السيف البريع
تعال يالعمدة الله لايهينك تعال= الحرب كرة وفرة وانت تدريبها
انا لا حليت في الديرة تشد الرحال= وايامك السود ما تصفي مشاريبها
العمــــــدة
صاحبك حاضر ووارد بالحبال الطوال=وان شبت النار زودنا مشاهيبها
طغيان فرعون ساقه للشقا والوبال=يعمه وسود الليالي ماحسب غيبها
السيف البريع
يالعمدة اسمع كلامي لا يطول الجدال=القوم لا وصلتك تاخذ مطاليبها
حنا ركبنا سفينتكم على كل حال=واقع والايام تعطيكم تجاريبها
العمــــــدة
ياللي تقول الهوى شدد ثقيل الجبال=اسمع علوم ً بدى في راسها ريبها
مركبك حد السيوف وفوق روس النبال=ياابو العيون الشقيه وصلها شيبها
السيف البريع
حنا اقتحمنا ديارك سلم ولا قتال=نعرف مرابيك وطروقك نغنيبها
نرهي على كل هداج ٍ طوال الحبال=هذي حقيقة وكل الناس تدريبها
العمــــــدة
وصلتنا ضيــف واسقيناك كيف الدلال=من يدري انك تبا تسعى لتخريبها
ما اظن لك مع رجال المعرفة راس مال=يالعقرب اللي تعرف تحرك ذنيبها
السيف البريع
انا وصلت اعتزي واثني رقاب الجمال=واحملك حملة ٍ تبرك وترغيبها
انا راعي عرف تشهد لي ثقات الرجال=وانته علومك مع العالم تهذريبها
العمــــــدة
لو تعتزي يابيض الشارب بعمً وخال=القوم مانته بسالم من مشاعيبها
سوق الملايين ما يعرفك يابو ريال=يبعد ركايبك لو تسعى لتقريبها
السيف البريع
لاجاء نهار العزاوي كل ضلع ٍ يهال=ويدك قصيرة عن القوم ومناصيبها
السوق لي من ورى نجران لا اقصى الشمال=وذيابة الضلع تشبعها مخاليبها
العمــــــدة
ياللي بنيت المباني فوق جرفً هيال=ترى البحور العميقة صعب ترويبها
عندي علومً جديدة عنك يابن الحلال=يا ساكن القرية اللي حان تعذيبها
السيف البريع
انا عزومي على العليا وصعب المنال=ولا انت سلعتك يا مكثر عذاريبها
عندي علوم ٍ كثيرة يوم عرض المجال=عن علة الساس مدري وش تسابيبها
العمــــــدة
بعد التقصي عن الطرقي وكثر السؤال=ما للامور الدخيلة غير تكذيبها
البدر من قسوة ايامه يعوّد هلال=وام الكباير توفت وانفرى جيبها
السيف البريع
هذي عوايدك لا صعبت عليك الثقال= تهرج مع القوم وتشذب عراقيبها
الوقت يروي لنا قصة دعاة الضلال= في قبلة المسلمين اللي تصليبها
العمــــــدة
ياللي تلبست من تحت الثياب البدال=اطلع بدارً تضمك والبس ثويبها
ماضين الافعال ونصلي لرب الجلال=والقوم نعرف نقصر روس اشانيبها
20-Nov-2008, 03:26 AM
العرض العادي
