~¤¦¦§¦¦¤~ صفاة الّلواء ~¤¦¦§¦¦¤~

[نايف العبيد العتيبي]

بسم الله الرحمن الرحيم

/

كم يقززني تعملق الأقزام من الرجال !!

ولكن :

سَيَعْلَمُ الْجَمْعُ مِمَّا ضَمًّ مَجْلِسُنَا = بِأَنَّنِي خَيْرُ مَنْ تَسْعَى بِهِ قَدَمُ

/
إلى تلك الطحالب التي لاتثمّن الرجال ولاتعي ماتقوله !
وكما قال المثل الشعبي :
( اللي مايعرف الصقر يشويه )
لكن يبدو أن الموازين إختّلت واختلفت , وأصبح المثل :
( اللي يعرف الصقر يشويه )
إلا أنني : لن أهتَمُ بِثرثرةِ المَدينة أو بحديثِ الزنَابقِ .
\
لا أطيل عليكم ياسادة , ولكم هذه التي تعاند راحة قلبها !
ولاتأبى له إلاّ بالشقاء , وروحها باللا .. فناء ...
جَندول عَلى طلل الديار .. وزُلفىَ من ينبوع لتلك القفارْ !
(( صفاة الّلواء ))

قفى نبكي من ذكرى حبيبٍ ومنزلي=بسقط اللواء بين النفود وزرودي
من حدّ جلدية ليا خب العدام=صفاة اللواء هي غاية المقصودي
حتى الهلالي قد ذكرها بشعره=وكم كان شفّه للصفاة يعودي
يوم إنه أطراها بقوله وانشد=أبيات شعرٍ والعباد ارقودي:
( رحلنا ولا تركنا بنجد احسوفه=ياكود آعيلم باللواء له نرودي
جنوبها زيزا به الريم والمها=واشمالها يذرا عليها نفودي)
داري ودار أهلي وربعي كلهم=دار الكرم والعز دار اجدودي
إميرها عّمي عريب المجنا=(خلف الحميدي) شامخاً كالطودي
وأخوانه اللي للمعالي سنّدو=(أحمد) وأخوه (محمدٍ) و(حمودي)
فهود الزراج إن شبّت الهوجاء زمو=بالنايبات المعضلات افهودي
عليهم صلاة الله مني والسلام=كل مااسرجت نود الهبايب عودي
ويحق لي أفخر بربعي كلّهم=أفعالهم بالماضيات اشهودي
اللاّبه اللي بالملاقا ماتغيب=لافاح ريح الدم والبارودي
الحالمين الكاضمين لغيضهم=عون الضعيف إن عاضبه مقرودي
آلاد (حرب) و(شافعٍ) و(رشدان)=و(اللويمي) سقم الجاهل النمرودي
وأذكر (بريك) اللي إنذكر ضمن أربعين=ريف الهجافاء بالليالِ السودي
و(خميس) أخوه الصيرمي الخضّاع=كل مانضب عِدّ الزمان يجودي
و(سعد) اللي قد زبّن قديمٍ (شايع)=زبْن الدخيل الجالي المضهودي
إن جيت أعدّد وش أخّلي وأذكر=الشعر يقصر والخصال اتزودي
وإلا البقيّة ربعنا وأخواننا=والنعم فيهم ماعليهم زودي
دايم لنا عون ومسّد وعزوة=أرداهم إن جيته يحط اقعودي
الله يبل دار اللّواء واشنانها=بوسمّيةٍ تودِع رباها ورودي
واتعّط بآزهار البختري والنفل=لادندنت غر المزن برعودي
وإختام قولي بالصلاة على النبي=إعداد ماذعذع هبوب النودي

