الصمان موطن قبيلة مطير

[عوني وخوالي روق]

بسم الله الرحمن الرحيم
لكل مقام مقال
اخي طنيان الواضح انك انسان تحترم نفسك ومؤدب وليس يستغرب منك
ذلك فأنت من قبيلة لها التقدير والاحترام
ولست مثل صعصعه الذي يتطاول ويستهزي باحمران النواظر
ويقسم الصمان ويقول
لنا ياسبيع ( نصه ) والعجمان ( ربعه ) ومطير ( أقل من ربعه )ومره أعطانا العجمان الصمان ومره اخرى يقول نزلناه على وقت الملك عبد العزيز ؟؟؟؟
بالله هذا كيف تخاطبه !!!!
لهذا لكل مقام مقال
اخي الكريم لايستطيع احد ان يزور الواقع الموجود
المهم لدي عد ديار سبيع وحددها لاهنت عشان يبين الحق
يقول عجران بن شرفي السبيعي

حتى ايش يابن فهيد لو كـان كشـاف
بـارق خريـف يــم دار مـصـده
عسى الحيا يسـي لنـا وادي الغـاف
ومن روضة التنهـات لخريـم حـده
عساه ياعيد النضـا غـب الانكـاف
عسـاه يسـي المربـع اللـي نـوده
حدر على الصمـان للبـرق رفـراف
لا بكـر الوسمـي علـى مستـعـده
المربع اللي تدهلـه سمـر الاشعـاف
قدامهـا الصـقـار طـيـره يـهـده
ياماحـلا العشـب فالقـفـر لا زاف
وجني الزبيدي فـي عـذا كـل خـده
دار لنـا فيهـا مقيـظ ومصـيـاف
ومشتـى ومربـاع وكــل نـضـده
دار وليناهـا بـضـرب بالاسـيـاف
يـوم ان كـل حاميـن ورث جــده
منها العتيبـي نرفعـه فـوق يطـاف
والدوسـري عنهـا جنـوب نـحـده
وراكان عنهـا نقلعـه يـم الاسيـاف
ولا المطيـري عـارف راس حــده
لا جاء نهار فيه زوغـات الاسـلاف
ثـم كـل بـد قـام يظهـر لـبـده
لي لابة ركبوا علـى كـل مزغـاف
وتحيزمـوا مـن فوقهـن بـالاعـده
ياجاهل فـي لابتـي مانـت عـراف
حريبهـم يمسـي وكـبـده مـضـده
كم شيخ قوم لا نوى الله لـه اتـلاف
من ضرب ربعي ياكل الرمـل خـده
في ضف ابو تركي ذرى كل من خاف
عـز الرفيـق ومذهـب المسـتـرده

لوتتكرم وتقولي ديار سبيع وجهاتها في الصمان اكون ممنون لك
تحياتي لك وأختلاف الراي لايفسد للود قضيه عند العقال وانت منهم

[الشرقي]

أول كذبك هالقوم اللي حطيتهم إمطير دون مصدر ياالربادي , جاوب وش المصدر اللي يقول مطير اللي زبنو علي القبر ياطنيان !!!!

[طنيان]

المشاركة الأصلية كتبت بواسطة الشرقي

أول كذبك هالقوم اللي حطيتهم إمطير دون مصدر ياالربادي , جاوب وش المصدر اللي يقول مطير اللي زبنو علي القبر ياطنيان !!!!

