((العلم واسع ما يحيطه ابو الكيف ** اللي على الزلّات دايم رهاوي))

طي
X
 
  • التوقيت
  • إظهار
مسح الكل
المشاركات الجديدة
  • القارظ العنزي
    عضو نشيط
    • Dec 2015
    • 32

    #1

    ((العلم واسع ما يحيطه ابو الكيف ** اللي على الزلّات دايم رهاوي))

    العلم ضـــــــــــاع وضيعوه الملاقيف ** لا والله الا ضاع بين الــحــجـــــــاوي
    العلم يا مشكاي ما هو خــواريــــف ** وسوالف البدوان فوق الــنـــــزاوي
    يا حيف يا علمي غدا حـيف يا حـيـف ** يا ليتني ما عشت علم الـــخـــلاوي
    العامري العجلان ما هي تـخـاريــف ** مثبّت ما هي خـــــــروص وهقاوي
    مخاوي الكردة مع الرمح والسـيـف ** وعز الله انه للمراجل مـــخـــــــاوي
    وياما تجمل واكرم الجـــار والضـيف ** وياما تحمل من كــــبــــــــار البلاوي
    والجاهل اللي حدّرة يمت الســيـف ** واصبح يظنه بالنسب خوش شاوي
    وشلون يميز بين صــــــدق وتحريـف ** وشلون يميز خطوته بالــخـــطـاوي
    العلم صبرك في بحوث وتصــــانيـف ** وتدفع فلوسك كــــان تبي القراوي
    ولا تمل مجالس الـشـيـــخ غـطريف ** ولا تململ مع كثير الـشـــــكــــاوي
    واقطف زهر من كل مذهب وتوليـف ** واول ما تبدا في كــتـــــاب النواوي
    ورياضه اللي كنها روضـة طــريـــــف ** الياربعت وارتاح رجل شــــقـــــاوي
    وقبله لا تنسى كتاب ربك هو الريـف ** وعليك باللي كنزهن للفــتـــــــاوي
    سبع السور واطوال وايضا مراديـف ** ما تفترق الين يرفع ســـــمــــــاوي
    وايضا العقيدة علمها صـعـب ومخيف ** ما يقدره اللي ما بحــــــاله هقاوي
    العلم نــايـــــف واللي يقرا به منيف ** وباقي الملا ما بين ثرد وخـــبــاوي
    وقالوا قديم فاقد الشي ما شــيــف ** ما ينفعك من ضـــــاع علمه عزاوي
    الفارغ اللي راح عمره تــعـــاريـــــف ** لولا ختوم الـــشـــيــخ ما له براوي
    الياصــــار ما لك علم وما لك مواليف ** تجلس مع الجهال مثل الحـسـاوي
    لا قدروا شــــــرواك ولا جيتهم ضيف ** ولا حددوا منزلك بين الــقــــهــاوي
    والعلم واســــع ما يحيطه ابو الكيف ** اللي على الزلات دايم رهـــــــاوي
    ولا يـحـيـطـه غير رجل ما هـو طـيـف ** صبّار بالقعدات رجل لــــحـــــــــاوي
    يصبر على عـلـمـه ولو يـكـرد اللـيـف ** ولا عاب ابن عباس خبّ الـمــهـاوي
    ياما قعد في باب شـيـخـه مع الهيف ** يصبر الياما الشيخ يطلع ضــحـاوي
    هذي هي السيرة وفضل التصانيف ** للي على جمع المعارف شــفــاوي
    وصـــلاة ربي عد من صلى بالـخـيـف ** وبين المشـاعر والحرم بالتـسـاوي
    على شفيع الخلق في يـــوم مخيف ** يوم بـه المغرور ينسى الــعــــراوي


    القارظ العنزي ـ بقلمي
    تم التعديل الأخير بواسطة القارظ العنزي؛ 16-Jul-2016, 07:30 AM.
العمل...