يا ما حلا المرقاد بــ أرض(ن) خلّيه .. - الهيـــــــــــــلا *** منتدى قبيلة عتيبة

باين العتيبي · 22-Feb-2010, 09:48 AM

السلام عليكم ورحمة الله وبركاته
صباحكم ___ مسائكم بالخير ان شاء الله ...
هذه احدى قصائدي واتمنى ان تحوز على رضاكم وإستحسانكم ...

يا ما حلا المرقـاد بـأرضً خليّـه=شعبانها سالت مـن كبـار ضلعـان
في مرتـعً(ن) يرخـي رقـاب الرعيّـه=بعيرها بارك مـن الفجـر شبعـان
فيها اليهق ريحـه يسابـق نصيّـه=وإيداوي اللي من هوا النفس مرضان
مع صوت صرصورً(ن ) تعـلّا صريّـه=يا حلو صوته تالي الليل يـا فـلان
بـأرضً عليها مـن قليـل المطيـه=المجلس المكشوف والظـل شيـران
والنار مشبوبـه صبـاح وعشيّـه=فـي جالهـا ثلاثـة أدلال رسـلان
وإبريقها اللي يرفـع المـا غطيّـه=وشوي عنها حامس البـن حرقـان
قرب الرجال اللي على الفعـل حيّـه=ما هيـب حيّـا الله بخاقـان باقـان
واللـي تكفّـو بالعلـوم الوفـيّـه=ما تتركك حتيّش لو كان مـا كـان
معك الخوي اللـي ينومـس خويّـه=الموتر اللي يحمـل إشعـار يابـان
شاصً على حمل الحمـول القويّـه=ما جاك مثله من قديمـات الازمـان
ياكـنْ فـي جنوبـه تقـلّاب حيّـه=رافع براسـه مـن تكبّـر وطغيـان
مـا ورّد اليابـان فالصبـر زيّــه=والمشكله غالـي وتغليـه الاثمـان
إليـا ركبتـه ثـم تناصيـت نيّـه=يهيّـض السّـواق لا كـان زعـلان
يرقا علـى متـن العـروق العليّـه=إنكان مابه حمل وإن كـان مليـان
حولك مجاهيـمً تجـي حـول ميّـه=رثم الخشوم اللـي يسلّـن الاذهـان
وختامهـا سبحـان مرسـل نبيّـه=محمد الهادي علـى خيـر
الاديـان

وسلامتكم جميع .............

منصورالزبيلي · 22-Feb-2010, 11:19 AM

بارك الله بك , شكراً أخي الكريم
مرحبا بك أخي وصح لسانك

باين العتيبي · 22-Feb-2010, 10:28 PM

اقتباس:

المشاركة الأصلية كتبت بواسطة منصورالزبيلي

بارك الله بك , شكراً أخي الكريم
مرحبا بك أخي وصح لسانك

منصور //

هلابك والله

ومرحبا بك مليون

وصح بدنك

ولا هنت

شاكر لك المرور .