بسم الله الرحمن الرحيم

الاخ الشرقي الربادي هو الجاهل مثلك اللي يجهل على الناس من غير موجب ولو كنت عاقلا ماطالبتني بالدليل والدليل بين يديك وان كان راويتك الهطلة فكل سبيع رواة وهذا شعر بعض شيخانها وسبيع توارثت اب عن جد ان الركب مطران ولو طالبني عاقل رديت عليه لكن اللي مثلك اقول له لا اومن بالمثل الذي يقول خذهم بالصوت لا يغلبوك وكما قال الشاعر
الا لا يجهلن احد علينا فنجهل فوق جهل الجاهلينا
والصمان مقسوم بين ثلاث قبائل الاولى سبيع والثانية العجمان والثالثة مطير فاذا اردت ان تكتب فعليك بتحري الدقة لان ديننا الاسلامي امرنا بما فيه التواصل ونهانا عما يزرع الخلاف ونحن واياكم عواني وجيران كما اننا اخوال لبعض الدوشان فلكم علينا صلة الرحم ولنا عليكم الصدق والتعامل الحسن مع المرويات من طرف واحد والتي تثير حفيظة ابناء سبيع الغلباء لانها لاتوافق كبد الحقيقة وهذه ابيات من قصيدة للشاعر محمد بن حيلان الادغم السبيعي رحمه الله تبين بعض ماتجاهلتوه

يقول الادغم يوم هاض المجالي
= بعد الفعول اللي علـى الوكيـد

اول جوابـي باديـن ذكــر الله
= الواحـد المعـبـود الوحـيـد

حنا سبيع اللـي نضـد عدانـا
= حريبنـا فـي كبـده الوقـيـد

يشهد به الله ثـم يشهـد فعلنـا
= ويشهد به العاقل مـن الضديـد

احدن حما الوديان وعدا حدودها
= من جـا يبيهـا رجعـوه زهيـد

كل يبي من دارهم وعيـوا بهـا
= من ذاق مـس فعولهـم يحيـد

مثل الحنو والخفـق والشعبـه
= والقرين والجوفا والقتيل شهيـد

دون المعقـل والنخـل والحلـه
= العصـر الاول فعلهـم مجـيـد

جرت صولات من عداهم عليهـم
= لـوابتعـدد مالـهـا تعـديـد

من هازهم ضرس الندامه يعضه
= يرجع معيف عقب نقـل الكيـد

واحدن خذا لـه ديـرة مسميـه
= ملاكهـا الاول حــدوه بعـيـد

من سعد تشمل الى شمال الحومه
= دار خذيناهـا بفـعـل الجـيـد

مرباعها الصمـان لازان نبتـه
= غصبن على الزعلان والحسيـد

يحدنـا ساقـان يـم البـرابـك
= من دونها نروي شبـا الحديـد

كم نوبة من جاء يبيهـا نـرده
= بمصقـلات فعلـهـن شـديـد

ثماااان هيات من عدانـا علينـا
= وفـي كـل هيـه فعلنـا يزيـد

منها السبيه والرضيمه وقمعـه
= ومحقبـه يـوم علينـاعـيـد

ويوم العريق ويوم ضبع المسمى
= حـذف الزنايـج مالهـا تعديـد

ويوم السهبا وهيـة الوسميـه
= فـي كـل يـوم فعلنـا جديـد

ضديدنا نسيـه بالمـر والطنـا
= وللصاحب احلى من حليب الديد

وهذي فعايل لابتـي ورسومهـم
= وعيب على من قال غير وكيـد

وختمان ماقلت الصلاة على النبي
= اعـداد ماهـز الهـوا الجريـد

ومن الايام التي ذكرها يوم الحنو والقرين عام 1336هـ لاهل الوديان ويوم السبيه سنـــــــــــة1245هـ ويوم الرضيمه سنــــــــة 1238هـ ويوم ضبــــع سنـــــــــــة 1281هـ والشاعر من الدغمان حمول الخيل بسبيع وقد حدد البلاد والايام وجعل من الجنوب رحية جنوب غرب سعد والواقعة حاليا في ميادين الحرس الوطني الى حومة النقيان في الدهناء شمالا وفي الصمان قصر الحد الى جو ساقان والبرابك الا ان المتوارث ان فيضة حسنا السبق المسماة عند البعض سبوق حسنا لسبيع و شمالها جو السبيق للدوشان وسبيع محالفين السيوف على الدهر في هذه المنطقة من القرن الثامن وهذه القصيده للشاعر : مفرج بن لهيلم بن صالح بن
مسهي الظهارين العيادين بني عامر السبيعي رحمة الله :

