لقتني في نفود السر

[ناصر الحافي]

السلام عليكم ورحمة الله وبركاته


اهديكم هذه الغزليه وامل ان تليق بذائقتكم

على طاري مجال الحب سجل وصفة العشاق = تجي عندي وتنخاني بيوتاً كنت ناسيها
اغنيها مثل ماجات واكتبها على الاوراق= وانا ضامن يجي ويروح حافظها وقاريها
طواني هم تفكيري ولجت فالضلوع اشواق = احسب في هواجيسي عسا ربي يسويها
سهرت الليل ولحالي وطعم النوم ماينذاق = افكر كيف بنساها وترجع لي طواريها
افكر في ملامحها غروب الشمس والمشراق = خلقها الله مكملها وكل الزين معطيها
مجملها بجسما زين ورافعها بطول الساق = وخصراً كنه مجوع ورب الكون حاليها
عيوناً سود ذباحه تمايل من غنج ودقاق = سقا الله بالمطر ديره تجي فيها وتمشيها
ولاتعرف مداينا ولاحطت لها سواق = تحب الستر مصيونه وشايبها مربيها
تعرف سلوم والدها وتحفظها وفالاعماق = دروب الظلم دناسه ولكنً ماوطت فيها
تحب الله وحاميها تخافه حسنة الاذواق = عنود الصيد ماجاها حسود العين راميها
كلام الناس لايمكن يكدرها على الاطلاق = يميزها ثقه فالنفس وكلا مايواذيها
لقتني في نفود السر وصدت من حيا واخلاق = تمشا في صياهدها واباعرها تباريها
قربت بموتري وانشد لقيتو لي ثلاث نياق = عليها وسمنا الروقه مغاتيراً مواريها
وهزت راسها مدري وربك يعلم الرزاق = واذا ناوي نياق العود والله مانخليها
وانا عارف وخابرها ولكن خاطري مشتاق= اقدرها من الضلعين من قلبي ومغليها
رصيدي كله فداها لو انه فالمهر ينساق = وتبقى هي رصيد الروح راغبها وشاريها
مشيت وهاجسي معها ولالي حيلةً منضاق = عقب ماباحت سدودي تعكر كل صافيها
الايازين وش هوله تبدل بالوصال فراق = ثمان سنين في غربه وحالي منك مشقيها
ترا الهجران لو انه دقايق وقت ماينطاق = تفور الكبد وتزوعه ويطبخها ويشويها

الشاعر
ناصر بن محمد الحافي