ناصر الجلاه
ابن عاصي لايخفي علمها والعلم باين=ما درى إن الناس في حوش المعيشه سابقينه
تدرج في ظلم وتشري من العالم مكاين=والمصيبه كان يدفن فقر ابن عاصي مكينه
العازمي
ابن عاصي يالعصيمي ماشكى هم وغباين = مغتني بالله ولاياخذ من القرّاش دينه!!
مالقينا اللي خبرها مع جميع الناس فاين = مار ردنّا الخبر وسط الحفر والا دوينه!!
ناصر الجلاه
غيبتك هاذي تدينك دام ماناشك صخاين=ياخساره يوم اقول إن ابن عاصي ذاخرينه
لاتعرض بالصياح صياح والدعوى هواين=عيد جمع فالمكاين ماحسب زينه وشينه
العازمي
احمد الله يوم يذكرني من العقّال كاين = يوم غيري لو غيابه عام محدن قال وينه!!
في حراج العاصمه شافوك تطردلك زباين = يوم عيد العازمي مادار فالموضوع عينه!!
ناصر الجلاه
يابن عاصي هد روعك وش بلا خاطرك شاين=الدعاوي في يسار الخط وأنته في يمينه
عيد باسط والعرب صفوا سوى في شكل لاين=أم أسد عنده !! وصوته فالعشيه سامعينه
العازمي
دربنا درب اليمين ولاندورها مداين = اشقر المرقاب تلقاله على المرقاب عينه!!
فيه زيبق يالعصيمي ماظهر وسط الخزاين = علم اللي مادرا يملا من الزيبق يدينه!!
ناصر الجلاه
لد عينك في طويل الرجم يارجال عاين=والله إني من حرارٍ ماتذوق ألا السمينه
دام جبت إنا الحقيقه يابن عاصي منت خاين=آثر مطلوبك من الزيبق ونياتك لعينه
العازمي
لاتميدح وانته اسمك في كشوفات الرهاين = كيف نشهدلك ولاعندك على الجزله ضمينه!!
عقب اخذت القسم الاوفر بيّنت فيك البواين = درس مجّاني وجا ناصر على وقته وحينه!!
ناصر الجلاه
مايزعزعنا كلام أهل الفتن وأهل الضغاين=وإن لفيت اطلب شهاده منك ياكبر الغبينه
لاتقول الوضع زان ووضعكم ماهو بزاين=وانت تعرفنا نشوم وسومنا سلعه ثمينه
العازمي
الغبينه يوم جيت النّا بعلم اهل الكباين = قبل هاذيّه نعدّك من قباطنت السفينه!!
مايقدر خالق الانسان يارجال كاين = وضعكم ماهوب دايم في طمان وفي سكينه!!
« آخـــر الـــمـــشـــاركــــات »
15-Apr-2009, 04:34 PM
العرض الشجري