السلام عليكم
مساكم الله بالخير
أقدم لكم مقتطفات أبيات لشعراء الدغالبه في مدح قبيلة الدغالبه
ونرجو أن تحوز على رضاكم
أبيات للشاعر المخضرم / عبيد بن بريكان اللاصوم في الأمير الفارس خزام المهري :
وخزام صدر له مراسيم واقرار = واهل الفعول الناقصات احتقرها
ماياخذ الفنجال من بن وبهار = الا بفعل تعترف به جبرها
أبيات للشاعر / سالم بن ملهي الدغيلبي في مدح القبيلة :
عزوتي يا الاد منعر مسندي = صلب جدي فزعتي في كل حال
اكسبو قولة نعم للأبدي = والهم البيضا على روس الطوال
ربعي الظفران والهم تشهدي = ماضي الايام مع سود الليال
مامشت مع خيلهم خيل الردي = ذا كلام الصدق مايبغى سؤال
أبيات للشاعر / سعود بن ملهي الدغيلبي في مدح القبيلة :
دغالبه وان كان يبسا ً الأرياق = عدونا يصبح من العقل خالي
وان صاح صياح الضحى بعد الاشراق = نقدم على الموت الحمر ما نبالي
افعالهم ما هي تماثيل و الفاق = يشهد لنا التاريخ في كل حالي
وانجردوا بأيمانهم كل براق = عوق الخصيم ان كان بث المجالي
أبيات للشاعر / مرزوق بن حمدان الدغيلبي في مدح القبيلة :
سلام يا ربعي وياتاج راسي = اليا انفتح باب الفخر والبطولات
في مدحكم تزهى جميع القصايد = ياكاسبين الطيب واهل المروات
آلاد منعر نجدت اللي نخاكم = فزعاتكم تشف الكبود العليلات
أبيات للشاعر / جعفر بن مرزوق الدغيلبي في مدح القبيلة ومدح الشيخ خزام :
آلاد منعر عزوتي يا المنابيه = هي فزعة المضيوم شرق ٍ وشامي
تشهد لها نجد العذيه بتاليه = ويشهد لها سيف ٍ فعوله تمامي
دغيلبي يا حي اسمه وطاريه = اسم ظهر من قوته فالاسامي
ياما وياما من علوم تباريه = العز والنوماس الحظ قامي
بقيادة اللي ما يحسب مساعيه = خير على ربعه سواة الغمامي
خزام يا شيخ وفعله يبديه = يا مخلي روس الطويلة عدامي
ابن الرعوجي يالله انك تحييه = معرب الجدين خال وعمامي
له سطوة ٍ يوم القبايل توليه = عصر مضى له بين عام وعامي
أبيات للشاعر / تركي بن متلع القبع في مدح القبيلة :
وآلاد منعر كلهم درع و حزام = عيال عمي كاسبين الجزيلة
يومنها بالزان والدرع و حسام = وكلن على العدوان صاعه يكيله
منزحت عن نجد دقلات الاخصام = يقولها فراج هذا دليله
وحنا هل البيرق ليا رزت اعلام = يوم الرغامه والمواقف جليله
أبيات للشاعر / مقعد بن محمد الدغيلبي في مدح القبيلة :
آلاد منعر لا قنب ذيب المنايا واقترب = سم الكبود ومن يعاندها تقوم وتلطمه
في ظلهم ترعى الجهام ودونها ثني الركب = ترعى بأمان من الحجاز إليا سنام المردمه
ويوم القبايل سلمت غالي قلايعها بأدب = حنا عصينا الأمر وحبال المعاند نبرمه
عيا عليها اللي يسوق أطول شنب وأطلق شنب = شيخ ٍ على صرح المعالي بالفعل رز اعلمه
اخزام اخو نوره خزام مطوع كل الصعب = ايو الله خزام الخشوم وسعد من هو محزمه
اليا نواها ساقها بمشوك نار و لهب = فيه الشجاعه تطبخ من حد راسه لقدمه
أبيات للشاعر / عبدالله بن مرزوق الدغيلبي في مدح القبيلة :
من لابة ٍ لي من ذراها ضلالي = آلاد منعر لا جرى بالدهر ضيق
تشيل حمل ٍ رازي ٍ ما يشالي = او تثبت ثباتا ً كنها قمة طويق
تاريخها فالمجد بأول و تالي = ومثبت ٍ لا خالط الهرج تلفيق
لها على صلب الجزيرة مفالي = وسط الفياض اللي زهرها دوانيق
أبيات للشاعر / ماجد بن متعب الخمسي في مدح القبيلة :
بني منعر حزامي في نهار الماقف المشنوم = حياض الموت تاردها وداع الحرب ما تخشاه
على صفحة وفا تاريخنا بأغلى ذهب مختوم = تروم أمجادها بسيف الاملاح والردى تجفاه
