بين (( شمر )) و (( عتيبه )) ...!!!

[اخو رثعه]

قال الشاعر / نايف بن بندر بن محيا العتيبي

هذه القصيده مدحاً في شمر ورجالاتها . واتى الرد من الشاعر نهير الحسيني الشمري

يقول بن محيا العتيبي :

من لايخاوي شمر الجـود غلطـان
..................................... من غير نقص في جميـع الحمايل

خويهـم والله مايبلـش بالأحـزان
...........................................اليا نخاهـم يصبـح الهـم زايـل

خويهم يحظـى بتقديـر واحسـان
........................................مع حشمه وتقديـر للفخـر نايـل

شمر هل الطولات لاقيـل فرسـان
..................................وقت السيوف المرهفه والأصايـل

شمر طنايا يوم زيغـات الأذهـان
......................................عدوهـم شـاف النجـوم الهوايـل

شمر اليا قلنا هل السيف شجعـان
....................................قالوا : نعم صادق اشيوخ القبايل

شمر لهم تاريخ في ماضي الأزمان
...................................فيه أطيب العربان تضـرب مثايـل

وبوقتنا الحاضر بهم بوش بلشـان
....................................ورّوا علوجـه فالعـراق الهوايـل

شمر هل النوماس في وقت الأكوان
....................................اللـي يـردون الملايـل غلايـل

اللآبه اللي ذكرهـم للعـرب بـان
......................................ياكـم ثنـوا لاصيحـن الحلايـل

شمر مقر الجـود للجـود عنـوان
...............................لايابعد حي العـرب ياهـل حايـل

شمر سناعيس على الضد بركـان
.............................يشهد لهم فعـل السنيـن الأوايـل

بنوا اشعار الجود في طئ بنيـان
.............................لو زالت الضلعـان ماهـوب بزايـل

شمر لمن يشكي من الضيم مزبـان
...................................لاصارت الحيـلات عنـده قلايـل

والله لايرجع بعد الأحزان فرحـان
..................................ينزاح حملـه بعـد ماكـان مايـل

مهما كتبت بشمـر الجـود قيفـان
..............................ماني ملحق ذكـر كـل الخصايـل

ماقلت غير الحق والحـق سلطـان
...............................قلت ومعي حجـه وكـل الدلايـل

الرد من الشاعر القدير / نهير الحسيني الشمـري :

هات القلم واكتب جديـدات الأوزان
..........................واكتب سلامي في جديـد المسايـل

وصل سلامـي والتحايـا لحـوران
....................................حـر تعلـى فـوق كـل الطوايـل

نايف ولـد بنـدر سلايـل كحيـلان
....................................ابـن محيـا ياعـريـب السـلايـل

البيت مايبنى علـى غيـر سيسـان
.....................................للعـلـم نـقـال وللـقـول قـايـل

وانا دليلـي ياهـل العـرف مليـان
..............................مليـان بعلـوم الصخـا والشكايـل

عليـك بالعتبـان إليا صرت بحـلان
................................لا قفلت دونـك جميـع الوسايـل

عتبـان ياقلنـا كــلام بحسـبـان
................................عتبـان ستـر منقضـات الجدايـل

عتبـان لاصـارت عجـاج ودخـان
...............................يردون علم المـوت علـم صمايـل

عتبان لاعدوا هل الطيـب والشـان
.................................مـع اول العربـان قـول وفعايـل

عتيبه كمـا سيـل محاديـر جيـلان
.............................لاساقـه المولـى كريـم السبـايـل

أهل النقا والجود فـي كـل ميـدان
.................................أهل الحميـا والعلـوم الجزايـل

للخايف المضهـود عـزوه وخـلان
................................وللخايف الموت الحمـر والغلايـل

وحنا الطنايا ماكـر الجـود يافـلان
.................................لاعـودت للسيـف قـدح وفتـايـل

الذيـب عشينـاه حيـل وخـرفـان
...............................للطيـب نتعـب ومانـدور بـدايـل

وهذا مـردي فيـه شكـر وعرفـان
...............................للابـه اللـي كـل فعولـه جلايـل

لـ/ روق مـع برقـا شبـاب وشيبـان
............................من غير خص في فـروع العوايـل

والمعذره وان كان كان بالقاف نقصان
............................منـك السموحـه يارفيـع النزايـل

تم الكـلام وزبـده الهـرج نيشـان
.............................ورد الجمايل حـق لأهـل النفايـل

آخر تعديل اخو رثعه يوم 21-Jun-2010 في 12:01 PM.

