قصيده موجهه للاخ العزيزالشاعرعبدالرحمن ابن علي ابالحارالفليت النفيعي

[بدرالهبيري]

بسم الله الرحمن الرحيم

السلام عليكم ورحمة الله وبركاته ..

قبل مايقارب اسبوع كنت في منطقة القصيم
وقررت العوده فكان هناك انسان عزيز قد طلب
مني زيارته في منطقة الرياض وهو الاخ العزيز
والشاعر عبدالرحمن ابن علي ابالحار الفليت النفيعي ..
وقد تشرفت بزيارته عند اِبله الطيْبه ولايستغرب فطيبها
من طيب اهلها الغانمين اهل الكرم والعلم الغانم والطيب ..

وقد اعلنت في ذلك اليوم ميلاد اخوه لي لم تلدهم امي
ويشهد الله انني تشرفت بهم كثيرا ً وتشرفت بزيارتهم
وبالاخص الاخ العزيز ابوعلي ولاهانوا ربعه ..

قلت هذه القصيده واسندتها على الاخ
العزيز عبدالرحمن اباالحار ( ابوعلي ) ..

اتمنى ان ترقى لذائقته وذائقتم اخواني الاعزاء ..
واترككم مع القصيده ...

من بدرابن عيد الهبيري يااباالحار= سلام من صوغ الذهب فيه عينه
ماهو سلام اللي تبجّحْ بالاشعار= واهدافها يرفع رصيد الخزينه
انا اليا من قلت ماني بهذار= واثبت كلامي بالحروف الرصينه
ولااتعب على المعنى علشان دينار=ولااخبر حطيته مع الخلق زينه
ولايوم في شعري تلاعبت بالنار=ولااصيد فيه الاّ خطاة السمينه
وان هب لي ذعذاع الاشعار واندار=ماالحق وراه ولالْـطـَرْده رهينه
ولااخذت في شعري شهادات واشوار=من طلعتي وابيوت شعري حسينه
والشاهد الله ماعلى هرجي اغبار =دام المعاني والمباني متينه
واقول حق وكلمة الحق بااعيار = واعيارها دايم يصيب الضمينه
واليا مدحت امدح هل الطيب والكار=لااجل المدايح بالنشاما ثمينه
يابو علي ياحر من ماكر احرار=اهل العقول الراجحات الرزينه
ربعن مواقفهم لو ان الزمن دار = تبرز سواة اطويق ماهي دفينه
وابيوتهم للي عليه الزمن جار=شبهتها مثل الحصون الحصينه
ريف الخوي والضيف لاحلّ والجار=واللي بكبده من زمانه غبينه
يابوعلي يانسل وافين الاشبار= ياعل تفداك النفوس اللعينه
ياريف من زارك على الدرب مرار = وياريف من زارك بوسط المدينه
دوك البيوت اللي جديدات وابكار = من قدح راسي ماتقاضيت دينه
فيها على ماقيل مارد ومصدار=واجمع بها مابين قسوه ولينه
وابغى كذا تبقى مع الناس تذكار = والاّ دليل اهل العقول الفطينه
وانتوا كسبتوا طيب في كل مضمار= يوم الوقايع والسيوف السنينه
واعتيبه الهيلا صواريم سنجار = وقت الهداد بيوم مثل الدفينه
تشهد لهم كل القبايل والاقطار= ياما حموا ميقافهم والضعينه
والشاهد الله يوم روغات الابصار = يرسون فوق الموج مثل السفينه
صغيرهم ينشى على شبّة النار= واميرهم تغشى عليه السكينه
والضيف مقلاطه على بنْ وابهار=واعلوم ماهي للنشاما طمينه
ذباحة الحايل ولـِطام غدّار=فكاكة(ن) لاارقاب كانت سجينه
جتك العلوم اللي يسرن ّ الانضار = منــْي على وضح النقا مستبينه
واللي رغا من عقب ماكان هدّار = عيب(ن) عليه وله تراها مهينه
يفنى الفتى والفعل يـِنشر بالاخبار=والثابته عند المدوِّن مكينه
واللي بقى يـَحْضَرْ طويلين الاعمار= مااضن يــِفتى ومالك(ن) بالمدينه

اتمنى أنها حازت على الرضى ..
وسلامتكم ..

تحياتي وتقديري .. بدرعيد ..