بديت بسم الله جلت عظمته
اللي خلق نفسي واعلم بحالها

اللي جميع الخلق ترجي رحمته
لا حيسبت نفس(ن)عن كل اعمالها

سندت حاديني زمان(ن)هين
ولقيت كل(ن)له سلوم(ن)لحالها

وارتاح بالي عقب ماجيت ديرتي
محتكمة(ن)بالنبت عقب حيالها

دار ليا جاها الشريب يقدم
مهوب يفهق لين تروى نهالها

وليا اهتنا بالشرب منها وعطُن
صدر لمضماها رغب وانثنالها

جحادة(ن)بالنبت في وقت الشتاء
لازل منها البرد عقب اجلالها

الله مواسيها لنا من حظنا
العد بين عروقها وجبالها

خمس وثلاثين باع طولها
ماها قراح وينبسط نزالها

ديرة بني عمر واولاد عامر
اللي تؤرخ بالكتب افعالها

شماليها الدويش واولاد علوا
حمول الخيل اللي تواما اذيالها

وشرقيها العجمان قوم(ن)لظيه
رجال تشيل من الحمول اثقالها

وجنوبيها الدواسر الاد زايد
اللي ترادا بالحدي اجمالها

دار حميناها بفعل ايماننا
كل(ن)يبيها مير ما حد نالها

دار خذيناها من ال عريعر
اللي حمت بيض الحباري رجالها

ماسبهم والله رقيب عليه
نعمة اجواد(ن)مير ربي زالها

نرعى مشاعيف البكار بدارنا
وإنُا على قب الرمك في كفالها

لامن لحقناها وسيق(ن)تعاطفت
تمشي بهون ويرضعن عيالها

كم شيخ قوم(ن)قد عرجبه وسطها
النود تدفن خدته من سهالها

نرعى عثاعثها ونرعى عروقها
ونذبح جوازيها ونطرح غزالها

عوامر(ن)سم(ن)لكبد المعادي
يمسي ويصبح يشتكي من ملالها

يحوفون في الليل ويغيرون بالضحى
وان طاردوا خيل(ن) يحق جفالها

ياما اطلقوا في ليلة(ن)من خليه
ماتعطي الوحده يمينك شمالها

جونا من اهلهم يبون ابلنا
وسروا بليل واضربوا مدهالها

وكانوا عليها في فلاة مغره
تخززوا من جلها وجهالها

ولحقوا هل البل فوق قب طلايع
ترعب ذليل شاف عجل ازوالها

وتطابحوا مخاذت الابل دونها
وقامت تلافت تنتخي خيالها

وردوا عليهم مثل ميراد القطا
الكل مهملها ومرخي حبالها

خمسة عشر رجال في حين وردنا
راحوا قضى لغنيم يوم اجتوالها

لكن صقع سيوفنا في روسهم
صقع البرد فى المنخدم من سحالها

كله لعينا كل ملحا مشمله
يرويك قدام العطيف وشالها

كله لعينا كل وضحا مورسه
تمارق غاربها تضافا سبالها

تمت وصلى الله علي سيد البشر
عد النبات وعد منشي خيالها

وباقي القصايد عندكم خبرها مثل

حنا رعينا العشب بالصمان
غصب عليكم ياعلي

ومثل

ابشر بخيل فوقها سبعان
خيالهم ما له لدي

ومثل

جانا علي وفي يده مفراص
وعيا على تال المغاتيري

منها القريفة طاح فالمداس
وخلي لعغكف المناقيري

وفي كل خير

ومطير حمران النواظر عطيبين
الى تعلوا فوق مثل الشياهين

ولكن الحق احق ان يتبع وانت سالم وغانم والسلام

[أبو عمر الصعيبي]

