بعض الطبايــع

[محمد الذيابـــي]

الهرج عندي وازهلو يامعازيب =يقولها اللي لاضمن له وليمه
يقلط على الغيبه وحش العراقيب =ويقطع أذناب الحكي بالنميمه
هذا يغيب ان عودة للمواجيب =ولا عاد تلقى له مع الناس قيمه
مايعرف السنعه ولايعرف العيب =ولاله طموح ولاش قدر وعزيمه
مخطي وتلقا لحيته كلها شيب =ويقول انا قد العلــــــوم العظيمه
ناسه تصحح له ولا ظنه مصيب =وهرج القفا عنده شعار وسيمه
ينقل كلام ولا يحسب العواقيب =ولا جالسه كود العقول السقيمه
احزابه اللي يلحقون المشاهيب =اللي سعـــو بين الغريم وغريمه
ياذيب ياللي تشعب الهرج ياذيب =هون تـــــرى عادتك عاده لئيمه
ياهل الشريعه كثرو بالمكاتيب =وتدخلـــــو ياهل القلوب الرحيمه
الدين علمنا التناصح على الطيب =ومانلفظه من قــــــول ربك عليمه
يالله ياللي تعلم الجهر والغيب =سترك وعفوك والرضا أكبر غنيمه
انا فقير لرحمتك وانته مجيب =أقبل دعوتـــــــي والنوايا سليمه
ياحافظ يونس بوسط الغياهيب =أحفظ لسانـــــــي لايجيب الظليمه
أشوم عن مجلس يحوش الاكاذيب =وانا اعتبر مجلاسي اكبـــر جريمه
وسج القدم في عاليات المراقيب = فــي صحصحٍ يطربك لفحة نسيمه
في ديرةٍ يفرح لها الصدر ويطيب =هي منوة الخاطــــــــر ليا زاد ضيمه
ابعد عن امجالس هل الشك والريب =مدام الـــــي فالنفس عزه وشيمه
هذا خياري بالمنا والاطاليب =ولو فسروه انه هــــــروب وهزيمه
اخذت فالدنيا دروس وتجاريب =درسٍ يشّيب بالرضيع اتعليمـــــــه
والحظ يلعب دور مافيه تكذيب =شيٍ مثبت من عصورٍ قديمــــــــه
ان طاب حظك طبت من دون تثريب =واليا تردى فالليالــــــي كريمـــــه

وسلامة الجميع،،،،

التوقيع

التوقيع محمد الذيابـــي