ناصر المرشدي
ابا ادور المعنى وابا صخَر القاف=وابا اعوم واسبح فالبحور الطويله
يامرزوق بن حمدان ماعاد تنشاف=بعد كان يامرزوق مافيك حيله
مرزوق حمدان العتيبي
ياناصر تفضل قدمك الوان واصناف = تزيد المعاني كل يوم ٍ وليله
لعلك تشيل الحمل من فوق الاكتاف = يابلهان شيّال الحمول الثقيله
ناصر المرشدي
ليا اشرفت يامرزوق في راس مشراف=تخيِّل على راسك مزون المخيله
نسوق القدم قدام مانرجع خلاف=ياطيب العميل اللي يخلص عميله
مرزوق حمدان العتيبي
ليا جيت ياناصر على جال مهياف = تمسك قبل تردم عليك الثنيله
على حسب نهج اهل المبادي والاعراف = يبا كل راعي جهد ياخذ حصيله
ناصر المرشدي
انا ماتخفى وانت صايبك خفخاف=مروعك مجنونِ يومّي شليله
الك وجهِ ابيض والك عزوه وميقاف=تبيّن وتلقانا يياراع الكحيله
مرزوق حمدان العتيبي
انا كالبحر ماينقصه غرف غراف = ولي وقفة ٍ ماتعرف المستحيله
ياناصر ورى ياصاحبي صابك ارجاف = وانا خابرك محشوم عن كل ميله
ناصر المرشدي
انا خابرك شاعر على حد صياف=تحضر بيوت الشعر بأهون وسيله
اقول الكلام الصدق ماني بخواف=من اول مرشح شاعرِ للقبيله
مرزوق حمدان العتيبي
وانا كنت اعدك نجم مع كل الاطياف = ولك زند من قدحه تشب الفتيله
ولكن لا تندم على طايف ٍ طاف = ترى الطيبه ماتستوي بالهزيله
ناصر المرشدي
شهود الرجال رجال في كل محراف=وعقل البنادم في حياته دليله
ان اوصفك وانته تجاهلت الاوصاف=علامك خلطت الهيل بالزنحبيله
مرزوق حمدان العتيبي
عطيتك حقيقه منطلق عدل وانصاف = ومثلك ياناصر ماندوّر بديله
نقضت الكلام ولاتكلمت بجحاف = اجاوب لصوت الذيب واهذل هذيله
« آخـــر الـــمـــشـــاركــــات »
15-Jan-2009, 12:24 PM
العرض الشجري