مطوع نفي

[الطير]

وهو سعيدان بن مساعد

امام وخطيب بلده نفي في زمنه

عاش في النصف الثاني من القرن التاسع عشر وفي النصف الاول من القرن العشرين

عاصر عبدالله بن سبيل الشاعر العروف

ودارت بينهما مناكفات شعريه

فعندما يتغزل المطوع بفتاه صغيره ويقول

هيض علي جويدل ماتغطى = يلعب مع الصبيان بام الخطوطي
ياشبه غرنوق مع فرق بطا = توه وحش نزل البحر والشطوطي
كنه على شوك الهراس يتوطا = والا الميابر يوم بالرجل يوطي

فيرد بن سبيل عليه

مطوع يامال كشف المغطا = ياخذ على رقي المنابر شروطي
شره على ورع وهو ماتغطى = {يلعب مع الصبيان بام الخطوطي}

وتستمر هذه المناكفه عندما يعرض دغيليب بن خنيصر العتيبي شراء نجر المطوع
فيرفض المطوع قائلا

نجر المطوع يوم سامه دغيليب = قالوا تبيعه قلت والله ماابيعه
ابغى الى جونا هل الفطر الشيب = اجواد مرفقهم عدو الشريعه
اول قراهم دلتين وترحيب = ترحيبه سهله بنفس رفيعه
مناب اعرف اللي بجنبه عذاريب = طبيعه يا حيها من طبيعه
لعل رجل ما يعرف المواجيب = تجيه ليعات الليالي سريعه

فيرد عليه بن سبيل ويقول

اللي يجي يمه هل الفطر الشيب = شرق عن الهييشه يسار الرفيعه
والا المطوع كل هرجه تكاذيب = والى بغى ماهيب ترفه تطيعه

ولاكن المطوع لايهتم ويستمر بالفخر بالنجر العجيب

النجر سامه شارع الوهاب = سامه وكثر مير انا عييت
الله لايتكل على الاسباب = ان كان بعت النجر بعت البيت

ويحاول المطوع اعلان كرمه ويقول

لاضاق صدري قمت اصوت لنوره = هاتي حطب وارميه للجار والضيف
من قبل ولد اللاش يبدي بشوره = حمست من بن اليمن غايه الكيف

ولاكن ابن سبيل يرد عليه ويقول

مطوع يا كبر هوله وجوره = مشراه في دور السنه مد ونصيف
ودلالهم دب الليالي مهجوره = وخطارهم ما غير ابوزيد وحنيف

وبيعدا عن المناكفات فان للمطوع قصائد غزليه رائعه

ومنها قوله

كريم يابرق على دار نوره = نورات واجد مير في نورها زود
الجادل اللي كن خنه عطوره = مباخر سيقت على جمرها عود
زل ارمضان ومقتفيه الفطوره = وقفاهن الموسم وانا مثل مسعود
شرابي البارد يزيدن حروره = شري على كبدي ولوكان قرهود
الحب يظهر حنطته من بذوره = وقوت البلد عندالدلاليل موجود