ياوجودي\ فارس الصوينع

[قـنـاص الـقـوافي]

السلام عليكم ورحمة الله وبركاته
اترك لكم هذه الخاطره المتواضعه للمشاركه



ياوجودي وجد حر ٍ ماتعشى…
لو فعله حين هده خابرينه

غاب من وقت المضحى للمعشى…
والجماعه في المضحى ناطرينه

كن عظمه يوم شاف الجول هشى…
لو عظمه قاسي ٍ مافيه لينه

مير جلده من كنين الجوف كشى…
وللطويله هاضته دمعات عينه

حار صقاره ومن خوفه تمشى…
يلتفت له مير مابان إله بينه

والله اني مثل صقاره إمغشى…
ومثل حاله يوم ساقته الغبينه

كن قلبي حاجة ٍ طشته طشى…
الله انه من بلاويها يعينه

حاجة ٍ باقوى الوسايط ماتمشى…
من تصيبه بالحشى يمسي رهينه

واعذابه, لاتكٌن ولا تفٌشى…
في الحنايا بالمخاليب اللعينه

من فعايلها تنش العظم نشى…
ومن سبايبها بدت عيني حزينه

كنها رشت مسيل الدمع رشى…
واظهرت شي ٍ قديم ٍ دافنينه


اخوكم
فارس بن طلق الصوينع الدعجاني