هيض علي جويدل ماتغطى = يلعب مع الصبيان بام الخطوطي
ياشبه غرنوق مع فرق بطا = توه وحش نزل البحر والشطوطي
كنه على شوك الهراس يتوطا = والا الميابر يوم بالرجل يوطي

مطوع يامال كشف المغطا = ياخذ على رقي المنابر شروطي
شره على ورع وهو ماتغطى = {يلعب مع الصبيان بام الخطوطي}

نجر المطوع يوم سامه دغيليب = قالوا تبيعه قلت والله ماابيعه
ابغى الى جونا هل الفطر الشيب = اجواد مرفقهم عدو الشريعه
اول قراهم دلتين وترحيب = ترحيبه سهله بنفس رفيعه
مناب اعرف اللي بجنبه عذاريب = طبيعه يا حيها من طبيعه
لعل رجل ما يعرف المواجيب = تجيه ليعات الليالي سريعه

اللي يجي يمه هل الفطر الشيب = شرق عن الهييشه يسار الرفيعه
والا المطوع كل هرجه تكاذيب = والى بغى ماهيب ترفه تطيعه

النجر سامه شارع الوهاب = سامه وكثر مير انا عييت
الله لايتكل على الاسباب = ان كان بعت النجر بعت البيت

لاضاق صدري قمت اصوت لنوره = هاتي حطب وارميه للجار والضيف
من قبل ولد اللاش يبدي بشوره = حمست من بن اليمن غايه الكيف

مطوع يا كبر هوله وجوره = مشراه في دور السنه مد ونصيف
ودلالهم دب الليالي مهجوره = وخطارهم ما غير ابوزيد وحنيف

كريم يابرق على دار نوره = نورات واجد مير في نورها زود
الجادل اللي كن خنه عطوره = مباخر سيقت على جمرها عود
زل ارمضان ومقتفيه الفطوره = وقفاهن الموسم وانا مثل مسعود
شرابي البارد يزيدن حروره = شري على كبدي ولوكان قرهود
الحب يظهر حنطته من بذوره = وقوت البلد عندالدلاليل موجود