بندر بن محيا تحت المجهر

[محمد بن قميشه النفيعي]

الصبر وين الصبر يارابـط الجـاش
الصبر بعض احيان مايْوكلـك عيـش
مثل المحال اللي طوى حال الادبـاش
ومثل الظما على الكبـود المعاطيـش
فالصدر ضيق وينقش القلـب منقـاش
وتبغاني اصبر واحتسب وقفتي ليش؟؟
أصلاً انا ماجيت ابيع الهـوى كـاش
لو زوّدو سعر الهـوى بالبخاشيـش..
ياعنك كن الارض لي غرفـة انعـاش
افزع وقم رد البـرى جعلـك تعيـش
من صاحب ٍ خلاّ سما الفكـر ينـداش
اللـي ينقّـض ضافيـات العكاريـش
اللـي تركنـي كـل ليلـه ومغبـاش
اسوق رجلي في طـوال المطاريـش
لاهـوب لانايـر ولانيـب منحـاش
ولاحصـل صّـده ولّـده وتطنيـش !
قلـه رفيقـك مبلـش ٍ حالـه ابـلاش
عقبك حياته كلها طيش فـي طيـش..
وقله خذ عيونه غطـا بـرد وفـراش
وله بحر شعر ٍ مااسبحوه الطواويـش
عسى دياره بيـن سجـه ومطـراش
لحقوق غيم ٍ مـع مطرهـا مراهيـش
يمطر ثلاث ايام من وبـل ورشـاش
على الصفا وارض ٍ وطاها هشاهيـش
عليه وجـدي تـارك ٍ قلبـي عـراش
ومسوي ٍ في موجة البـال تشويـش!
وعرق الردى في صامد الراس ماعاش
لو مرّني راع الثمـان المباهيـش...
ولانيب لا لاش ٍ ولا اخـاوي الـلاش
ولاحسبت حسـاب الايـام بالشيـش!
ياصاحبي من يوم بعض العرب طاش
يكفيني اني مـن شيـوخ الحناتيـش..
هل النياق اللـي عراقيبهـا حـراش
وهل السيوف الساطيـات المباطيـش
واللي تثلثل فـوق علبـاه الاعشـاش
محسوب ٍ حساب الضعوف الدراويـش
وهدر العمانـي مايقـارن بالاكبـاش
والنصر مايفعل فعول اشقـر الريـش
والصدق مايطري على بـال غشـاش
والخبل خبل ولو مشى مـع مداغيـش
وعميش لوانـه ظهـر مثـل عمَـاش
الطيب مايحصـر بعمـاش وعميـش
الطيب واضح في عيون ٍ بها ارمـاش
مثل الجدي واضح على غيـر تفتيـش
ياسعـود سيّرهـا بمرقـاب ومشـاش
وشش في وجيه ٍ يمك تهوز وتشيـش
خابرك انا ياعالـي البطـش بطـاش
ياشوق من تلبس زمـام ودناديـش...
يـوم النوايـا لونهـا كنـه الـشـاش
عطني علوم اللي جفا يااشقر الريـش


من يملك مقدره شعريه وفخر وتفاخر بهذه الصوره يستحق ان يطلق

عليه شاعر بما تحملها الكلمه من معنااا

تقبلوو تحياتي

محمد بن قميشه