأ وسيـره = وكبـار قـومٍ يستحقـون الاكـبـار
واهبهـم الله للعـروبـه بـريـره = وملجاً لمن حاطت به النـار والغـار
والحكم ما له غيرهـم مـن يديـره= ولا غيرهـم للـدار مـن ينـهـض الدار

************************************************** *******
يتبع&&&

[سعود النفيعي]

(((يا ماحلا لا ذعذعن الهفاهيف :: و قامت تناقرنا هبوب الصفاري)))

يا ماحـلا لا ذعذعـن الهفاهيـف=وقامت تناقرنا هبـوب الصفـاري
وهب البراد ودوّحت شوبة الصيف=واوحيت للمقناص والطير طـاري
واللي يبي شمة هبوب الشفاشيـف=قـام يتنبـى للبيـان الــوزاري
يدلى على حزم الجلاميـد وطريـف=خطايطـاً فيهـا عوايـن حبـاري
بعض العرب وده ولو جاه تكليـف=يسري ويصبح يم هـاك المحـاري
الناس يقضون الاجـازات بجنيـف=ونايف يمضّي رخصته بالصحـاري
صحراء العيون اليا غدت كلها ريف=عند الشـرك ولا عـلاوي جـداري
لامن عسّاسـه عطـاه التعاريـف=وامسى عن اللي في حراويـه داري
نادى بقرناساً اليا حيـف ماعيـف=فيه الحم الكدري وريشـة قمـاري
وجت للملامس وفيه ماقيل ياحيـف=مافيه عيب الا من الريـش عـاري
وتوابعاً مثـل الرمـاح المعاكيـف=وامواس مثل مسلـلات الشبـاري
طرح الشبك من نازحات المحاذيف=جابه حـدا العتبـان ولا المطـاري
اما ولد مطلـق ربيـع المهاجيـف=ولا السليس دحيم ذيـب الغـداري
جابـه لشيخـاً يرتكـي للتكاليـف=الله يجيره عن صـدوف الجـواري
شيخـاً تلحفنـا حسانيـه تلحيـف=ماهوب عن حق الخوي بمتـواري
شيخاً هواه لاحصل له على الكيـف=تعرض النسناس مـع كـل فـاري
ونقل الحـرار وهدهـا بالاطانيـف=امـا ضحـى ولا وروك الظهـاري
وليا كفخ حل العصيـر الطهيريـف=ربـداً مطيرهـا الرفيـق المبـاري
اوقف وتبعهـن طويـل الاطاريـف=حراً على بعـد المطاليـب ضـاري
الصافي اللي حاز حلو التواصيـف=لّحـاق عـزّام الحبـاري اجبـاري
واليا انزعج ظاقتبهـن المحاريـف=وتزبنن قـوع الشجـر والمـذاري
ومن عقب ماهن للعزامة مواليـف=قاموا عليهـن يظربـون البـواري
ومضواه في بيتاً كما نايف القيـف=في صفح نزواً عايفتهـا الـذواري
اليا شيدوه اللي لبنيـه معاسيـف=وحطوا مشب النار بيـن القـواري
ناراً حطبهـا يشتـرى بالتجازيـف=عمـال ماتلحـق عليـه اللـواري
نـاراً يصاليـهـا دلالاً مهـاديـف=صهباً وصلوا النار فيهـن مـواري
صهباً عليها الجور مامنه تخفيـف=زاماً لهـا ليلـي وزامـاً نهـاري
صفراً خنين بهارهن من ورى الليف=يطرد عماس اللي من البعد سـاري
اليا درجوهن وادرجـن العجاريـف=وكل أفلجً بفعـول طيـره يمـاري
اقفن هواجيس الظمايـر مناكيـف=والطير عن راعيه شال الطـواري
مع ظف اخو نورة بعيد الاشاويـف=شيخاً بوسع الخلق مالـه مجـاري
ولاني بفاخـر وتفاخـر بتزييـف=الا..ولاالبس من ثيـاب العـواري
افخر بحكامن حموا نجـد بالسيـف=والشعب اشادوا مستواه الحظـاري
وافخر بقرب اللي بعيداً عن الحيف=شيخـاً بعدلـه بيننلـه شــواري
ومدحه ماهوب خراط ولاتواهيـف=عن عرف والكـاذب لعلـه نيـاري