[بندر النفيعى]

شمر وعتيبه

محبه بينهم واعجاب متبادل لا يعرف سره الا الله والرجال الطيبين


وصفات مشتركه كثيره ان لم اقل متطابقه وعلاقه بين هاتين القبيلتين


يجب ان تدرس في علوم الاجتماع في الجامعات .

[مرزوق حمدان العتيبي]

..

.

تتعب وانت تمدح فالسناعيس
انشهد انكم اهل قاله وطاله
..
ولا فيه نقص في عموم القبايل ..

هذي العلوم اللي نحرص عليها ونتنومس بالرد عليها
وهي سبب في تألف القلوب وزرع الود والاحترام بين ابناء الوطن
واخوة الدين ..
كيف لا وهي مزارق طيب وسلوم رجال ..

لاهنت يالشمري ... وبيض الله وجه بن محيا والحسيني
..

التوقيع

فدوة ٍ للمصطفى روحي وماتملك يميني = كيف (لا) واللي خلقني حط حبه في كياني حط حبه في كياني ماتغيّره السنيني = وانثني من دون عرضه بالذراع وباللساني @Marzouq_MHD

[فيصل المسعودي]

لا غرابه

فالطيب بين الطيبين موجود وباقي

وعلاقة الشمري والعتيبي

مثال للعلم الطيب في كل مكان منذ القدم

صح الله لسان العتيبي وصح الله لسان الشمري

وحياك الله ياشمري بين إخوانك

[ابن مشيب]

بيض الله وجهك ياخو رثعه , وصحت السنت الشعراء , وقولة ونعم ماتنقصر دون عيال الحمايل من جميع القبايل , وياليت جميع المشاركين يحذون حذوك في هذه المشاركة , ويبحثون عن المواضيع المؤلفة للقلوب ويتركون مواضيع الاستفزاز بين القبائل.



تحياتي

[ولدعساف]

شمر وعتيبه عينين في رأس !!

,,

ويعلم الله أن أقرب و أحب القبـآئل إلي شمر !!

,,

وصح لسان العتيبي و لســآن الشمري .. وبيض الله وجهك على النقل ودي وتقديري لك !!

التوقيع

قال أبوبكر الصديق - رضي الله عنه - ( الموت أهون مما بعده، و أشدّ مما قبله ) حسبي الله ونعم الوكيل كتبت وقد أيقنت يوم كتابتي .. بأن يدي تفنى ويبقى كتابها فإن كتبت خيراً ستجزى بمثله .. وإن كتبت شرا عليها حسابها

[العــــــــابر]

تبقى عتيبه الهيلا وشمر الطنايا

فخر للاسلام والعرب

ومضرب مثل للكرم والشجاعه والاخوه

التوقيع

سبحان الله وبحمده سبحان الله العظيم سبحان والحمدلله ولااله الا الله والله اكبر ولاحول ولاقوة الا بالله

[سناعس]

تشكرا على هالقصيدتين الجميلتين

والحقيقة ان شالله ان كل قبائلنا بينهم التواد والاحترام متبادل حتى وان اختلفنا مع العتبان في التاريخ

او مع العنوز في وقت اللزوم ان شالله كلنا اخوان


والحقيقه ياخوان برغم من كل النقاشات التي تدور بين شمر وعنزة في هذا المنتدى الا ان لي زميل

بالمدرسة عنزي وكل يوم اقوله وش صار وونضحك ونتناقش ونتعاند والله ونعم الرجل


وهذا ينطبق على الجميع احيانا نتسلا فلابد شوي من الاكشن ههههههههههههههههههه

والا كل قبيلة فيها خيره وشرها وكل قبيله فيها الطيب والردي وكل قبيلة لها انتصارات وعليها هزائم

والله يديم الامن والامان وطاعة الرحمن

[الرومي]

ونعم بشمر ونعم بعتيبة ربعي من غير قصور في القبائل .

التوقيع

migeed33@hotmail.com

[اخو رثعه]

لاهنتوا ثم لاهنتوا ثم لاهنتوا

كلن بأسمه .

وعسى الله يديم المحبه والآلفه بين قبائل نجد