الجمش

[عقاب بن سقيان العتيبي]

ياللي تحب الكيف عجل وسوه = كوم حطب ناره وشمر وقدها
وافطن لحبه قبل طحنه وهوه = وفي ماه خفف شعلته واقتصدها
وبالهيل قندها فداك المفوه =عجل على اللي ليلته ما رقدها
يفدال من يشناك والفين بوه = خمام الرجال اللي خبيث خلدها
هراجة الهرج النكيد المشوه = جعل الكريم من الوجود يحصدها
والشعر اجيك بما يسرك شدوه = مثايل يطرب لها من نشدها
بنات فكر يوم تشدى شفوه = ولم لها كراستك واعتمدها
ماهي كلام اللي كلامه مموه = كلام من صاغ البيوت ونقدها
قام وتنقى وانتقى من نقوه = وابهم على النقاد مبهم عقدها
وفرش عليه تغاب الاجواد طوه = تدل الخمام اشباهها وتهجدها
البارحه جفني منامه عدوه = هجوس ما اوكد لك ولاانفي وكدها
لي ديرة يالله من الوسم نوه = تعلها لين السحاب يهمدها
ثم عل راويها وروه وروه = وزدها رحماتك وبركاتك وزدها
دار فاهلها للمسير سخوه = اما رضعها الجود ولا ولدها
في علو نجد الجمش تزها علوه = يضيق نجد ليا غفى ما وجدها
بينه وبين الجمش ولف بقوه = ولف الخلوج اللي تهمل وحدها
في قفري توه من الوسم توه = ممطور امس وعشبته في سعدها
فيه ام سالم بالصدايح تنوه = تبعد عن النفس النكيده نكدها
جمش على الساس المجود نشوه = ماكر قرانيس ينومس هددها
عصري لكن احلى صفاته هدوه = وتميز الموقع بدوره فردها
ولا بلاد الا من رجاله سموه = ليا ثبتت خطلان الايدي وتدها
جمش الرجال اهل الشيم والمروه = علوم براهين الفعايل سندها
قبايل من روق فيها الجروه = لاللي عليه تحط الايام يدها
جيران واخوان وروابط عنوه = عراف احناف عمار بلدها
عقال بصغار الحكي ما تفوه = ماخاب حضه وارتدا من قصدها
للضيف ريف يمطر المزن جوه = كرام تكيد خصالهم من سردها
وفيهم وفيهم مع صلفهم حموه = علوم الرجال طوال واوفوا عددها
ولا للوفا والطيب عنهم سلوه = يموت حاسدهم بعينه رمدها
الطيب دربه عندهم مايتوه = دواهي تدها الدهيين بادها
نفايل الشجعان حشمه وخوه = نفايل تصعب على من فقدها
لعل جار يشكي الجار سوه = يشوف من بقعا الشنايع نكدها
ولعل بيت مايرى الضيف ضوه = تسقط سقوفه ويتسدح عمدها

شعر/ عقاب بن سقيان العتيبي

آخر تعديل عقاب بن سقيان العتيبي يوم 05-Sep-2008 في 10:37 PM.