*************************
(((مدح في سطام بن نايف بن عو ن يرحمه الله)))

ياهل الجيوب الساريـة دوروا لـي=خطاً يوقف بي علـى بيـت سطـام
ماوالله استانـس اذا ضـاق جولـي=الا اليا جالـه علـى النـار همهـام
اليا قام نجره يزعج الصوت حولـي=واحيا السمر بألحاق الابرام الابـرام
لـو هـو يذكرنـي قديـم الفعولـي=اللي غدت مثل الهـذاري والاحـلام
فعول الرجال اللي تشيـل الحمولـي=نطّاحت الكايـد مفاريـس الاخصـام
وليا ذكرت افعـال هـاك الزحولـي=ربعاً تقافت دونهـم جـرد الاعـوام
اخـذ شـوي مغيبـن فـي ذهولـي=يعرض لي الماضي كما عرض الافلام
بأطياف ذكرى في خيالـي تجولـي=تطوفبي بيـن الحقايـق والاوهـام
دنيـاً تـزول وماعليهـا يـزولـي=الباقي الله وأفضـل الخلـق مـادام
ياحيـف ياتفريقـهـا للشمـولـي=تنشـر بيارقهـا علـى كـل مقـدام
وتاطا كبار الجـاه وطـي النعولـي=لين القضا فيهـم غرسنابـه السـام
هـذي منازلهـم خلـيـاً تهـولـي=ترثالهـا فـي هـاك الايـام الايـام
بلاقعـاً شهـبً خلـيـاً محـولـي=تبنيبها هـوج الدواليـب الاسـوام
عقب الجهام وعقب هـاك النزولـي=تقـول محـدن حـل فيهـا ولاقـام
طرفي بدمعه يـوم اجيهـا همولـي=تقـرب محاظيبـي ولانـي بمـلام
اذكر طربها قبـل عشريـن حولـي=قـدام تزلـف هـاك الايـام قــدام
ولو صرت من غارات سلمى زعولي=اللي علـي العقـل تنفيـذ الاحكـام
واعـزي الخاطـر بربعـاً بقـولـي=هم نور عيني في غطاليس الاظـلام
لـولا الاسـود معقبيـن الشبولـي=عندي تغلّق مصـدر الانـس بلحـام
لاجيتهم عقب البطـى يسّـروا لـي=توسيع بال وضيـع الهـم الاكـرام

************************

[سعود النفيعي]

(((مراسله بين الشاعرين الكبيرين عبدالرحمن العطاوي و عبدالله بن عو ن)))
قصيدة العطاوي

مبروك ياعبدالله البيت هـولان=ومبروكـةً قيمـاه لابوعجاريـد
عطية اللي ماحسب طول الاثمان=قربلك اللي دونهم نـازح البيـد
اللي ورى سلمى قصيراً للبرزان=بينك وبينه يطّرد شاسع الريـد

