حبيبة قلب شاعرها !((مــشــعــان البــراق))

[/عبد العزيز الجذع/]

السلام عليكم ورحمة الله وبركاته

من روائع مشعان البراق.

بعنوان (حبيبة قلب شاعرها)

يا همّ / رح نام لاتسهر علشاني=عيونك اقراء تعبها في محاجرها
ارتح وانا جروح روحي وضعها ثاني=ضلوع صدري عليها .. الله يقدرها !
ماهو غريب ان سهرت الليل وحداني=كل الليالي بلا خلان ساهرها
رح خلني عايش ِ في غربة اوطاني=اجمع بقاياي قبل الصبح وانثرها !
مابين صبري على ياسي وحرماني=ومابين الايام ماضيها وحاضرها
انسى اني اللي يشيل الجرح ويعاني=وارجع لـ.. ذيك الليالي واتذكرها
كم جابني درب والا .. كمّ وداني=على طعون المواليف وخناجرها
شاعر ويكتبني احساسي ووجداني=وقصايدي في حبيبة قلب شاعرها
كتبتها شعر .. من يقراه / يقراني=حفظتها .. دمعة ٍ ماني بـناثرها
غنيتها .. واصبحت معزوفة الحاني=رسمتها وابهرت من هو يناظرها
تعيش في داخلي وتحرك اشجاني=لو في الحقيقه ظروف الوقت تقهرها
لو تطلب عيوني الثنتين بـ.. العاني !=في ذمتي ذمه اني ما اتكاثرها
كم ليله الشوق سريته وسراني=كنه يقدي خطاء رجلي على آثرها
العام .. خلتني انسى الناس من داني=ملت حياتي من اولها ليا اخرها
وقبل تمرّ التباشير .. وتعداني=عن ساحل الوصل مبحرة ٍ بواخرها !
يا كثر ما احتاجها لكن ما امداني=راحت .. ودنياي ماني بـ.. متصورها
حتى التفاكير .. تامرني وتنهاني=واسدل على مسرحيتها .. ستايرها
ان طال صبري على سجني وسجاني=ايامي المقبله .. وشلون ابصبرها
صحيح جاني من الايام ماكفاني=لكن فدوه .. وعزالله عاذرها
اللي من الشوق ترواني وتضماني=كلش ولا اللي يبي يجرح مشاعرها !