عسا جنان الخلد مثواك ياحمود ..!!!

[حسن إبراهيم الدجيماء]

هذي ابيات بسيطه كتبتها في رجل جمع الدين ,, والخلق ,, والرجولة ,, فكان نعم الرجل في الرخااء والشدّه ,,

ويشهد الله لو نكتب ملاحم مانوفيه حقه الله يرحمه ,, كيف لا ,, وهو (( حمود بن محمد الثعلي )) ..!!!

البارحة يومنّ خلق الله رقود = والدمع محرم موق عيني رقاده
من حرّ مافيّه ,, على السِّهر محدود = ظرفٍ ضروري خارج اعن الاراده
طرا علي اللي من العام مفقود = اللي وعده الله ولاأخلف معاده
اللي لياجات المواقيف مشهود = ميقافه مشرّف وفزعته عاده
مثل البشر لافيه نقصٍ ولازود = غير الكرم والطيب ,, هذي زياده
ومواصل الارحام فالبيض والسود = واليا لفاه الضيف ثالث عياده
ونصرة المظلوم والمدّ والجود = في ذمّتي ماهو بحاجة شهاده
عليه من ربي لياهبّت النود = نسناس غفرانه ونفحة براده
ياربّ حرّم لايجي جسمه الدود = مثل ماحرّم لايجي السحت زاده
مراده الجنه ,, وهو حيّ موجود = عساه عند الله يحصّل مراده
عسا جنان الخلد مثواك ياحمود = مع خير خلق الله وصفوة عباده
امّن يامن تسمع كلامي وانا ازود = تٌغفَر ذنوبه كلّها من مهاده
سطّرت منتوج الفكر في رثا العود = مضمونه الغالي وذكره مفاده
ماقلته ارجي من ورا القول مقصود = الا اني احيي ذكر راع الرياده
ولو انّي اطمع لو ازيد انه يعود = لأكتب ملاحم لين يكتب معاده

وسلامتكم ,,

ادعوا للميت ,, فهو في أمسّ الحاجة لدعااؤكم ..!!!