رد عبدالله بن عون

يامن هتف لي باالتباريـك فرحـان=واظهر خفايـا خاطـره بالاناشيـد
واحيا هشيماً مات من خمسة ازمان=واطلق مساجين الظميـر المقاييـد
ان دار فكـري للتعابيـر طـربـان=اللي لها فـي ذكـر نايـف تماديـد
امسيت الساوم في زمـرد ومرجـان=طرباً ولاهاجـوس الاشعـار ببعيـد
وقطفت من حلـو التعابيـر مـازان=قطف الثمر مـن يانعـات العناقيـد
غرايباً يصـدع صداهـا بالاذهـان=صخايـراً ماتنقـضـب للرعـاديـد
ماطاعاً الا عقب شكمـاً بالارسـان=ولاراعاً الا عقـب طـول المطاريـد
بنـات فكـراً للتعابيـر نشـطـان=اشبـاب ماظريـاً بلهـج المفاريـد
تخازراً وسـط الظمايـر بالاعيـان=ومن المواقف هاماً الر يـد بسعيـد
وضحاً على درب الطفوح ام الادشان=اللي تخيرها العطـاوي مـن العيـد
عوباً تكف العوب سلسـات الاذران=كسّابـة الاول مــرار وتـراديـد
تاطى على خفـاً وتنهـظ بجنحـان=وتطوي رهاريه الحمـاذ الجراهيـد
صلفى وانا من طول مسراي صلفان=ومن التلف عادل سـواة المعاويـد
وتلحفن غـرز القرايـح بالاكفـان=وهاج الجليد وجمد البحـر تجميـد
يامن فتـح فكـره للامثـال بيبـان=وفي مدح نايف خلد الشعـر تخليـد
دايـم وبيتـك يابونـواف ملـيـان=في مسنـداً فيـه القرايـح مسانيـد
اثنيت له بالفضل فـي كـل ميـدان=وخصصّت له شعرك حميداً وتمجيـد
المـدح لـو مالـه مقـراً وميـدان=ماصار بالممشى هميماً ولـو جيـد
ومدحـه يـزاود للقوافـي والاوزان=سمحـاً طليقـاً مايجيبـه عواقيـد
نايف ذرى الشعب السعودي اليا شان=وجه الضديد اللي جروحـه ملاهيـد
شيخـاً تهويـه المدايـح علشـان=مافيه عن نطح المواجيـب تصديـد
وان صار بالاريا سمينـاً وهريـان=يوجد سمين الـراي عنـده بتاكيـد
وهو غيثنا اللي للمحاويـج مزبـان=ظافـي عطـاه يبـدد الهـم تبديـد
نفحات جوهده بالمكارم والاحسـان=محـدن يعـد اجوازهـن والتفاريـد
والله لو يملك مـن المـال وديـان=لينفذنّـه بيـض ايـاديـه تنفـيـد
قلته وانا عزمي عن المـدح ونيـان=ماودي انقص في العبارة ولا ازيـد
والله لو امدح بالضحـى والمسيـان=ما الحق لطيبـه بالمدايـح تحاديـد
وختامها ماغاب نجمـاً ومـا بـان=يسلم كريم الخيل معطي المقاصيـد

***************************
((( مراسله بين الشاعرين الكبيرين عبدالله بن عون ومحمد الخس المطيري)))

قصيدة الشاعر الكبير عبد الله بن عون

تفتحت بيبـان قلبـي بعـد حـول=كف العـذل يـا عاذليـن معـذولا
ياصاح كثر العذل واللـوم مملـول=ما يسمع المغـرم نصائـح جهـولا
وكلن على طبعه من الناس مجبول=والفرق واضـح بيـن ذولا وذولا
أنا شريد الفكـر والحـال منحـول=سليم ٍ جسـم فـي ثيـاب معلـولا
دايم زعول ومني الفكـر مذهـول=ارا الجلد وحصون صبري صمولا
ياصاح اخذ مني عن الحال مدلـول=شي ٍ لجا في ضيق جولي يجـولا
راحات قلبي ما تجي لي على النول=حتى ولا من طيف خلـي رسـولا
راعي جديل فوق الامتان مجـدول=دلال شيـخ فـوق ورك الـذلـولا
العام جرحي من هوا البال مكتـول=واليـوم عينـي تفضحـه بمهلـولا
ما اشوف غير مجمل الحفل مجمول=في خاطري عن كل حـيٍ يحـولا
ليا ضحك باللي كما صافي اللـول=بيـن الشفايـا والكـلام معسـولا
تخالهن وادٍ مـن الوسـم مسيـول=ريضان قلبي عقب ماهـي محـولا
ولو ناشني من فيض حسناه هملول=يخضر قلـبٍ مـن فـواده جفـولا
عزاه يا محمد عن الوصل مشكـول=لاهنت شفلـي يالمجـرب حلـولا
يابو خلف شف لي من الراي مفتول=قـدام لايقـف القمـر بـالأفـولا
ان ما تهيت منك الافـراج بحلـول=عقب النهر مـا ينـورد للدحـولا

