من أشهر الأبيات في الحكمه من شعراء عتيبه

طي
X
 
  • التوقيت
  • إظهار
مسح الكل
المشاركات الجديدة
  • أبو طالع العتيبي
    موقوف لمخالفة الأنظمة
    • Jan 2011
    • 836

    #1

    من أشهر الأبيات في الحكمه من شعراء عتيبه

    بسم الله الرحمن الرحيم

    اشعار عتيبه قويه ولذيذه وفيها الكثير من الابيات التي فيها حكم وحاولت اجمع بعضها:

    • التحية والترحيب


    سلطان بن مظفر الزايدي


    وتلقى سراة من هلال بن عامر = يزيل الصدى والغل عني سلامها

    بهم تضرب الامثال شرقاً ومغرباً = اذا قاتلو قوم سريع أنهزامها

    عليهم ومنهو في حماهم تحــية =من الدهر ما غنى بقية حمامها

    محمد بن فهيد الاسعدي

    اول نباشرهم بزود تهلاتي =ومبهرات في يدين الاواليد

    والشطه اقفت مثل فسخ العباتي = وساحة خواطرهم بكثر التناشيد

    فهد بن حنس العصيمي


    ونفرش الأزهار والزل الجديد = من أسافل نجد لطلعة كرى

    والمشاعر وسط قلبي ما تحيد = عن محبة من نباه معطرا

    فرز الحافي العتيبي :


    ما رية الترحيب طلق الحجاج =وغير الكلام الزين ومفطح الضان


    • الاستغناء والتشيم

    بندر بن
    سرور

    ياعنك ماتشفيك ذباحة التيس = ربع السلق مادام حملك خفيفي
    وأخير من هاك الوجيه المفاليس = البعد عن معروفهم لو تضيفي
    يلحقك منهم بعض الايام تنجيس = ثوب النجس لو كان ثوبك نظيفي

    بندر بن سرور

    صادق رجالن يعرفون الصداقه = يقفون صفك يوم يبسات الأرياق
    ومن يرغب فراقك فعجل فراقه = جاز الذي يجزيك أفراق بافراق

    بديوي الوقداني


    عفت المنازل وروحي يوم اجنبها = منها غنيمة وعنها البعد أولى لي
    لا خير في ديرة ٍ يشقى العزيز ابها = يمشي مع الناس في همٍ وإذلالِ


    • الكرم والجود

    مخلد القثامي

    اوصيك بالخطار في هاشل العشا = ليا نصـوبك لا تقصر وجيبـها
    باشر لهم بالطيب والكيف والذرا = وقرب معاميلٍ على الله نصيبها

    محمد بن فهيد الاسعدي

    يازيد انا ودي تسوي سواتي = هذي سواة معرب الخال يازيد
    يازيد لامروا هل الموجفاتي = اقحص لهم عجل بالاوماي يازيد
    يازيد انا يابوك لذة حياتي = شوف النشامى لا لفونا تقل عيد

    عبدالمعين بن عقل بن ثعلي


    الا بحب اللي بناري مناحير = صفرن على جال المناره مقاعي
    يازين شبت نارها للمسايير = لجالهم عندي عليها اجتماعي

    ابو عبيه المقاطي


    وترا الكرم من طيبات الصفاتي =والبخل لوم وشوم وخصلة عذاريب
    وكم واحد مثلي وسوا سواتي =لامات من فقر ولا حل به عيـب

    ناصر الشغار
    افرح ليا صكو عليه ربوعي=وارفع لهم بيت وساع رباعه
    وعندي لهم مثل البطاط الوقوعي=كيف لشراب القهاوي ولاعه


    الله خلقني واعتنى بي من الضيق = والفقر عن سلم العرب ما حداني
    ما قط مني راح ضيفي على الريق = ولا شان وجهه يوم شان الزماني

    هلال بن دخيل الله المغيري


    وليا لفا مع هجعة الخلق خطار= دور لهم كبش كبير النوادي
    اما معك والا مربيه تجار = اشره ولو قالو لك الخلق غادي
    حذراك حطت للمشاكيل معذار = ورزقك يجي من عند رب العبادي

    حويد العضياني

    يا ماذبح من حايل صنفوها = في حزة القفره ليالي الوزامي

    محمد بن فهيد الاسعدي


    أذبح لهم كبش رعى بالخلا هيت = كثر لهم سمن على غالي الزاد
    المرجلة ما تدركه وان تدانيت = اعنز على ربك يعينك بالانفاذ




