~~~~~> بروق الوسم _ ومجاراتها

[القسامي511]

____¤_بسم الله الرحمن الرحيم_¤____
هذه القصيده من كلماتي نشرت في جريدة الجزيره العام الماضي وبعد نشرها بإسبوع جارها على نفس القافيه والوزن والمعنى في جريدة الجزيره _ الشاعر رويضي بن وسمي المطيري (_ _ _ مهد الذهب _ _ _)
أرجو من الله أن تحوز على رضاكم
محبكم _ القسامي511
~~~~~~~~~بروق الوسم~~~~~~~~~
لاحت بروق الوسم والقلب فزي =
قلبي على شوف الحيا دوم فزاز ؟
يهز قلبي بين الاضلاع هزي =
هز الذي هزه مع الوقت هزاز ؟
والقنص قرب والخواطر تحزي =
وخاويت طيري مع جراهيد الابراز ؟
من فوق جيب" لانهمته يفزي =
من وارد اليابان والنوع ممتاز ؟
فكسار سبعه لاعطى الدرب دزي =
واليا استوى ممشاه بالجايزه فاز ؟
من شان ابطرد هم قلب" يجزي =
اطرد هموم" سببت لي تنفراز ؟
واسج وسط الروض مع كل حزي =
في صحصح" خالي به الصيد لي جاز ؟
إبه المها وبه الحباري ترزي =
رزة غنادير" تسبب لك اعجاز ؟
واهد شيهان" بعينه يقزي =
يفرح اليا منه سمع صوت اليعاز ؟
يصيد جزل الصيد ماصاد وزي =
ويشوق قلبي شوفته عقب ماناز ؟
واليا طرد بالجو لصيد جزي =
مخلابه بضربه على الصيد جزاز ؟
ومن كل صيد" بالحوافض نلزي =
حسب النضام اللي ولاعاد يعتاز ؟
اليوم اشب النار من غير قزي =
في وادي" حزه من السيل حزاز ؟
واليا طرالي طاري" قلت عزي =
للي عن المقناص حاديه معكاز ؟
القنص لهل القنص تاج" وعزي =
مع طاعة المولى على فتوى ابن باز ؟
وعد الرياح اللي هواها يكزي =
صلو على اللي لشفاعات هو حاز ؟
الشاعر _ القسامي511
~~~~~~~من داخل القلب~~~~~~~
يامل قلب" لزه الهم لزي =
متلعوز" من شين وقته تلعواز ؟
اليا استوى ضو القمر وابرهزي =
وانور على حدب الفيافي والاقواز ؟
يخزني من داخل القلب خزي =
هم" يحايدبي عن الناس وانحاز ؟
بغيت اريح منه والقرم دزي =
رسايل" تسكب على قلبي القاز ؟
قامت تجي من صوب حي الملزي =
تشبه صواريخ" تجرز تجراز ؟
ياليت لو إن المنى ما يجزي =
نسج ياراع الرسايل وننحاز ؟
ونصبح مراب اللي اليا شاف كزي =
واصغى لدرب" عسر ماهوب ينهاز ؟
ودك الجفيل وللعيار استرزي =
إمع العضا قام إيتركز تركاز ؟
يازين رميه شوح ماهوب غزي =
رمي الدرك ماهوب رمي التهزهاز ؟
بمسلبات" تزت الملح تزي =
عبرودها منه ايتنقرز تنقراز ؟
وناد المنادي بالعشى واستعزي =
ولجت حداويهم من اجهاز لجهاز ؟
وتخيرو رجع" من السيل نزي =
عقب التعب يازين فيه التمركاز ؟
جلسة ونس ماهي مجالس تهزي =
فيها السوالف والقصايد والالغاز ؟
_الشاعر _ رويضي وسمي المطيري
(_محافظة مهد الذهب_)
____؟؟؟
الداعي لكم محبكم _ القسامي511