العمــــــدة
يا معجب والليالي مستديرة بين خير وشر=وراسك شاب نصه بين مقفيها ومقبلها
علامك كلما قلدت فارس بندقية فر=من ارض المعركة والبندق اللي معه ما ارسلها
معجب العتيبي
عسى الله يكتب الخيره ويصلح نية المغتر= ونفهم نية اللي نيته دايم يبدلها
انا مااجند الا واحدٍ وقت اللزوم يسر=يعز الدار واهل الدار واصحابه يجملها
العمــــــدة
صواب الوقت غاير والمدينة تحت رحمة زر=وضغطة وحدة وتشوف عاليها على اسفلها
ثلاث سنين للقوات .. خلفك در امامك سر=وتاليها ثلاث ارباعها مانته محصلها
معجب العتيبي
والا ياصاحبي ماكل من يسمع من رؤا عبر=لكن لامن عرفت السالفه قدم العرب قلها
انا لامن مسكت الجيش ماعطيهم وراكم در=يجيبون النصر واهل الخزا تدمر معاقلها
العمــــــدة
تراك ان ما فقدت اللي غدى لك فالبحر والبر=أهمية عناصرك القيادية تقللها
يحن الموتر اللي طال ليله في طريق الكر= وفوقه حملةً ماعاد عنده حيل ينقلها
معجب العتيبي
علينا نعطي ادروس ونظهر من بحرها الدر=وراع الغلطه اليا ضيّع الدرس يتحملها
حديث الرجل عن نفسه من احقوقه واضنه حر=لكن حقوق غيره ليش ياهل العرف يهملها
العمــــــدة
لو انك قبل تغريك المناظر فاحص المخبر=وملزم كل دفعة بالقســــم قــــــــــدام تقبلها
جمدت من الشتاء وانته مولدّ في بلاد الحر=لكن اقرب من الدفاية وحــــــــاول تشغلها
معجب العتيبي
شعوب الارض واجد والعدد جاوز عداد الذر=لكن اشره على اللي في دروب السو زاملها
تقوله وانت شايب والد وذقت الحلو والمر=ولك خبره مع اهل العرف ياعمده نسجلها
العمــــــدة
طوارك دربه تدريب شامل ثم قله طر=وباقية الطيور .. الناس ما تبغاك تكفلها
ندفك للمعـــــالي دف ياللي جيتنا مفتر=ونارك دخنت واظن ما يمديك تشعلها
معجب العتيبي
تقوله ياعزيزي وانت جالس فالدفا تشخر=ولاتدري عن اللي داخل الجبهه وتجهلها
ياراع الفعل ليتك بالفعول الكايده تضفر=ونفسك عن كلامٍ فات ياليتك تعدلها
العمــــــدة
ترى شيبوب يدري عن طناخة سيده عنتر=لكنه ضاق والمفروض يد عنتر يقبلها
كرام الناس لضيوف الكرامة تذبح وتنحر=ولقمة سويت لك يا وسيع العرف تاكلها
معجب العتيبي
مدامه عارفٍ كل الحقيقه ليش جا يزمر=علامه يزعج العالم ونفسه ليش بهذلها
من اهل الطيب والماجوب جاك السمن قبل البر=هديه ياوسيع العرف والمطلوب تقبلها
« آخـــر الـــمـــشـــاركــــات »
30-Dec-2009, 11:28 PM
العرض العادي
