ليه يالطايف؟؟!!

[مخلف الهقاوي]

السلام عليكم ورحمة الله وبركاته

اضع بين ايديكم هذه المتواضعه عسى ان تلقى القبول

وياليت يعذروني اهل الطايف

ليه يالطايف يضيق الصدر لامنّي وصلتك?=باردٍ جوّك وقلبي تشتعل فيه الحراره!!
مااحتملت هموم قلبي والحقيقه ماحتملتك=كلّ ماسجّيت شنّت ضيقتي مليون غاره
يابيوت الشعر لولا ضيقتي ماكان شلتك=ويش اسوي دام قلبي تشتعل بالجوف ناره
ليه ياهمّي دخيلك دامني تهت وثملتك=ليــه ماترحــم جريحٍ ليلــه اعبر من نهاره?
مانويت انكر ليالي عشرتك يومن سألتك=وانت عندي ضيفٍ اقشر مارحل والدار داره
مير تكفـى رح تراني هذي الليله مللتك=يكفي الضيقه وجوّي مخترب واخلف مساره
آه يالطايف لو اني سالمٍ منك وجهلتك=كــان ماذقت الهمــوم ولا تجـرعت المــراره
ياقصيدي يوم غنيت المواجع وابتهلتك=مابغيت الاّ السعـه والكـون ياسـع لي مداره
هيه ياهمٍ سكن بين المحاني واشتملتك=صـرت انا وياك جـارٍ ماحفظ بالحق جـاره
هيه يالطايف يضيق الصدر لامنّي وصلتك=من قلعني عن جبالك ميل يبشر بالبشاره