يا رويس .. الراس ما يختل من خلاف الركايب

[معجب العتيبي]

العمــــــدة

يا رويس ,الــراس ما يختل من خلاف الركايب=إن لقاهــا الصبح وجه لوجه والا ما ختلــــــها
الحشيمة للرجال اللي يسدون النوايب=تمنع الرجال بعض احيـــان من حاجه وصلها

سلطان بن دحيم

يا عجايب يا زمان اليوم والله يا عجايب = من فعلها يتهم فيها بري(ن) ما فعلها
انت جايب لك خبر وعلوم قلي ويش جايب = كان فيه علوم عندك يا وسيع العرف قلها

العمــــــدة

ما تحليت البروق ولا دريت عن السحايب=الامانة بعد هذي كيف تقدر تحتملها
من تعشى من لحم رجال والرجال غايب=يبدو انه لو عطيناه الحقيقة ما قبلها

سلطان بن دحيم

يا وسيع العرف ما هز الجبل صفق الهبايب = والذلول اللي تدرهم ليت راعيها عقلها
والله لتركز على قبري طويلات النصايب = ما نزلت الديره اللي صاحبي قبلي نزلها

العمــــــدة

الاوايل رابحة والفضل من جزل الوهايب=والديــّـر عندي علوم سهولها واعرف جبلها
تاجر الجملة يمر السوق ويشوف الجلايب=والرقاب اللي عوجها الوقت لا مالت عدلها

سلطان بن دحيم

انت دمك من ظروف الوقت يا رجال رايب = والعرب تجهلك وانته يا ولد سبة جهلها
الجلايب مثلك وشرواك ما منها كسايب = وانت من ناس(ن) رضاها عندنا يشبه زعلها

العمــــــدة

لو نشدت النشمي اللي راسه من الوقت شايب=قال لك شغله تشره لحيتك لا تشتغلها
لا تبيح السد ثم اسقيك من كاس المصايب=ما ينوخ للحمول الكايدات الا جملها

سلطان بن دحيم

اعرف دروب الرجال وفي يدي عطب الضرايب = ولحيتي تكرم عن اللي ماينومسها عملها
كانت شبت نارها والله لزودها شبايب = لين بعض الناس فالميدان بالنار اهبلها

العمــــــدة

ارتفع سعر الشرى والبيع في عوص النجايب=لين شفت اهل الهلل ما عاد جملها هللها
انت يا سلطان اظنك من تلاميذ ابن ثايب=كل نهج الرجل فالشخصية اللي تنتحلها

سلطان بن دحيم

لا تحسب انك تبى تاخذ عباد الله نهايب = كل ما كلت الك كيله عندنا تلقى دبلها
هود العمده عن علومه وانا اعرف السبايب = عقب نوخ للحمول الجايرات ولا نقلها

العمــــــدة

ما ختلت اطعن على وضح النقا والسهم صايب=وانت ما ترفع سهوم الا الزمن يثبت فشلها
خاطر العمدة بعد حدك على الوعرات طايب =كيف ماتنقض بيــــوت الشعر يوم انه فتلها

سلطان بن دحيم

اثرك الله لا يهينك من قريبين الحضايب = لكن حمولك على غاربك يا رجال شلها
عقب دقيتك بخشم السيف من بين الترايب = والله لتبطي وعينك ما نست رجل(ن) كحلها