(( شاعر الأسبوع ))
من جريدة الجزيرة // صفحة مدارات شعبية
كما عودناكم أن نقف عند أحد شعراء هذا الوطن الغالي.. ولأول مرة عبر الإعلام تنفرد مدارات شعبية بالحصول على بعض من سيرة وشعر الشاعر عمرو بن مبارك بن منيع الأسعدي العتيبي (راع القصيفه) عاش وتوفي في بقعاء شاعر جمع الشعر والكرم والجود. وكان -رحمه الله- من كرمه يعشي الضيف وزمالته ومن كرمه باع أحد ثيابه كي يشتري القهوة والهيل للضيوف. له قصائد كثيرة وله العديد من الردود والمجارات مع بعض الشعراء المعروفين.
ومن قصائده نختار هذه الأبيات من قصيدة طويلة:
يوم صار المال بيدين البخالي =يفصدون العرق لو هو باليميني
آه وا ويلاه من حق الرجالي =لا طلبها في سنين مدهريني
ما جمعنا المال حب للريالي =لو نجوع ليا تعشا من يجيني
يالله الستار تستر لي حوالي =عن وجيه ما تعذر في سنيني
جعل مال ما تجمل بالرجالي =للزوال يزيلها ربي عويني
وله أيضاً رحمه الله
عسى الغنم يا كله ذيبي =يا عل مالي ولا شاتي
وأسرح بليا معازيبي =وأمشي على غير مشهاتي
حفي القدم بالمراقيبي =ماطا الرجل وسطها ماتي
كل الهبايب توميبي =يالله تستر من الواتي
يا لله على الربع تلويبي =وأحط كبشه على الشاتي
وها هو الشاعر حمود النخيلان الشمري يسند هذه القصيدة على عمرو بن مبارك يقول منها:
عديت أنا راس النبا يا نديبي =وعزي لمن مثلي تعذب بمرقاه
عديت به من فوق رجل وعسيبي =والثانية رجلي عن القاع نرفاه
عديت في راسه صياح وطنيبي =وانخا هلا الردات وأهل الحمياه
ليتك حوالي يا عمرو يوم أعيبي =ليتك حوالي تنهض الراس وغطاه
يا راكب حمرا تقل وصف ذيبي =حمرا من الزعرات يا حلو ممشاه
تشدا حمام فر مله جذيبي =ركابها عجل من الضيم ينخاه
العصر تبرك في مناخ العتيبي =تلفي لعمرو في علوم وسلاماه
سلم على عمرو وعيد قريبي =وسلم على اللي حولهم بالقراباه
رد عمرو بن مبارك على حمود النخيلان.. منها:
يا رسل دن اللي تود الغريبي =منوة غريب ضارم درب مضماه
حمرا طواه القفل مثل العسيبي =يطربك مرواح إلها عن مضحاه
وشلون رجلك واعساها تطيبي =هذا سبب ذنب وكفر خطاياه
طبه صخيف الوسط زينه عجيبي= اشفق على اللي ود عينك بلاماه
احرص عليها لا تطيع الخطيبي =احرص على اللي يبري الجرح شوفاه
تشكي هوى حب الجميل اللبيبي =وأنا بعد مثلك من الحب بشكاه
وانا معك في كل درب صعيبي =لرضاك نمشي نبذل المال والجاه
ويا عل رجلك بأمر ربي تطيبي =وتبقى على طول الليالي معافاه
ولو يجتمع من مشرقه للمغيبي =ما يدبرون أمر سوا الله يجلاه
وهو الذي يقول فيه الشاعر الخمعلي العنزي قصيدة من ضمنها:
راع القصيفه عمر يا حمود =نعم إليا حل طارييه
لاجيت بابه منا مردود =فنجال بن وصينيه
له مشرع دايم مارود =ولا حسب الورد بيديه
الطيب من ماكره موجود =وكر القرانيس قطعيه
يا كود تلقط على المعدود =والبير ترداه طرقيه
تصدر ورود وتجي ورود =ويحمس لهم بن بريه
والنار ورث لها بالعود =لابد تلقونها حيه
حزمت خطب وزنهن مرجود =ورسلانها دوم مركيه
بالمقبله شلعه يا حمود =بالمقبله تشلع يديه
شوفي بعيني ما هو تردود =راع القصيفه عمل ليه
رحم الله شاعرنا وغفر له.. وإلى اللقاء مع شاعر آخر
(( شكر خاص للأستاذ/ حمود بن مبارك العمرو والأستاذ/ عبدالهادي عبدالله العمرو ))
جريدة الجزيرة يوم الجمعة 25 جمادى الأول 1429هـ
بقلم / بدر بن محمد العتيبي - بقعاء
« آخـــر الـــمـــشـــاركــــات »
21-Feb-2009, 10:43 PM
عمرو بن منيع الأسعدي في سطور
العرض العادي
