معجب العتيبي
يامرحبا باللي قبل مده بنا قصرٍ كبير=وضيوفه يجون بعزيمه مايجون بغيرها
القصر مدري من حجر مبناه والا من حصير=والناس للي صار يافواز وش تفسيرها
فواز السعيدي
دام البقا .. والقصر فيه من الكرم شيٍ كثير = دعوة عتيبه والعزيمه .. نوع من تقديرها !!
الساس مبني بالوفا .. والاسم يامعجب شهير = وتريسه زحول الرجال .. وكثر الله خيرها !!
معجب العتيبي
انا اشهد انه بالكرم ياصاحبي فواز غير=فاق الحدود اللي على العالم صعب تعبيرها
لكن من يمك ياراع القصر ما مر البشير=والناس مانعلم خفايا شرها من خيرها
فواز السعيدي
قولك هذا من طيب قلبك .. والنوايا والضمير = لو الكرامه والوفا حمله .. تراك بعيرها !!
بغيت اوصّل كرت دعوه .. بس قلنا (مايصير ) = مانقدر نخالف قوانين العرب عن سيرها !!
معجب العتيبي
ياطيب عينك يالسعيدي تطرح الطير الصغير=وانا احسب انك من قديم الوقت تجهل طيرها
اللي يبا يفعل فعول اهل الوفا يلقا شوير=وانته بعد ضيعتها .. مايعجزك تبريرها
فواز السعيدي
اقول معجب يجمع العتبان ويجينا مغير = واثرك ناوينا بطيّ الخطوه وتقصيرها !!
هاذي بداية خير .. وانته خير وملاقاك خير = بكره مريكا تقطع اعن المملكه تصديرها !!
معجب العتيبي
الدار مليانه حيا يكفي عربها والقصير =وشلون نتركها لدارٍ مابدا تطويرها
اليا ذبحك الجوع والا ضاق صدرك فالعصير=عوّد وخطوتك القديمه يالسعيدي ديرها
فواز السعيدي
الله لنا .. واعرف ترى الدنيا رحاةٍ تستدير = لعلكم بالعاصفه .. تمحاكم بمعصيرها !!
اللي يجينا من غلا .. نذريه فالليل المطير= واللي يصد العين .. هرج العين في تعبيرها !!
معجب العتيبي
الله لنا والكم.. وخل الدعوه لذات العبير=ماجاكم الا الخير خل اسرارها في بيرها
كلمتك هاذي طيبه مادمت فالقصر المدير=وزيارة القصر الكبير احرص على تكريرها