حمد السعيد والطير والطلح قصيدة رائعة أعجبتني

[ابن عيدة]

السلام عليكم ورحمة الله وبركاته

حبيت انقل لكم هذي القصيده للشاعر حمد السعيد

بينه وبين شجرة ((الطلح)) التي يسئلهاا عن طيره

اتمنى انهاا تعجبكم ......


قال الشاعر


يالطلح مامرك مع الصبح صافـي
طيرٍ غدا لي امس والشمس حيه
اتلى العهد به راح يطرد مقافـي
خبري به اوما في جناحه هنيـه


.
.
(ورد الطلح)
.
.

لاوالله الا مرنـا العصـر وافـي
كنـه غـلامٍ مستغيـر بهـيـه
اقبل علينا ثـم اخـذ بانحرافـي
يوم الحباري وقعـن لـه سويـه

.
.
(قال الشاعر)
.
.

يالطلح قل لي عل مابـه خلافـي
البارحـه بـرد وشمـالٍ قويـه
كانه تعشى قلـت علـه عوافـي
والحي يجمعه الولي مـع خويـه

.
.
(ورد الطلح)
.
.

لاوالله الا صـاد خـرب متعافـي
واخذ عليه من الثنـادي شويـه
لامفلـسٍ مـره ولاقـال كافـي
يوم اخلفنه عـن عشـاه حقبيـه

.
.
(قال الشاعر)
.
.

خابـره والله قاطـعٍ مايخـافـي
دايم على الصيده تجي له حميـه
انشدك باللي منبتـك بالسوافـي
عساه فـي خيـرٍ ولافيـه سيـه

.
.
(رد الطلـح)
.
.

خبري به اقشر في سبوقه خلافي
مابه بلا وامرح على هالحصيـه
والفجر شخّص بالنواظر وشافـي
طلعـه بعيـد ويمتـه ساحلـيـه

.
.
(قال الشاعر)
.
.

يالطلح ذا حبـه ولاهـو بخافـي
متعـادلٍ حبـه بحـب البنـيـه
بعض الطيور ان راح قلنا عوافي
لاشك هـذا ويـن ابلقـى حليـه

.
.
(رد الطلـح)
.
.

اتعب عليه وعادت الحـر يافـي
اضرب سهلها والوعر والشغيـه
يجيبـه اللـي رازقٍ هالعجافـي
بهايمٍ تمشـي علـى غيـر نيـه


.
.
(قال الشاعر)
.
.

يالطلح لك مني يابو غصن ضافي
لاجابـه الله وكـل نيـه مطيـه
لاجيك انا في موتر القش هافـي
واسقيك هاللـي باقـي بتانكيـه
وآطا على رملة سوافيـك حافـي
وكلٍ على ماقيـل يذكـر خويـه