من المحاورات قليلة الإنتشار بين الزلامي و فيصل الرياحي" رحمه الله"

[فهد رشيد الزلامي]

الزلامي

يا جماعة خير خلوا لي مجال شويه=أسمحوا لي ربع ساعه لين يصفي الصافي
ودنا بعد البطا ناخذ علوم العيه=يوم سند وش لقا صوب الحجاز وشافي

الرياحي

ياجماعه طيعوا الشاعر سليم النيه=يرسل الكلمه وستر الله عليها ضافي
قبل ما أسمع كلمتك دزيت لي برقيه=نصها ما يعترف بالعدل والإنصافي

الزلامي

العشيه شفت في خط الحفر دوريه=كل موتر يسبرون بداخله ياكافي
الغشيم يقدم أقدامه لجحر الحيه=واللبيب يروح فالطرقه وجا متعافي

الرياحي

عان الأخرى فالنسيم توقف الطرقيه=وأنت ساري ولعوا في وجهك الكشافي
غابوا اللي يجمعون الناجحه والنيه=مع هل الجيش المروح يرسلون الحافي

الزلامي

والله إنك في خطر دنياك روحه جيه=لو تخفي من علومك ماعلى الله خافي
جرة الحنشل ثلاثه وأربعه رجليه=ياعساها جرة يسفي عليها السافي

الرياحي

ندري إنك من سباع الجمش والحوميه=مير حنا سالمين ولا يصير خلافي
أحفظ الدولار شيخ العمله الدوليه=لا تشيل لك بطاقه مالها صرافي

الزلامي

من سباع الجمش وأنته من ملاوي ليه=مير وش جاب البقوم بديره الأشرافي
ياولد منصور فالخاطر عليك بليه=أنتبه بعدين لا تغلط على ابو وافي

الرياحي

البقوم أعطوك حاجه فالبخت سريه=ويش شق المشلح اللي مارفاه الرافي
كم ضربنا بالقنا والسيف والجنبيه=مايطيعن الرقاب ألا مع السيافي

الزلامي

والله إنك لو تعود لغلطتك هذيه=لأغضب اللي يعرفونك قبل أشيب قافي
خل عنك السيف لأهل طويق والدرعيه=وأنت لو تطعن يغطيك اللحاف الدافي