    • البخل والشح


    بندر بن سرور


    وخطوا البخيل اللي على السد يقصف = وان مد له مده لياهي حقيره
    هو مادري ان الرزق للحي يصرف = يعطيه من يعطي العطايا الكبيره

    عويد بن محسن الصعاق

    البخل سمي بخل مابه جمايل = ظلام سدٍ يوقف اللي مشا له
    والجود دربه سمح لاهل الجمايل = سمحٍ لمن جده وخاله عنا له

    مناحي الهيضل


    وترى البخيل ولو جمع له قطيعين = لو كثر ماله مثل نبت الهراسه
    مخطئ من الدنيا ومخطئ من الدين = راضي على درب الردى والخساسه
    يبخل على نفسه ولو هم غنيين = مثل الحبيني بوم رزقه لحاسه



    عزة النفس


    بديوي الوقداني



    عز الفتى راس ماله من مكاسبها = يا مرتضي الهون لا عزٍ ولا مالِ
    ذللت بالروح لين ارخصت جانبها =وانا عتيبي عريب الجد والخالِ
    قومٍ تدوس الأفاعي مع عقاربها = ولها عزايم تهدّ الشامخ العالي

    شليويح العطاوي


    ياناشدن عني تراني شليويح = قلبي على قطع الخرايم عزومي
    ان قلت الوزنة خذوها المشافيح = اخلي الوزنة لربعي واشومي



    عائض بن زيد المحاص المغيري


    كثر الشمات يبدد الحال تبديد = يغضب ملايكتي ويفرح عدايه
    ان عشت يشبعني حزامي من الصيد = ون مت ماعقبت للي ورايه

    ناصر الشغار

    وأنا احمد الله مارفيق ٍ شمتني = والعوج ماعقّبتها فالقبيله

    تركي بن حميد • الشجاعة والحزم

    الأمير الفارس تركي بن حميد
    تصبح مداس الخيل من غبّ كوننا = تشبع حناديها وباقي نسورها
    ماينفع الا الصدق والفعل والنقا = وباقي الحكايا بايهاتن أمورها
    عاداتنا لطم المعادي على النقا = والا العميلة راتعة ما نذورها

    مخلد القثامي


    تغانم شبابك قبل يلعبك الجهل =تغانم زهرها قبل يابس ركيبها



    ناصر الشغار
    ياطول مانعطي بهن الغتاتي=مثل الفهود وفوقهن نرم الاسلاب
    وناخذ غزايز كل قرم زناتي=ونعطيهن اللي يحترينا بالاوجاب






    العفار ضيف الله بن تركي


    عاداتنا نرعا الخطر دايم الدوم = يرعى دبشنا فيه والحظ قايم
    نرعى بربع كنهم دولة الروم = مركاضهم بالضيق يجلا اللوايم
    لاصاح صياح الضحا جن حثلوم = الخيل بالفرسـان عجل همايم



    محمد بن هندي


    ضرب الموارت مابها نوماس = حذفة شرود من بعيد
    على قضب عنانها والراس = والله يدبر مايريد
    علي باللي تبعد المرواس = والعمر لزم انه يبيد


    بخيت بن ماعز العطاوي

    يا خيلنا وان شب للحرب ناره = فلا يلاوي راسها كل ديقان
    راحن من حت التطاريف شارة = وعود بعد مركاضنا ذود نقزان








    ليا قالو الحكام رزو بيارق = نسفنا على شيب الغوارب ثقالها
    ولا عندنا في حلتن عند حاكم= على الطول حكامن طوالن حبالها


    • الصبر والاقدام

    تركي بن حميد

    والحر لا دبتّ عليه النواميس = يشهر وعن دار المذلة يشومي
    وإلى اكترب من بعض الاشيا نسانيس = إعزم ولا بدّ الفرج بالعزومي

    ناصر الشغار
    كم من سباع بالخلا رافقتني= وانا لعكفان الشوارب دليله
    انا ليامن البلاوي بلتني =اصبر على شيل الحمول الثقيله

    بندر بن سرور


    أبطش ديار القوم والرزق مضمون = تصيدك الأقدار وألا تصيدي
    وأحذر تخاف ألا الذي كون الكون = رب السماء محيي العظام الهميدي