المشاركة الأصلية كتبت بواسطة طنيان

بسم الله الرحمن الرحيم

اخوي عامر بن صعصعة السلام عليكم ورحمة الله وبركاته وبعد داب بعض محرفي التاريخ على ادخال احداث معركة الرضيمة على معركة السبية لهدف واضح وجلي اصلحهم الله وليعلم الجميع ان كل معركة منها لها معطياتها واحلافها ومصالحها فسبيع بن عامر الغلباء كانت مع ابن عريعر بالرضيمة وهم الذين هزموه بالسبية والدواسر والمطران كان ضده في الرضيمة ومعه في السبية ومن الكبر غمط الناس وتتزيف الحقائق وسبيع قبل مطير في الصمان بخمسة قرون والحد الفاصل بينهما في الوقت الحاضر هو السبيق لاصقه الدوشان وفيضة حسنا السبق لسبيع ويكفينا فخرا اننا حللناه بقوة السيف وليس عطية من احد ولا ينكر الحق رجل فيه خير والقصائد اثبت من كتب التاريخ في اغلب الاحوال لان قائلها ممن حضروا تلك المعارك وراها عن قرب اما من يكتب التاريخ فالغالب انه لم يكتب المعركة عن مشاهدة بل سماع من بعض الخصوم وهو قابع في قريته ومن اهمهم ابن بشر رحمه الله صاحب عنوان المجد في تاريخ نجد وكان معاصرا فقد جعل الشيخ فهيد بن مبارك الصييفي رحمه الله محاربا مع ابن عريعر ضد سبيع و هذا خلاف الحقيقة والواقع والشيخ
الصييفي هوالذي زبن على قبره بعض محاربي مطير في قصة مشهورة بعد مااحاطت بهم سبيع احاطة السوار بالمعصم فعفوعنهم اكراما له وهو ميت ةنستشد لهم بشعر الفرسان ويستشهدون لما بشر الهطلة المعاصر وتلك اذ قسمة ضيزى قال الفارس الشاعر محمد بن سعيد بن مشعان الطنباوي العريني السبيعي رحمه الله

ويحدنا من شمال ديار علوى
اهل سربة تركض على البارود

واذا حدرنا فاذا ال معيض حددانا
اسود تاقف في نحور اسود

ويحدنا من جنوب الاد زايد
كم واحد من ضربهم مفقود

وقد ذكر الشيخ محمد بن عمر الفاخري في تاريخه انه قبل السبية بسنتين امر الامام تركي على محمد بن عيدان امير سدير ان يدفن حفر العتش ليقطع الطريق على حملات بني خالد كما امره بدفن ام الجماجم والدجاني لنفس السبب والسبية لم تسمى بذلك لكثرة السبي كما اجتهد ابن بشر بل ان هذا اسمها من الجاهلية وقد ذكر التسمية البكري في معجم مااستعجم وياقوت الحموي في معجم البلدان وغيرهم وقد قال محققوا تاريخ ابن بشر طبع المعارف وعلى راسهم علماء ال الشيخ محمد بن عبدالوهاب في قول ابن بشر انها سميت لكثرة ماسبي فيها ان هذا التعليل فيه نظر اي خاطئ فالسبية قديمة وهي اقواز من الرمل تقع شرق الدهناء وقد جاء ذكر السبية في شعر ذي الرمة غيلان العدوي بقوله

