حبيـــت أنقــل لكــم هــذه المجــاراه التي بين الشـاعريــن الكبيريـن
عبدالله بن عــون الرويــس العتيبي و كـديميــس بــن صـالــح العصيــمي
قال عبدالله بن عون
انـا قلبـي عليـه الحـب لا طــي=وصواب الحب في اقصى القلب ساطي
تمكـن حـب خلـي مـن ضميـري=فتق في الجوف فتـق ٍ مـا يخاطـي
ولا بينـت مـابـي لـيـن حـبـه=بشع بالقلـب واحـدث بـه نفاطـي
شعانـي جـادل ٍ لا عـاد عـرفـه=سقـط حبـه علـى قلبـي سقاطـي
خيالـه مايفـارق عــن عيـونـي=علـى طـول المغيبـه والتبـاطـي
ولالانـي مستحـي ناديـت باسمـه=بوسـط الماقفـه كانـي شـراطـي
ومـن جانـي يقـول انتـه علامـك=اقول افـزع لمـن كثـر اختباطـي
ترى الفزعـه لهـا بالطيـب ساعـه=لـو البـارود غـادن لـه شياطـي
انـا محتاجـكـم يـاهـل الحمـيـا=على درب الزرج عن كـل خاطـي
ترانـي ماتـذوق الـنـوم عيـنـي=لامن الصبـح يبـدي لـه شعاطـي
ليـا مـن المعافـا طـاب نـومـه=لذيـذ النـوم فـي عينـي سماطـي
اصـارع هاجـسـي ماعـنـدي الا=ثـلاث دلا ل يـشـدن البطـاطـي
مدابيـح ٍ علـى جــال المـنـاره=خنيـن الهيـل فيهـن لـه عياطـي
ثــلاث ٍثالثتـهـن دون مـنـهـن=صهدهـن كانهـا غرنـوق شاطـي
انـا يصلانـي الهـاجـس عليـهـا=وهي تصلى علـى جمـر الاراطـي
صـلاهـا قهـوجـيـن مـاتـوانـا=يسهرهـا لايـا نــام السبـاطـي
ليـاقـدم لــي الفنـجـان منـهـا=تجـلـى خـاطـري بالانبسـاطـي
وخليـت القـلـم يــذرف مــداده=علـى صفحـات الاوراق القشاطـي
باهازيـج ٍ تونـس مــن قـراهـا=مـن الاثمـار القطـهـن لقـاطـي
اقطف مازهـى لـي مـن ثمـرهـا=واخلـي مايطيـح مـن البطـاطـي
عسى اللي يلحق العاشـق مـلا مـه=مـن اللـي صابنـي ياطـاه واطـي
علشانـه يعـرف قــدر المحـبـه=ولا عـاد يتـمـادى فالاغـلاطـي
وعساه ان ماعـذر عقـب التجـارب=تصيبه في الجسـد حمـى رهاطـي
مجاراة الشاعر\ كديميس بن صالح العصيمي
انا مااكشـف صناديـق ٍمغاطـي=وانا ادري ان الغطى وراه غاطي
ولاني بعتـرض رجـل ٍمجنـب=ولا استعرض نشاطه مع نشاطـي
ولو صرت افتهم نضـم القوافـي=نشاطي مايـزود عـن انظباطـي
لكن ليا عـرض بعـض النـوادر=مثل ماقيـل فـي جمر الأراطـي
جذبني مستـوى بيـت القصيـده=ولا قصـدي تحـدي واعتباطـي
انـا احـب المعاميـل القديـمـه=الـي معهـن علاقـه وارتباطـي
اذا كانت على خمسـة عناصـر=هذا غايـة مرامـي واشتراطـي
علـى البـن اليمانـي والعويـدي=وعلى الهيل المعلـب بالشناطـي
وزباد وزعفـران ٍمـن سمطـرا=وبعده العود في المدخـن يعاطـي
ولا قصـدي هواجيـس الـمـوده=ولا شاعفنـي الحـب الحشاطـي
مجال اهل الهـوى مالـي ومالـه=ولا لي فـي بضايعهـم تعاطـي
ماعـاذ الله يجذبـنـي هـوايـه=ليـا الخلـوه وحـب الاختلاطـي
انا قد قـال لـي رجـل ٍمجـرب=يغوص البحر ويطوف الشواطـي
يقول انـه تعـرض لـه مشاكـل=مع البيـض العماهيـج النشاطـي
يحطـن العسـل فـوق الزمـرد=مع السحر الحلال مـع المشاطـي
ويقول المكـر فيهـن والخديعـه=ورصدت لمكرهن كـل احتياطـي
وغدن بمكسبي مـع راس مالـي=وخذن من تحت رجليني بساطـي
عقـب ماكـنـت ادور للفـوايـد=رجعت اجلس على رقط البلاطـي
يقول ان الهـوى بيـت ٍمزبـرق=وسيع ولا علـى بابـه ارباطـي
مـقـر ٍللهمــوم وللحسـايـف=وبسؤ الظـن والغيبـه مُحاطـي
ويقول اهل الهـوى فيهـم طبايـع=وبحرهم بيـن مـده وانسفاطـي
بعضهـم يعتلـي روس المبـادي=اله في مستـوى القمـه مواطـي
ليـا شـرف علـى راس البتيلـه=تجـدد مابصـدره واستشـاطـي
وتواردتـه مزاهيـف الـروابـع=وتذكـر مامضـى لـه بالنقاطـي
رجولـه ماتفارقهـا الشـواظـي=وعيونـه مايفارقهـا العـراطـي
وبعضهـم يجتلـد كانـه مكلـف=بذرع الارض من شاطي لشاطـي
معـه بنـدق ودربيـل وربـابـه=ومعـب ٍمزهبـه داخـل قواطـي
وليا شاف الحبيـب اللـي يحبـه=تحـزم المراقـب واستحـاطـي
جمع له صاحبه رغبـه ورهبـه=من الرهبه يخاف مـن الزراطـي
وبعضهم ينطوي كنّـه مصـوب=وتمـر ايـام ماشـاف السماطـي
وليا نامت عيـون النـاس عينـه=تقول انه دخـل فيهـا الحماطـي
كـتـوم ٍمايعـلـم بالـسـرايـر=فـلا تامـن عليـه الانفـراطـي
مثل ماصار مـع مجنـون ليلـى=عقب ضغط الهوى صار انحطاطي
نسـأل الله عـفـوه والسـلامـه=اذا جاء في البشر عالـي و واطـي
لو ان الرجل ينظـر فـي معـاده=درى انه ماعلى الدنيـا اغتباطـي
وحسب للغبن فـي يـوم التغابـن=نهار الحشـر والعالـم خلاطـي
وحضر ميـزان لاعمـال البريـه=وعلى متن اللظى مد الصراطـي
وتبـرى كـل خـل ٍمـن خليلـه=اذا وصل العرق فـوق الاباطـي
هذا اليوم الـذي يحسـب حسابـه=يضيع ابـه المجامـل والتواطـي