ابو لمار
ابو فلاح الله يبارك فيه مايعرف نظام = عنده وساطه والوساطه فوق كل الانظمه !!
وليا نشدته قال انا تاجر وبيّاع الكلام = وافرح ليا قالوا علي فلاح قاضي المحكمه !!
علي فلاح العضياني
ابو لمار إيقولها بعد إمتلا بطنه طعام=في ما مضى كمّ مرّةٍ يفتح فمه و أملا فمه !!!
الشكّ و التشكيك ما يلحق رفيعين المقام=و كم قلت لك من لا يكرّم شاربه ما نكرمه
ابو لمار
مادام انا موجود اظنك ماتهنّا بالمنام = تحلم في نومك مير صعب اتحقق اللي تحلمه !!
من بعد هذي مانقول الا على الدنيا السلام = من بعد حطّوك الزعيم اللي يدير امنظمه !!
علي فلاح العضياني
وجود ابو لمار و غيابه تساوا بالتمام=يعني مع عتيبه وجوده يعتبر مثل عدمه
احفظ لسانك في مكانك لا تلوم و لا تلام=في كل ليله حطّ بيدينك على فمك شحمه
ابو لمار
بانت فصول المسرحيه وانت ياعادل امام = طاغي على المخرج وتمسح مايخطّه بقلمه !!
ايحق الك وانت هنا تنفخ وفي خشمك عرام = غيّر مكانك وانت تعرف حظك اللي تظلمه !!
علي فلاح العضياني
لو تحترم نفسك تحصلّك معزّه و احترام=و لا أصبحت غمّتك من فعل المعاصي مظلمه
تسكب دموعك فوق خدّك لجل نعطيك الوسام= لكنّ من يرحمك بعد اليوم مالله يرحمه
ابو لمار
مايعرف احقوق الرجال الا الرياجيل الكرام = ولايجهل افعول النشامى غير رجال ارخمه !!
هذا الوسام اللي معك ماينفعك وقت الزحام = وانته تحسبن المراجل في لبوس الاوسمه !!
علي فلاح العضياني
كلمتك هذيّه على راسك عليه بالحرام=قد قلتها لك و الخبر لو تسمعه ما تفهمه
لا يشعبك يابو لمار ابليس ملعون الرسام=اللي نهار العيد حجّاج المشاعر ترجمه
ابو لمار
جاتك صقور الجوّ تبغى الصيد ياراعي الحمام = خلّ الحمام ابعشّته لاجل الصقر مايلزمه !!
عند المشاكل ياعلي ابليس وانته في انسجام = وقت المشاكل ياعلي يزهمك وانته تزهمه !!
علي فلاح العضياني
شكرك على حدب السيوف اللي يقصنّ العظام=يا شاعرٍ ما همّنا لو يدعمه من يدعمه
وش لون تحرفها بعد جاتك على أفضل ما يرام=ما تعرف إنّ السمّ سمّ الاّ ليا أطعمت طعمه
ابو لمار
الدعم لك ماهو بلي ياللي تحصّن بالعمام = لولا عمامك ياعلي ماترسم اللي ترسمه !!
ماني بخابر لي يهودي في الحرم صلى وصام = بيت الله المعمور تعمره العباد المسلمه !!
علي فلاح العضياني
أنا أعرف إنّك شايبٍ عمرك وصل 50 عام=لكنّ اخذها كاش يا شايب بدون مقدّمه
عقلك مثل عقل اليتيم اللي قبل سنّ الفطام=من كثر ما ننصحك سطّرنا كتاب و ملحمه
ابو لمار
وانا اعرف انك ورع عمرك ماوصل عشرة عوام = يالجاهل اللي كل يوم ادرسه واعلمه !!
لكن لاتسري مع السرحان في الليل الظلام = يالراعي اللي لو يشوف الذيب عذّر في اغنمه !!
علي فلاح العضياني
كبير لكنّك معك فالنفس شكّه و انفصام=لولا السبب هذاه يشملكم نظام المكرمه
أظن و الذمّه بريّه , صاحبي ياكل حرام=يسحن طحين الدخن في الكفّ اليسار و يلهمه
« آخـــر الـــمـــشـــاركــــات »
15-Jun-2009, 04:44 PM
العرض الشجري