وقد جعلوا السبية عن يمين
مقاد المهر وانتجعوا الرمال

ومما ذكره ابن بشر ان ممن اجتمعوا مع بني خالد على حرب سبيع في السبية ضويحي الفغم رئيس الصهبة ومن اهم اسباب النصر وفاة ماجد بن عريعر في اول رمضان وفي اخره كانت الكسيرة على بني خالد واحلافهم ويقول ابن بشر بعد الهزيمة في السابع والعشرون من رمضان ولاسلم منهم الا الشريد على ظهر فرسه الا بعض فرقان من مطير هربوا بابلهم واقول هم الصهبة مع الفغم وقال ابن بشر في السنة التي بعدها وفي شعبان سار الامام تركي بجنود المسلمين وقصد جهة الشمال فصادف فهيد الصييفي من سبيع باتباعه ومعهم اخلاط من بني حسين وغيرهم نازلين بين حفر الباطن والوقبا فاخذهم وحاز اموالهم فحضر عنده رؤساؤهم وادعوا ان لهم عنده ذمة وعهدا واقول ان الذمة والعهد بسبب السبية فرد عليهم جميع مااخذ وادعت مطير ان الارطاوية لها قبل الرضيمة ولم تكن مطير بالارطاوية قبل الرضيمة لان الارطاوية في ذلك الزمان مزرعة قائمة لابن عبدالكريم ال معمر ولم تقطع للاخوان من مطيرالا عام 1332هجرية على زمن الملك عبدالعزيز رحمه الله اذا الرضيمة غير السبية وتتغير الاحلاف تبعا للمصالح فمطير والدواسر والعجمان ضد ابن عريعر في الاولى ومعه في الثانية وسبيع معه في الاولى ضده في الثانية والقاعية وعرقي ام رقيبة ملك لسبيع الى النقيان وقد انتقلت ملكية القاعية لمطير في عهد الاخوان وكان شعار قبيلة سبيع في معركة ام رضمة القاعية ياثاير قال الشيخ فيصل الدويش رحمه الله من قصيدة ارسلها للشيخ علي الازمع ابو اثنين رحمه الله الذي قتل في معركة روضة مهنا

حنا رعينا في طرف ساقان
غصب عليكم ياعلي

فاجابه الازمع

ابشر بخيل فوقها سبعان
خيالهم ماله لدي

فتمم الشيخ علي الازمع ابواثنين كلامه واخذ المعيد اوالودائع الوضح ابل الدويش شيخ مطير فاستماتت مطير للدفاع عنها الا ان سبيع بقيادة الشيخ علي الازمع ابواثنين احتموها وروحوا فيها وهزموا مطير دونها بعد ان جندل الفارس الشيخ القريفة رحمهم الله جميعا فقال الشيخ فيصل الدويش رحمه الله

جانا علي وفي يده مفراص
وعيا على تال المغاتيري

منها القريفة طاح فالمداس
وخلي لعكف المناقيري

وقال الشاعر الامير عبد الله بن رشيد

ولايستشك ياحسين كود الرديين
والا ترى الطيب وسيع بطانه

وكلامي هذا ليس تقليل من شان قبيلة مطير العزيزة لان مطير قبيلة عريقة من مدحها ماسرها ومن قدحها ماضرها وهم من بوادي نجد المتاخرة ولكنه ردا على متطرفيهم الذين ناتيهم بالادلة ويجاوبوننا بقصائد الهطله وقد قالت احد شاعرات القبائل بعدما قتل الحمادين بقيادة عقوب الحميداني حجيرها وقائد سربة بني عمها

ياحلو مقطانكم يامطير
ميرالبلا كان شديتوا

يامطير يامشبعين الطير
في سهلة وان تنخويتوا

وقال الاخر

ومطير حمران النواظر عطيبين
الى تعلوا فوق مثل الشياهين

وموجب كتابة ذلك ان الاخوة القائمين على منتديات قبيلة مطير العزيزة اخذوا الصمان وادعوا انه يخصهم لوحدهم وانكروا ملكية السبعان له بالسيف وانكروا مايخص العجمان ولم يسمحوا للسبعان بان يسمعوهم وجة نظرهم المبنية على الشواهد التاريخية من قصائد واسماء اعلام وغيرها وقد سجلت في منتداهم منذ سنة ولم يفعل معرفي الى يومنا هذا خشية تبيين الحق والحمد الله الذي اتى بهم عند الهيلا واعترضوا في موقع السادة الاشراف على ماجاء في سيرة الشيخ صنيتان ابو اثنين رحمه الله والحديث ذو شجون يجر بعضه بعضا والبادي اظلم والحبل على الجاره وانتم سالمين وغانمين والسلام

سبيع قبل مطير بخمس قرون .. اهل العشر لسبيع ولاهي لمطير

وعندي معلومه جديده يقولون سبيع قبل ادم ....