    بديوي الوقداني


    دوس المخاطر ولا تخشى عواقبها = الموت واحد وبعد العز يجلالي
    إن المنايا إذا مدّت مخالبها = تدرك لو كنت في جو السما العالي
    ما قرّت الأسد في عالي مراقبها = تسعى على الرزق ما حنت للاشبالِ

    تركي بن صنهات بن حميد


    ما همني دنيا ولا همني مال = الرزق ياتي مثل هاتف مطرها
    شفي ومقصودي من الخيل مشوال = شقرا نواصيها كثير شعرها
    شفي عليها كان هو زعزع المال = ومن الهنادي صارم في طهرها
    وبالكف من غالي المطارق هوى البال = يروى بحزات اللقا من حمرها

    خميس الاسعدي


    واعانق القالات بعزم ليث = ولا زامل من شديدات الليالي
    ترى القالات لو كادت تهون = للقالات عقد وانحلالي


    ثواب بن طنف الجعيد

    ان ميل الميزان من قوم يمنا = صبرنا لها لوكان كبرت لهودها
    وان ميل الميزان منا على العدا = نروي من السم السقطري كبودها

    ابن فرج المغيري


    وياما صبرنا تحت شد الرحالي = وياما تصعبنا وزدنا بالأصعاب
    نوب نجي ذوب على الكبد حالي = ونوب نجي مر على الكبد غياب


    • الويل والتوعد

    تركي بن حميد

    لا خير في كثر الحكي والتماليس = هرجٍ بلا فعلٍ يجي به وهومي
    من لايدوس الراي من قبل ماديس = عليه داسوه العيال القرومي

    تركي بن حميد


    اما نوافق غرّةٍ تتفق لنا = والا مقابيسٍ تقدح شرورها
    يرجا لفزعتنا الى جا كميننا = بدهم الفرنج اللي وساعٍ قرورها
  • سلطان نايف العضياني
    عضو مميــز
    • Jul 2008
    • 1741

    #2
    أشكرك أخ أبو طالع

    وأزيدك من الشعر بيتين

    يقول بندر بن سرور

    فالرجل ثنتين حداهن يدلي=وان كبهن ماهوب ويا الرجاله

    لاصار مابه دين مع زين دلي=جعله من الدنيا تقطع حباله


    ويقول عبدالله بن عون

    ومن الزمان أخذ العبر بالرحاحيل=اللي منازلهم تهاوى بقعها

    ويافكرتي لا جيت بعض المداهيل=ولا شفت فيها عقب حي رتعها

    ألا رسوم دارسات مساميل=وبلاقعن شهب تهاوى بقعها


    ويقول عبدالمعين بن ثعلي

    الجود ورث جدود ناس بعد ناس=وهايب تعطى بحظ وتنافيل

    ولا طار من عش أبرق الريش قرناس=ولا يثمر الحنظل بعنبر ولا هيل

    تعليق

    • نزهان الروقي
      عضو ذهبي
      • May 2008
      • 303

      #3
      سلمت يمناك يابن ثعلي



      ارفع لك عقالي تعبيرا بإعجابي الشدشد

      تعليق

      • زعيم المراجل
        عضو نشيط
        • Jul 2010
        • 79

        #4
        يعطيك العافيه ياخوي على هذا الموضوع

        ماشاء الله عليك واكرر اعجابي

        تعليق

        • محمد العتيبي

          مشرف منتدى شعراء قبيلة عتيبه

          • Mar 2005
          • 10789

          #5
          بيض الله وجهك يابو طالع ..



          موضوع ثمين جدا ..



          وانتقاء فاخر للابيات والشعراء ..


          تحيتي
          ..
          [align=center][/align]








          [align=center]للتواصل عبر twitter تويتر


          al_bargawy@
          [/align]

          تعليق

          • جابر الشفيعي
            عضو نشيط
            • Feb 2011
            • 91

            #6
            بارك الله بك , شكراً أخي الكريم
            على هذا الطرح الجميل

            تعليق

            • أبو طالع العتيبي
              موقوف لمخالفة الأنظمة
              • Jan 2011
              • 836

              #7
              أشكركم علي مروركم المميز ورفع من معنوياتي والله يعطيكم العافيه جميعا

              تعليق

              العمل...