رد الشاعرالكبير محمد بن خلف الخس المطيري

البارحه جفني جفا يابـن هدمـول=لذ الكرا وش حيلتـك وش تقـولا
ليا قلت وش رايك ترا ما بها زعول=الراي دايم بـه صعـود ونـزولا
ليا صار فكري يم ابن عون مشغول=هاك القبال اللي عسى مـا يـزولا
انا اصله من فوق من تقطع الكـول=والا اتصـل بـه هاتفـي عجـولا
حيث ان ابو نايف له الحق مدبـول=فيمـا ملكـت ومـا يدينـي تنـولا
راع الجواب اللي من الفكر معدول=مافيـه مـا ينقـال لـولا ولـولا
كنه من الواحد وعشريـن مزلـول=بيديـن فنـيٍ يـسـوي شـكـولا
ياصيرف الجوهر تغزلـك مقبـول=جعلـك لمطلوبـك مـن الله تنـولا
شعاك طفل غض مجمول مدلـول=اللـي بنغماتـه غنـوجٍ خـجـولا
عجاب لعاب بالاوصـاف مكمـول=مرن معك راضي و مرن زعـولا
مثله يخلي طيـب الفكـر بهلـول=من فقد عجاب المـزوح الدجـولا
قبلك سميك قال يا احول يا احـول=خـذن قلبـه زاهيـات الحجـولا
ما فيه قلبٍ عن هوا البيض معزول=يا ابن الرجـال الطيبيـن الفحـولا
اللي لهم في نجد تاريـخ وفعـول=يـوم القبايـل تفتخـر بالفـعـولا
ان كان قلبك من عراويـه منتـول=ياما ويامـا شـال قلبـك حمـولا
احمول حب اللي غذاهن من الشول=بيض العواتـق عايـزات الدلـولا
اللي ليا مرن وانا القـاع ماهـول=غضن وفي عيونهـن تقـل حـولا
وانا تراي مبيـدن هجـن ونعـول=مع دربهن يوم اسطفـاق النـزولا
هذا الصحيح وبيننا الشـك مزيـول=ياللـي فـوادك للمـوده مـيـولا
ان كان خلك واقف دونـه شمـول=شمول تقول ابعـد وحنـا بـه اولا
محجرين ودونه السيـف مسلـول=والعين دون مغيزل العيـن شـولا
وانته على حسن النبا ضايق الجول=والبـاب دونـه مغلـق بالقـفـولا
عليك باللي من زبنهم مشـا طـول=حكـام نجـد مطوعيـن العـيـولا
ان كان قاموا فيه صاحبك مكفـول=ما والله اذكر غيـر هـذا حلـولا
ماهوب وقت مصافق خيول بخيول=اليـوم حكـام ٍ وححـمٍ عــدولا

&&&&&&&&&&
&&&يتبع

[سعود النفيعي]

((( مراسله بين الشاعرين الكبيرين عبدالله بن عون و غازي بن عو ن)))
قصيدة عبدالله

هلا باللي نعش روحي بصوتـه=وهو شوفه غذا روحـي وقوتـه
تفرقنـا واحسبـنـه نسـانـي=وصدت بي وقوتي عـن وقوتـه
وبعـد ماكـان مندثـراً هوانـا=زهم واحيا غرامي عقب موتـه
وهذي عادة(ن) في كـل وافـي=فرص حبل المواصـل ماتفوتـه
وانا قبله عن العشـق متراجـع=مهب عياف خوف(ن) من شموته
وهو صار السبب في رجعتي له=نده قلبي وجاوب لـه صموتـه
لاجل عينيك يامشعـل غرامـي=رهيـن الحـب ومعمـر بيوتـه
مادامك رافعاً صـرح الصداقـه=فـانا حق(ن) علي ادعم ثبوتـه
واعمـر لـك مقاصيـر بقلبـي=واغطيهـا بعـش العنكبـوتـه