حنا من الحرة للمجره ماهو من الخرمه لرماح

[الشرقي]

ياطنيان أنا موفقت بواحدن ياخذويعطي وبك ياطنيان سالفة القوم إنهم مطير من تاريخ كديميس العصيمي , سؤال جاوب عليه تعرف وإلا لاء , عجران بن شرفي ورا ماذكرهم وقال مطير جاوب لاهنت , إبن خثلان ورا ماذكرهم وقال مطير جاوب لاهنت , الشاعر الشمري ورا ماذكرهم وقال مطير جاوب لاهنت , أحاديث السمر لعبد الله بن خميس ورا مقال مطير جاوب لاهنت , ألمؤلف السبيعي ْْ{ الحضبي } ورا ماذكرهم وقال مطير جاوب لاهنت , من أدابنا الشعبيه لمنديل الفهيد ورا ماذكرهم وقال مطير جاب لاهنت , ياطنيان جاوب ياطنيان جاوب ,

[طنيان]

بسم الله الرحمن الرحيم

ياابو عمر الصعيبي المطيري بعد السلام هود هود لان من قال بالناس قالوا به ومن عال ياتيه عيال وسبيع محاربة ملك الاحساء في اول القرن الثامن على الصمان وعشرهم المردف قبل عشركم بمدة تزيد عن القرن قليلا ولغة قصيدتها تدل على زمنها الا ان كنت ماتفهم بالقصيد ماهي لغة القرن الرابع عشر
يوم عدى الرقيبة راس مشذوبة
وعيب عليك هالاسلوب الاستفزازي نروي لك القصائد عن الفرسان الذين عاصروا الاحداث وتروي لنا قصيدة الهطله الحي الموجود وتقول سطروا اروع البطولات في جيانه فلماذا سمي جو عوجان والا تعلم ان عوجان هو ابو اثنين وتقول حاذة وحاذة للعقايلة من شبابة و لا هم من خندف وقد قال جدهم للشلاحي انا طير في راس عود لي مع زهران جدود ولي مع عتيبة عهود ولي مع مطير حبل ممدود والموهه سموا على حلفهم بمويه هكران واهل جنوبي نجد الجبلان من بني تميم وسامة المغزل من الجاهلية واللي ينتخون بصبحا اما شيخ مطير فذبحه ابن بخان العاصمي بالمشعاب وحمران النواظر عنزة قبل مطير ولما ذبح لكم الادغم الصميلي السبيعي راع الحصان الاسود الادهم جديع بن هذال صارلكم في جوها مسكان والدليل حصان ابليس والاقبلها تعلقون العاني عليه وبعدها نقلتوا مدافع الباشا الفرنسية على ابلكم لهدم الدرعية اللي كنتم تدفعون الزكاة لها والله يرحم موضي البرازية اللي تقول وعدون سكن وادي الراك وسبيع ترعى الى دكاكة مويثل وتملك حسنا السبق وجو السبيق لاصقه الدوشان ولا تنسى قول راكان بن حثلين للدويش انا حصان بين حصن تتصاهل وانت حصان بين رمك وما غلب المكرمي واهل نجران الاسبيع حيث قتلوا منهم اربعين رجلا كما ذكر ابن بشر في حاير سبيع في معركة الحاير الثانية واعظم فارس قتل في الرضيمة خزيم بن لحيان شيخ البرازات السهول ومدفن فيصل العور اسمه دكيكة فيصل وليس دكاكة فيصل يامحرفة السوالف والدكاكة لمويثل والمعيد من نصيب سبيع اخذوها من الدويش والطوافح اخذوها من ابن عريعر بالسبية ويقول شاعر العجمان

اللي يبيله من عياله بضايع
قله يوصيهم مع اللي ينيرون

ولاتحدنا يامطيري على ذكر اللي ماتبونه واستح من الله قبل خلقه والبادي اظلم والجروح قصاص والحبل على الجارة ولا عدوان الا على الظالمين والحمد لله رب العالمين والصلاة والسلام على اشرف الانبياء والمرسلين

آخر تعديل طنيان يوم 10-Aug-2007 في 01:35 AM.

[المهنّــــد]

تم اغلاق الموضوع لانه استوفى حقه كاملاً من المناقشه وطرح وجهات النظر من جميع الاطراف .