كريمين ٍ عن الهزلات والميلات فيها شوم = تحب المذهب الطيب وساس الذل ما ترضاه
إذا حمي الوطيس وثار في الميدان عج القوم = وصاح الصايح اللي ساق عمره والعجاج أعماه
تعزووا فوق قبا ً تودع أجموع الخصوم أقسوم = تقول انها من الكاس المحرم روسها مسقاه
أبيات للشاعر / خالد بن سعود الدغيلبي في مدح القبيلة :
ادغيلبي معروف بين الرياجيل = الطيب عمه والمراجل خواله
اصل وفصل حر ٍ على العز رابي = انفه وعزه وابتسامة اصاله
طيب وكرم وافعال خير و تواضع = فزعه ووقفه والتزام ونباله
نظرة شموخ وهرجة ما تثنى = قول وفعل وابيات شعر وجزاله
أبيات للشاعر / ماجد بن نايف الدغيلبي في مدح القبيلة :
حنا هل الفزعات والوقفات فأيام الطراد = يومنها بالسيف والبارود والموت الحمر
آلاد منعر متعبة شوس الأعادي والجياد = إي والله اذكر فعل ربعي واتباها وافتخر
أبيات للشاعر / خالد بن ذياب الدغيلبي في مدح القبيلة :
آلاد منعر يا الغداة المشاكيل = ياعزوتي من ضيم هاك النهارا
يأهل الفعول البانيه دون تضليل = يأهل الكرم والطيب وأهل الوقارا
فزاعة المكروب ذباحة الحيل = عز الصحيب وللمعادين نارا
إليا دعوا ياتون من دون تأجيل = ياحي وقفات الرجال الحرارا
أبيات للشاعر / ناصر بن محمد الدغيلبي في مدح الشيخ خزام المهري :
بقيادة اللي للصعيبات وراد = خيال قب الخيل راع المرادي
اخزام ضداد العداء سم الاكباد = لا جاء نهار ٍ فيه صبح وهجادي
أبيات للشاعر / فيصل بن سعد بن جفين الدغيلبي في مدح القبيلة :
آلاد منعر عزوتي يا ربعي = آلاد منعر ياهل الافعالي
آلاد منعر محتمين الهيه = غصب ٍ على العدوان والأنذالي
يشوش راسي لا ذكرت الأول = ويشوش راسي لا ذكرت التالي
آلاد منعر يا عصابة راسي = أهل القنا وأهل المقام العالي
أبيات للشاعر / نايف بن الحميدي الدغيلبي في مدح الشيخ خزام المهري :
تحت راية اخزام الـي افعولـه = شهيره لامتطى فـوق العبيـه
اخزام الخيل حمـاٌي السرايـا = سمـي المجـد لاقلنـا سميـه
يكفي قـول فـراج الدماسـي = بعـد غنٌـا البيـوت العالميـه
ولاياخزام قربك سعـد عينـي = وبعـدك خابـره كـرهٍ عليـه
وأيضا ً مما قال الشاعر نايف بن الحميدي في مدح القبيلة :
يالادمنعـر كاسبيـن الاولــى = من فعلكم سرد الخيول اتعيبـه
الاد منعـر عزوتـي وحزامـي = ماضاعت لهم فالزمـان اذهيبـه
ماض الزمن ولاالزمان الحاضر = الكيـل دايـم فالقـا توفيـبـه
الشاعر / بندر بن سعود بن شمروخ الدغيلبي
آلاد منعر حزامي ساعة الثوره = العزوه اللي عطيبات ٍ مضاربها
الشاعر / خالد بن ذياب بن عبدالرحمن بن هليل الدغيلبي
الاد منعر محتمين المطاليب=سقم المعادي يوم صولات الافراس
اهل الرمك واهل السيوف المخاضيب=واهل البيوت اللي بنوها على ساس
ماشيدوها بأذن والا بتجنيب=منزالهم يصعب على ساير الناس
يوم المغازي وانتهاك الرعابيب=وكلن من الذله دخل فيه وسواس
ربعي بني منعر سهوم المحاريب=كم غارتن جتهم وردت بالافلاس
وكم غارتن منهم لفت بالمكاسيب=اخذت ضحى والشاهد الرمح والطاس
سعد الذي صكت عليه المكاليب=وسقم الذي يطمع وياتيك لحاس
افعالهم شاخت على الشمخ النيب=كم نزلت راسن وكم طولت راس
ربعي وابا امدحهم ولابه عذاريب=ومدح القبيله عند الاجواد نوماس
وفي الختام لكم مني
فائق الاحترام والتقدير
اخوكم
عمر العتيبي 
« آخـــر الـــمـــشـــاركــــات »
06-Mar-2009, 10:24 PM
ماذا قال شعراء الدغالبه في قبيلتهم ؟
العرض العادي