للحفظ .. إضغط هناا

توضيح :
القصيدة تحتوي على شخوص وأسماء وأماكن ومواقع
( النفود , زرود ) مواقع , وكذلك ( خب العدام ) , ( جلدّية ) جبل معروف
( الهلالي ) شاعر بني هلال , وقصيدته معروفه بالتاريخ الشعبي أثناء تغريبتهم الشهيرة .
( خلف الحميدي ) أمير العشيرة , ( أحمد و محمد وحمود ) أخوانه .
( حرب , شافع , رشدان ) رجال واسياد في زمانهم عليهم رحمة الله .
كذلك ( اللويمي ) وهو مبارك اللويمي رحمة الله عليه
الذي أخذ بثأر ابوه بعد أن تغرّب ثمان سنين
للنيل من ذلك الجاني , وتحقق له ذلك بعد أن وافى القاتل عند غدير الماء وهو يسقي لفرسه
وقتله بنفس المخرز اللي قُتل فيه أبوه !
وهو الذي يقول :

يقول اللويمي واللويمي مبارك = ثلاث معاني همّيت بهن اهمام
ثمان سنين ماوطيت ملامه =وصبرت أنا مشيٍ على الأقدام
لما تناولت الخضيري بخارزي=وانزاح عن كبدي صدى واهيام
ألا ياحمام الورق سلّم على هلي = شمال بقعاء قرنةٍ بيمام
تر حقنا منها سنام بقزعة=سنام ومن فوق السنام سنام

وهي أطول من ذلك .
( بريك ) راعي بقعاء . وأميرها في السنين الخوالي . يلقب بِ( بيطار الشعر )
ذكره عدوان الهربيد(من السويد من شمر)
بقصيده جمع بها الشاعر اربعين فارس من العرب تسمى
بِ( شيخة شمّر ) ويقول فيها :

المجلس اللي به اسماعيل وسعيد=ينعاف لو انه على الكبد غالي
اسماعيل ماسمته سموت الاجاويد=وسعيد ماداجو عليه الرجالي

إلى أن قال :

ياسعيد هرجك له مغير ومراديد=توّقر من الهرج الرخيص الجمالي
عمّيت بالسبّه جميع القواصيد=ماقلت بالشعاّر طامن وعالي
عمّيت نمرٍ والمهادي وابازيد=عز الظعن حبس الكمين الهلالي
ومشعان والطياروعقاب وعبيد=وعبدالله المصطور ماضي الفعالي

حتى قال :

و( حطاّب ) اللي بالصحن ينفض الغيد=و( بريك ) مهلّي بالركاب الهزالي

وبريك له قصائد كثيرة منها :

نفدى بمطروق الحديد المنمّر = ونبدع صفاةٍ لين يدثر رهيفه
نقول لهم قبل التناشيد سمّو = قراها نماها والضوا من صريفه

( خميس ) أخو بريك . يلقّب بِ ( الخضاّع ) لشجاعته وهو الذي يقول من ظمن قصيدته اليتيمة :

معاني الجود خمسٍ بالكمالي = قطعت ابهن على الشدّة حبالي
اولهن حمست البّن عمداً= بدارٍ ماذخرت أول وتالي

( سعد ) وهو سعد ابن حتيرش . ايضاً من أمراء هذه الديرة السابقين
عليهم رحمة الله .
كريم وطيّب وهو اللي زبّن ( شايع الأمسح ) أمير الرمال من شمر أيام
دولة ( ابن عريعر )
وقصته مع شايع الأمسح معروفة . وقد قال شايع في تلك المناسبة قصيدة
مادحاً هذا المغوار ومبّين منعته وشجاعته , إخترت لكم منها هذان البيتان :

إن كان بالجيران جارٍ مدلّل = فجار ابن حتروش ربى بدلال
في قصرته كنّي بقصر مارد= من الخوف مادبّت علي نمال

/
في الختام ....
لا أقول إلاّ كما قال عمر رضي الله عنه
في آخر دعاء له في خطبته :
اللهم لا تدعني في غمرة ، ولا تأخذني في غّرة ، ولا تجعلني من الغافلين .

دمتم بود

آخر تعديل نايف العبيد العتيبي يوم 25-Jun-2007 في 07:14 PM.