راع الجدعا ابن وايل
سلام ياعتيبه الهيلا ملوك الشعر= في ليله الجمعة اللي غاب شيطانها
مانجهل العلم لو للعلم بطن وظهر= والكتب تعرف مضامنها بعنوانها
معجب العتيبي
يامرحبا ياولد وايل بعيد النظر=والليله الليله الكلمه وميدانها
من عقب ماجيت مالك ياعميلي مفر=والكلمه اللي تبيها جوّد الحانها
راع الجدعا ابن وايل
دام البقا فيك يا فاروق حاكم مصر= الا مصر قولي لي وش علم سكانها
خلك محايد ليا بارى الهلال النصر= من شأن ماتخلف الكفه وميزانها
معجب العتيبي
بعض السوالف بدايتها مؤشر خطر=مالك ومال الديار اللي علا شأنها
اللعب تكتيك والفايز بعيني كبر=الناس تطرب لمن يلعب على شانها
راع الجدعا ابن وايل
اللي قرا المبتدا لابد يقرا الخبر = والا الدير عزها من عز سلطانها
خابرك مانته عمى يامعجب ولاعور= يوم العرب حطت الحبه بنيشانها
معجب العتيبي
اللي يعرف الكتابه مايزوّد سطر=واهل الصليب انتهى تحريف صلبانها
تقولها من تسرع راي والا ضفر؟=بعض الخلايق نكبها هرجة لسانها
راع الجدعا ابن وايل
اللي يغوص البحر يلقى محار ودرر= والا (بابات) الكنيسة ولت ازمانها
المعرفه مالها فالناس قدر وحصر=ماتنحصر في اصول الناس واوطانها
معجب العتيبي
كلّن يشوف البحر كلّن يشوف البحر=لكنّ من يظهر الدره ومرجانها
جبت الحقايق بعد صليت فرض الضهر=ليتك من اول بدايه قلتلي عانها
راع الجدعا ابن وايل
صدقت فاللي تقوله ياطويل العمر= حنا نعرف البضايع وسط دكانها
وانته فهمته بعد صليت فرض العصر= والناس ماجت بمشمشها ورمانها
معجب العتيبي
اختامها خير في تالي ليال الشهر=حنا اتفقنا على الكلمه وبرهانه
خلاص بان الصبح ماعاد فيها سهر=والحق في غرفة التحقيق واركانها
« آخـــر الـــمـــشـــاركــــات »
31-Jul-2009, 09:39 PM
العرض الشجري