رد غازي

يعيش اللي بعد طول سكوتـه=عبر فوق المحيـط بجيلبوتـه
جمع ماسـه ومرجانـه ودره=وغير ماحصله غيـر حوتـه
ومن حاول يجاري صيد فكـره=يبي يحفي على دربه سبوتـه
جزا الله خير من هيج غرامـه=بدعوى العشق طرش له كروته
وخـلاه يتغـزل فـي جزالـه=وياصف لوعته باوراق نوتـه
بيوت(ن) ذوقها لسامع احلـى=من السكر ومن تمـر النبوتـه
ونظم الصعب منها عنده اسهل=نخزه للقلم من جيـب كوتـه
نبي ياخو سعد نسمـع ونقـرا=غداريق(ن) من العام مغموتـه
محيط الشعر ينقص لاهجرتـه=ولو زرته غمر موجه خبوتـه

ردعبدالله

لقيت الشعر ماتضعف بتوتـه=مع اللي فاهم(ن) متره وفوته
الا يا ليت كلن مثـل غـازي=يريح البال يوم اسمع بيوتـه
اليا حاول يجاري له قريحـه=مشت له طوع ماهيب معفوته
ودرّت له قوافيهـا البخيلـه=اليا رام البحر ريّـم خفوتـه
ورى بعض العرب شعره مغثّه=تشوته عنـك ولا ماتشوتـه
لو انه موتر(ن) جاك متحادي=تناضح فوق هوباته زيوتـه
مـاركـت وارد عـــراوي=طمع راعيه ثم جارا فروتـه
الا ياليت للشعـر اشتشـاري=يصونه قبل يفدعبه طفوتـه
متى ماشاف له قطاع ساقـه=يفك الناس من عصده ولوته

رد غازي

بيوت(ن) قلتهـا عـدة بيوتـه=بهـا كـل المذاخيـر محتوتـه
هقيت اني حكمت وصار حكمي=من خمسيـن ابوزيـد وبلوتـه
وهقيت اني بدعت وصار بدعه=بيار بالصفا الصـم مخروتـه
عيون الشعر شامت لبونايـف=كما شامت لبن سعدون نوتـه
اله فن(ن) فريد مفارق(ن) لـه=الي جامـع(ن) ثومـه وتوتـه
هذاك اللي جت مـع القريحـه=سرى فوق اللحن يظرب طشوته
وشعره حادر(ن) له بطن وادي=مثل عمايـت الرفـل معموتـه
سوات اللي يحاول فـي دواهـا=ويعمـي عينهـا بالعنزروتـه

يتبع&&&&&&&&&&&

[سعود النفيعي]

(((ياسعود كان انك تهدد على النوح :: تعال انا ويـّاك ننعـا هـنـيّـا)))

