سواقة الددسن ما هي بسيطه يا ابن ثعلي

طي
X
 
  • التوقيت
  • إظهار
مسح الكل
المشاركات الجديدة
  • الابرق
    عضو ماسي
    • May 2003
    • 605

    #1

    سواقة الددسن ما هي بسيطه يا ابن ثعلي

    الاخ العزيز ابن ثعلي سالتني عن سواقة الددسن ما هي بسيطه ويش معناها ، فأقول وبالله التوفيق

    سواقة الددسن هذه لها سالفه يا ابن ثعلي
    هاك الحين يومنا في البر كان فيه واحد من الجماعه عنده ددسن وكان يركبنا في الصندوق واذا قلت له ابك يا فلان ركبنا في الغماره نبى نشوف سواقة الددسن قال ( سواقة الددسن ما هي بسيطه) وعلى هال الحال.
    وكل ما غرس قال انزل احفر ودف والابرق يحفر ويحفر ويدفن ولا طلعت الددسن قال انا معلمك ان( سواقة الددسن ما هي بسيطه) وانا مصدقه واقول صحيح ما هي بسيطه ، وان طفت الددسن جلس السواق بالغماره وقال لي انزل دف الددسن والابرق يطمر ويدف ويدف لين تقطع عروقي ورجال بالغماره وان قلت ابك يا فلان تعبت قال لي انا معلمك ان (سواقة الددسن ما هي بسيطه)
    بعض الايام ياخذني انا ومعي ورعان الجماعه ويركبنا في الصندوق نطرد الضبان ولا شاف الضب صاح علينا وننزل تقل سلق نطرد الضب ولا يهون الجربوع ، المهم رحت لشايبنا يتوسط عند ابو راعي الددسن علشان يعلمني السواقه، يوم شايبني رجع من عنده ابوه قلت هاه بشر عساه وافق قال ابوه يقول
    ( سواقة الددسن ما هي بسيطه ).
    المهم بعد عدة زيارات وحب خشوم وفوقها كم جفر مذبوح وافق على مضض انه يعلمني سواقة الددسن ،
    والصراحه اني اول ما ركبت في الغماره قلت ( سواقة الددسن ما هي بسيطه )، بدا الرجال يعلمني وكل ما غلطت لمخني واذا شاف ما فيه فايده ركبني في الصندوق لين يطيب خاطره ثم نزلني وركبني بالغماره
    وبديت اتعلم ، صحيح انه كان فيه عده ضحايا يعني كم عنز جات تحت الكفر وحنا مسرعين
    وكم بيت شعر للجماعه اذا ارسلني ابوي اعزمهم على العشاء وبغيت اوقف قدامه واربط فرامل مدري الا وانا مخليه نفق ولا وقفت لقيت في الصندوق كم حرمه على كم ورع وماني عارف ويش اللي جابهم في الصندوق ،
    لكن ما يأست وتعلمت سواقة الددسن ،
    وهالحين عيال الجماعه كل يوم يجوني يبوني اعلمهم سواقة الددسن وانا اقول( سواقة الددسن ما هي بسيطه )

    الابرق
  • راعي الحامدية
    عضو فضي
    • Jun 2003
    • 294

    #2
    الله يرج بليسك يا

    الابرق
    صراحه مواقف محرجه والي ضحكني زيادة بيوت الجماعة يوم خليتهاكباري

    تعليق

    • سيف العدل
      عضو فضي
      • Jun 2003
      • 287

      #3
      ههههههههههههههههههه

      الابرق سالفه مضحكه وحمدلله يوم مخذتلك نفس والله لايهينك وانشهد انك ضحكتني وذكرتني العواده اول ماطلعت السيارات علاهم

      تعليق

      • عين العقل
        ناقد ومحلل
        • Jun 2003
        • 1968

        #4






        سوافة الدستن مانا بسيطا

        تعليق

        • ابو ضيف الله
          مشرف عـام
          • Feb 2003
          • 8888

          #5
          الله يذكرك الشهادة اخوي الابرق ذكرتنا بالددسن والعواده واللمخ عند الشك بالخطا
          بس تراه صادق
          ( سواقة الددسن ما هي بسيطه )
          قال الشافعي رحمه الله: أركان الرجولة أربع: الديانة والأمانة والصيانة والرزانة.

          قال الخليل ابن أحمد: التواني إضاعة, والحزم بضاعة, والإنصاف راحة, واللجاجة وقاحة.




          اللهم أنصر من نصر الدين وأخذل من خذل الدين

          تعليق

          • ابن ثعلي
            عضو نشيط
            • Jun 2003
            • 45

            #6
            شكرا يالابرق على هالايضاح ولو اللي صار لك صاير لي كان كتبتها في دفتر العائله .
            بس ان اشهد انك عانيت مع ها لددسن الماخوذة بس ماتعتقد انك لو غيرت العباره الي
            سواقت الفياجرا ماهي بسيطه ماهيب احسن تماشيا مع العولمه واتفاقية القات والنظام العالمي الجديد ........

            تعليق

            • ابن ثعلي
              عضو نشيط
              • Jun 2003
              • 45

              #7
              (( ابي( السلام) ليس لي اب سواه
              اذا افتخرو ببرقـــــــــا وروق)) تحتاج تصحيح يا بوضيف الله ( الاسلام وليس السلام )

              تعليق

              • الابرق
                عضو ماسي
                • May 2003
                • 605

                #8
                صبحك الله بالخير يا ابن ثعلي


                بالنسبه للفياجرا اذكر اني قد لمحتها تمشي من بعيد وانا اسوق الددسن اما بالنسبه لتفاقية القات حولنا يماني ابنشده عنها وعلمك .

                الابرق

                تعليق

                العمل...