حرية متقاعد

طي
X
 
  • التوقيت
  • إظهار
مسح الكل
المشاركات الجديدة
  • صبي عتيبه
    عضو فعال
    • Jan 2003
    • 127

    #1

    حرية متقاعد

    ليت منهو وقع اوراق التقاعد "=" والاداره وافقت والهم طاحي

    استلم كامل حـقوقه والعوايد "=" سلم العهده وغادر واستراحي

    ما نتظر حفل ٍ توزع به شهايد "=" وصورٍ تذكار ما فيها صلاحي

    اكتبو له نشكرك خدمتك واجد "=" ونتمنى لك بدنياك النجاحي

    صار من عقب ارتباطه يا بو عابد "=" حر مثل الطير كفّاخ الجناحي

    ما حداه الزام عن بعض المقاصد "=" لا نوى ديرةٍ شغل وراحي

    واصلٍ غاليه ولربعه معايد "=" في عياد الفطر واعياد الاضاحي

    لازمه يقضيه وبكيفه يواعد "=" ما يراجع ريسه يبغى السماحي

    لا اشتهى يرقد تخيّر بالوسايد "=" وان سهر ما هوجس بزام الصباحي

    والهدف عند العرب ما هو بواحد "=" كل رجل له مرام وله مشاحي

    من يبي يقنص عساه يعود فايد "=" فيه بالمقناص رزقٍ وانشراحي

    لا ذكر في صحصحٍ نزل وطرايد "=" قال هيا ما يقول الصيد ناحي

    ومن تنيشط حالته جدد بناهد "=" ما فهق لجازته عقد النكاحي

    وكان حاله ماش والا ما يساعد "=" ينسدح ويكثّر من الانسداحي

    وكان شفه بالسفر ما هو بناشد "=" في بلاد الله مع السياح ساحي

    وخيرهم من كان في دنياه زاهد "=" يطلب الله بالثبات وبالصلاحي

    بين مكه والمدينه والمساجد "=" دايمٍ دربه عسى دربه سماحي

    قايمٍ بالليل للرحمان ساجد "=" وكل ما نادى المنادي للفلاحي

    قلتها وانا اعرف ارضى الناس كايد "=" ولاني بفارض على الناس اقتراحي

    والوظايف جمعت شتى البدايد "=" من جميع الناس مجنونٍ وصاحي

    فيهم الطيب عزيز النفس راكد "=" عل يفدونه مشافيحٍ شحاحي

    وفيهم الانذال والاذناب تاجد "=" خمةٍ دايم سوالفهم صياحي

    دايمٍ وجه الذنب واللاش بارد "=" ياعسى يمحاه من دنياه ماحي

    والحظيظ اللي يبي يطلع تقاعد "=" دام به قوه وقبل يقال طاحي
العمل...