ياسعود كان انك تهدد علـى النـوح=تعـال انـا ويّــاك ننـعـا هنـيّـا
تعال انا ويـاك ناخـذ عـن الـروح=عطنـي وانـا بعطيـك ممـا تهيّـا
صبري وصبرك عقب فرّاج مشحـوح=ماعـاد فيهـا يـا البناخـي كنـيّـا
ون كان صوتك شح والصوت مبحبوح=خـل انهتانـك بالخفـايـا خفـيّـا
اون واتبـع ونـة الصـدر بفحـوح=ولافرّجة مـن ضيقـت البـال شيّـا
ياطيري الليا ابـرق الريـش ذابـوح=مبعد على راس راعيه صبح وعشيّـا
تعرضّه يـوم اظلـم اليـل سامـوح=وعليـه ماسيـت الفجيعـه مسـيّـا
جيته علـى جثـة احبـاراه مذبـوح=وامسـت همومـي داهيتنـي دهيّـا
و اصبحت انا عن نقلة الطير مصفوح=ماعاد اللي فـي نقـل غيـره شهيّـا
ماراح جعلـه مايعـود علـى اللـوح=ولا عسـاه اليـا رجـع مـا يحيّـا
ليت النقيصه في الرواقي ومجـروح=وفـي كـل كابـوداً سـواة الحديّـا
وليته غدا وارجيه مع كـل طـاروح=فـي المقبلـه يمـلابـه الله يـديّـا
لو هو غدا ياسعود ماحسـفّ الـروح=بـس الحسوفـه ميتتـه هاالسويّـا
وفرّاج مشروهه علـى كـل ممـدوح=ياخـذ قضـاه اللـي براسـه حميّـا

*************************

انا غرب واللي خاطري ينتحيلـه شـرق=بعيداً وطن مظنون عيني عـن اوطانـي
حصل في غروب الشمس بيني وبينه فرق=عسى الله يقرب دار مـن حبـه اشقانـي
اليا جا لذيذ النوم يسرق عيونـي سـرق=ذكرته بعيـد وعافـت النـوم الاعيانـي
الا يالله انـك لاتجـازي حمـام الـورق=وراه يتلاحـى بالطـرب ليـن يشعانـي
قام يتلاحـى وشعانـي بحلـو الطـرق=ومن الولف اظنه جاين الـورق ماجانـي
من اربع سنين ومهجة الروح فيها حرق=نتيجـة نـدب عينـاً سهمهـا تمثنانـي
وساع العيون الساحريـة طعنهـن زرق=لها نظرةً مـن صابتـه طـاح وجعانـي
سقا الله اليا قام يتكاشـف علـي البـرق=وانا اشوف زولة بيـن ربعـي وخلانـي
تفتح لعيني يوم اشوفه وسـاع الطـرق=وانا قبل اشوفة مثـل يعقـوب عميانـي
تهشم نظيرة من هميل الدمـوع الـزرق=وعمي لين جابوله قميص ابنـه الثانـي

يافر قلبي فرير ملوع الكدري = موح ٍ تعاوي نميليٍ قصر دونه
جلع وشاف خلويٍ جاه من حدري = وقام يتصافق بروس الريش ومتونه
على وليفٍ بشوفه ينشرح صدري = لا شك دونه مقاريدٍ يلدونه
عليه حالي تخله شوكة السدري = من يوم شفته وروحي فيه مقرونه
يازين جرحك سطابي وأنت ماتدري = في داخلي الحشاء متعظمٍ كونه
إرحم قتيل العيون وطرفك الخدري = صبٍ يبي منكم الرحمه وتجفونه
ترى لذايذ عرابين الهوى بدري = إليا قوى العود نبت الشوك بغصونه

تحياتي للجميع

[ابوبجاد الرويس]

السلام عليكم ورحمه الله وبركاته

مشكور اخوي سعود النفيعي والله لا يهينك

وبيض الله وجهك على جهودك الرائعه

لك مني احلى تحيه

[إبن شهيل]

جهد تشكر عليه ,,,

[صقارنجد]

سعود النفيعي

والله ماقصرت ومجهود تشكر

يعطيك العافيه

[هلال الدوادمي]

سعود النفيعي بيض الله وجهك وماقصرت على

الابدااااااااااااااااااع ........
وتنقية القصااااااااائد......

[محمد العتيبي]

تم تنسيق الديوان كاملا ..

مع الشكر الجزيل للأخ الرائع / سعود النفيعي ..

تحيتي
..

التوقيع

للتواصل عبر twitter تويتر al_bargawy@