ديوان الشاعر / فهيد الرويس العتيبي

[فهيد مقعد الرويس]

المشاركة الأصلية كتبت بواسطة أبوبدر

صح السانك يالرويس

صح بدنك

يابوبدر

لاهنت على التواجد

تحيتي

[فهيد مقعد الرويس]

لصار عمرك

لصارعمرك فوق خمسه وسبعين=والبنك عندك فيه عشرين مليون
وش عاد تجهدله بجمع الملايين=ليلك ويومك بين الارقام مسجون
بالله كم ضنك بقالك من سنين=حتى تمنى في حسابك ترليون
تبي الحقيقه انته انسان مسكين=المال لاقفيت وشلك منه عون
غير الذي قدمت في سالف الحين=لله ولاسواه ينفعك مالون
جهدك ومنتوجك متاع الوريثين=لكن طعني واصرف الرجل والشون
وسابق على الروضه نشاط المصلين=مشروع ربحه لاقبل منك مضمون
وصيةٍ للي سواتك مولين=عمارهم راحت ورى المال يجرون
سوال للي من نمونتك مقفين =اليامتى وانتم بالاجره تكدون

[أبوبدر]

صح السانك وبيض الله وجهك

[فهيد مقعد الرويس]

صح بدنك يابوبدر
اضافه الي الديوان

كل عام وانتم بخير

بويتات لتواصل عسى ان تجد شي من الاستحسان

فسرتلي من عيونك سبة اغيابك=عن غيبتك وش سببها لاتعلمني
تعال شف وش حصلي كله اسبابك=الحمدلله من الهلاك سلمني
من عقب ماائست من شوفتك لي جابك=اطلب سواء اللي في بالي وانت فاهمني
ماهيب لحية فهيد اعصابك اعصابك=يانعنبوا فيك ياملجمول لايمني
انا صويبك وطبي حالي اعذابك=عالج جروحي بلياماتكلمني

__________________________________

لبيت دعوه وجهتلي فالبريد=توجيب لصحاب العقول الواعيه
امثال ابوراجح عميد الشعرزيد=فالسوق قبلي قد شرا وابتاعيه
هامور لاعدوا هوامير القصيد=وبالنعم صيته قبل الانتر شاعيه
ماقلتها ليه هدف والله شهيد=غير الوفا لهل العقول الواعيه
والك التحيه يابوراجح من فهيد=قدر ومعزه ياطويل الباعيه

[ابو شوق الازوري]

ابدااااااااااااااااع
صح السانك والسانه
دوم انت مبدع



تحياتي ................. ابو شوق الازوري

[فهيد مقعد الرويس]

صح بدنك يابوشوق

اضافة الي الديوان
مجاراتي لابيات السامر ضمن مسابقة ابوهلا

ابيات السامر

االله يجيـرك يـاذرا كـل خايـف=في ساعةٍ ينشف بها الحلق والريق
الله يجيرك ياعديم الوصايف=جاهك ومالك مرتع للمطاليق
مجار ياستر المهار العفايف=بالعز تفتح مبهمات المغاليق
امجار ياللي بالمواجيب رايف=تحبها حب الوحش للشواهيق
يابوهلا عندك كبار الحسايف=تقضا وتعتقها من الهم والضيق
يابوهلا منجا الدريك المهايف=ياهادي الغادي لسهل الطواريق
يابوهلا في خلق سبع الطوايف=ماوثقوا بالطيب غير انت توثيق
للمرجله والطيب عندك وضايف=مكارم تبذل لهم دون تحقيق

المجاراه

االله يجيـرك يـاذرا كـل خايـف=في ساعةٍ ينشف بها الحلق والريق
امجار ياللـي ماكـرك بالنوايـف=يانادرٍ لك في سما الطيب تحليـق
شخصك وفعل الطيب دايم ولايـف=ياكثر مع جاهك من المال ماسيـق
تنفق يمينـك ماتحسـب الكلايـف=تعطي بلا منّه ومن غيـر تدقيـق
مع وقفتك تغدي الثقايـل خفايـف=تشتالها لو انها اثقل مـن طويـق
يابو هلا سطرت فوق الصحايـف=مجدٍ موثق مادخـل فيـه تلفيـق
ورايك يدل اللي من ارياه عايـف=وبالعز تفضّا محكمات الصناديـق
عساك تبطـي ماحتوتـك الفايـف=وشوفتك حلمي ياعميد الطواريـق

[فهيد مقعد الرويس]

اضافه الي الديوان

ياكثر مااسمع من قصيدٍ يفتقد حس القصيد=ياقايله لاتحسبن الشعر وزن وقافيه
لوتدعي انك فاهم ف الشعر عن فهمه بعيد=ولاكل من صفق لشعرك يعتبر عرافيه
ماتدري في وقتك هذا كثروا مشجعة الزهيد=والجزل في سوقه معاد يشجع الصرافيه
من يوم صارت مهنة التحكيم سهمه للبليد=واصبح يزاولها قليل العرف والانصافيه
ماعمهم لكن اخص مضيع الراي السديد=من صاوغ وجيه العرب ماقيم المحرافيه
والمضحك انه قام يقيم من يفوقه فالنشيد=وقام يتفسلسف فالشعر ذي ناهيه ام نافيه
يخدع قليل المعرفه هذا هو الشعر الجديد=اخطا طريق مجددين المفردات الوافيه
وفتح مجال اهل الطلاسم يعساها ماتفيد=فااشعارهم تلقا صور لكن ماتنشافيه
بالمختصر عجزوا عن التعبير بالفن الفريد=شعر الاصاله كل صوره فيه تطلع صافيه
اليارسمها الماهر الحريف ياصف مايريد=يالي تحسبون الشعر مغير وزن وقافيه

آخر تعديل فهيد مقعد الرويس يوم 15-Oct-2010 في 11:14 AM.

[راعي الشوشلية]

رائع كما عودتنا بجديدك


تقبل مروري

[فهيد مقعد الرويس]

المشاركة الأصلية كتبت بواسطة ولدعساف

صح لسانك يالرويس عالقصائد وبانتظار جديدك.

المعذره ياولد عساف
مانتبهة لزدك الا الان

وصح بدنك

تحيتي وتقديري

[فهيد مقعد الرويس]

المشاركة الأصلية كتبت بواسطة راعي الشوشلية

رائع كما عودتنا بجديدك


تقبل مروري

الاروع تواجدك

ياراعي الشوشليه